ວັນທີ 9 ຕຸລານີ້, ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ທ່ານ ສອນໄຊ ສີພັນດອນ ນາຍົກຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຈິ່ນ ຫຼີຊຸ່ນ ( Mr.Jin Liqun), ປະທານທະນາຄານການລົງທຶນໂຄງລ່າງພື້ນຖານໍອາຊີ (AIIB) ພ້ອມດ້ວຍຄະນະ ໃນໂອກາດມາເຂົ້າຮ່ວມກອງປະຊຸມສຸດຍອດອາຊຽນ ແລະ ກອງປະຊຸມທີ່ປິ່ນອ້ອມອື່ນໆ ໃນໄລຍະວັນທີ 9-11 ຕຸລາ 2024 ທີ່ນະຄອນຫຼວງວຽງຈັນ.
ສອງຝ່າຍ ໄດ້ປຶກສາຫາລື ກ່ຽວກັບ ໂອກາດໃນການຮ່ວມມື ລະຫວ່າງ AIIB ແລະ ສປປ ລາວ ກໍຄື ອາຊຽນ ໂດຍສະເພາະການເຊື່ອມໂຍງ-ເຊື່ອມຈອດໂຄງລ່າງພື້ນຖານ ແລະ ຂົງ ເຂດວຽກບູລິມະສິດອື່ນໆ ທີ່ເປັນທ່າແຮງໃນການສືບຕໍ່ຮ່ວມມືກັນໃນຕໍ່ໜ້າ.
ໃນໂອກາດນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຍິນດີຕ້ອນຮັບ ທ່ານ ຈິ່ນ ຫຼີຊຸ່ນ ຕໍ່ການເດີນທາງເຂົ້າຮ່ວມກອງປະຊຸມໃນຄັ້ງນີ້. ພ້ອມທັງສະແດງຄວາມຊົມເຊີຍ ແລະ ຂອບໃຈ ຕໍ່ ທະນາຄານການລົງ ທຶນເພື່ອການພັດທະນາໂຄງລ່າງພື້ນຖານອາຊີ (AIIB) ທີ່ໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ຕະຫຼອດມາ ໂດຍສະເພາະ ການສະໜັບສະໜູນ ແລະ ຊ່ວຍເຫຼືອທາງດ້ານການເງິນ ໃນການປັບປຸງດ້ານໂຄງລ່າງພື້ນຖານຕ່າງໆ.
ທະນາຄານລົງທຶນໂຄ່ງລ່າງພື້ນຖານອາຊີ (Asian Infrastructure Investment Bank) ຫຼື ເອໄອໄອບີ (AIIB) ແມ່ນສະຖາບັນການເງິນລະດັບສາກົນ ໂດຍແມ່ນຂໍ້ລິເລີ່ມຂອງ ທ່ານ ສີ ຈິນຜິງ, ປະທານປະເທດ ແຫ່ງ ສປ ຈີນ ຕາມວິໃສທັດການສ້າງເສດຖະກິດເສັ້ນທາງສາຍໄໝ ແລະ ເສັ້ນທາງສາຍໄໝທາງທະເລໃນສະ ຕະວັດທີ 21 (Silk Road). ປັດຈຸບັນສະມາຊິກຂອງ AIIB ມີທັງໝົດ 80 ປະເທດ ແລະ ສປປ ລາວ ແມ່ນໜຶ່ງໃນປະ ເທດສະມາຊິກດັ່ງກ່າວ.
