ກົມໃຫຍ່ພະລາທິການ ກະຊວງປ້ອງກັນຄວາມສະຫງົບ ໄດ້ສຸມໃສ່ເຮັດໜ້າທີ່ຢ່າງຕັ້ງໜ້າໃນການຕອບສະໜອງທາງດ້ານພະລາທິການໃຫ້ແກ່ກໍາລັງປ້ອງກັນຄວາມສະຫງົບທີ່ເຮັດໜ້າທີ່ປ້ອງກັນໃນໄລຍະກະກຽມ ແລະ ດໍາເນີນກອງປະຊຸມສຸດຍອດອາຊຽນຄັ້ງທີ 44 ແລະ 45 ເຮັດໃຫ້ກອງປະຊຸມດັ່ງກ່າວມີຜົນສໍາເລັດຢ່າງຈົບງາມ ພ້ອມທັງຮັບປະ ກັນໄດ້ຄວາມສະຫງົບປອດໄພ ແລະ ເປັນລະບຽບຮຽບຮ້ອຍ.
ພົຈວ ສີສຸວັນ ທອງປະເສີດ ຮອງຫົວໜ້າກົມໃຫຍ່ພະລາທິການ ກະຊວງ ປກສ ທັງເປັນຫົວໜ້າຈຸດບັນຊາວຽກງານພະລາທິການ ໃຫ້ແກ່ການປ້ອງກັນກອງປະຊຸມສຸດຍອດອາຊຽນຄັ້ງທີ 44 ແລະ 45 ໄດ້ໃຫ້ສໍາພາດຕໍ່ສື່ມວນຊົນ ປກສ ວ່າ: ຜ່ານການຈັດຕັ້ງປະຕິບັດວຽກງານຮັບປະກັນດ້ານພະລາທິການໃຫ້ແກ່ການປ້ອງກັນກອງປະຊຸມສຸດຍອດອາຊຽນຄັ້ງທີ 44 ແລະ 45 ທີ່ ສປປ ລາວ ເປັນເຈົ້າພາບ ສັງລວມແລ້ວແມ່ນມີຜົນສໍາເລັດຕາມລະດັບຄາດໝາຍທີ່ວ່າງໄວ້ ເປັນຕົ້ນແມ່ນການຕອບສະໜອງທາງດ້ານເຄື່ອງອຸປະໂພກ, ບໍລິໂພກ, ວັດຖຸຢຸດໂທປະກອນ, ພາຫະນະນໍາໃຊ້ໃນແຕ່ລະຈຸດປ້ອງກັນ, ນໍ້າມັນເຊື້ອໄຟ, ການເບິ່ງແຍງປິ່ນປົວສຸຂະພາບ ແລະ ທາງດ້ານອື່ນໆ, ພື້ນຖານແລ້ວແມ່ນເຮັດໃຫ້ກໍາລັງປ້ອງກັນໃນແຕ່ລະຈຸດມີຄວາມສະ ດວກໃນການປະຕິບັດໜ້າທີ່ຂອງຕົນໄດ້ຢ່າງຕັ້ງໜ້າ, ກໍາລັງພະລາທິການທຸກສະຫາຍໄດ້ເປັນເຈົ້າການຢ່າງຕັ້ງໜ້າໃນການເຄື່ອນໄຫວເຮັດໜ້າທີ່ຂອງຕົນຢ່າງມີຜົນສາໍເລັດ, ສະແດງອອກໄດ້ຕອບສະໜອງເຄື່ອງທີ່ຈໍາເປັນໃຫ້ກໍາລັງປ້ອງກັນທັນກໍານົດເວລາເຊັ່ນ: ມີລະບົບການສົ່ງນໍ້າມັນເຄື່ອນທີ່ຕະຫຼອດ 24 ຊົ່ວໂມງ ໂດຍມີລົດຮັບໃຊ້ສະເພາະໃນການຂົນສົ່ງນໍ້າມັນໄປແຕ່ລະຈຸດປ້ອງກັນທີ່ມີຄວາມຕ້ອງການ; ນອກນີ້, ຍັງມີລົດສໍາລັບຂົນສົ່ງເຄື່ອງອຸປະໂພກ, ບໍລິໂພກ, ເຄື່ອງຢຸດໂທປະກອນ ແລະ ເຄື່ອງໃຊ້ຈໍາເປັນຕ່າງໆ ເພື່ອຈັດສົ່ງໃຫ້ກັບກໍາລັງປ້ອງກັນຢ່າງພຽງພໍ, ນອກຈາກນີ້ ຍັງຮັບປະກັນໄດ້ທາງດ້ານວຽກງານເສນາຮັກ ເປັນຕົ້ນແມ່ນໄດ້ຈັດຕັ້ງກໍາລັງແພດໝໍ ລົງກວດກາສຸຂະພາບໃຫ້ແກ່ການນໍາ ແລະ ກໍາລັງປ້ອງກັນໃນແຕ່ລະຈຸດ ໃຫ້ມີສຸຂະພາບເຂັ້ມແຂງ ກຽມພ້ອມເຮັດໜ້າທີ່ຂອງຕົນ; ພ້ອມກັນນີ້ ຄະນະພັກ-ຄະນະບັນຊາ ກົມໃຫຍ່ພະລາທິການ ປກສ ຍັງໄດ້ເອົາໃຈໃສ່ໃນການລົງຕິດຕາມ, ກວດກາ ແລະ ຊຸກຍູ້ໃຫ້ກໍາລັງໃຈບັນດາກໍາລັງປ້ອງກັນໃນແຕ່ລະຈຸດເປັນປະຈໍາທຸກໆວັນ ເຊິ່ງໄດ້ເຮັດໃຫ້ກໍາລັງປ້ອງກັນຄວາມສະຫງົບມີກໍາລັງໃຈ ແລະ ໄດ້ປະຕິບັດໜ້າທີ່ຢ່າງມີຜົນສໍາເລັດ, ພາຍຫຼັງສາໍເລັດການປ້ອງ ກັນກອງປະຊຸມແລ້ວ ກໍາລັງພະລາທິການ ປກສ ຍັງໄດ້ລົງເກັບກູ້ຄືນບັນດາອຸປະກອນ, ເຄື່ອງຂອງຕ່າງໆທີ່ຮັບໃຊ້ແກ່ວຽກງານປ້ອງກັນຄວາມສະຫງົບ ມາເກັບຮັກສາໄວ້, ສ່ວນເຄື່ອງຮັບໃຊ້ໃດທີ່ມີການເປເພ ກໍແມ່ນເອົາໄປສ້ອມແປງ ເພື່ອໃຫ້ສາມາດນໍາໃຊ້ໄດ້ໃນຕໍ່ໜ້າ.
ທ່ານ ຍັງໄດ້ກ່າວຕືມອີກວ່າ: ຍ້ອນໄດ້ຮັບການຊີ້ນໍາຢ່າງໃກ້ຊິດຈາກການນໍາກະຊວງ ປກສ ກໍຄືກົມໃຫຍ່ພະລາທິການ ປກສ ແລະ ມີແຜນແມ່ບົດຢ່າງລະອຽດ, ນອກນີ້ຄະນະພັກ-ຄະນະບັນຊາ ແລະ ກໍາລັງພະລາທິການ ປກສ ທຸກສະຫາຍແມ່ນໄດ້ສຸມໃສ່ປະຕິບັດໜ້າທີ່ຢ່າງສຸດຄວາມສາມາດ ຈຶ່ງເຮັດໃຫ້ວຽກງານຮັບປະກັນດ້ານພະລາທິການໃຫ້ແກ່ການປ້ອງກັນກອງປະ ຊຸມສຸດຍອດອາຊຽນຄັ້ງທີ 44 ແລະ 45 ທີ່ ສປປ ລາວ ເປັນເຈົ້າພາບ ມີຜົນສໍາເລັດເປັນຢ່າງດີ.
