ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ຄັ້ງທີ 11 ໄດ້ຈັດຂຶ້ນໃນວັນທີ 21 ພະຈິກນີ້ທີ່ນະຄອນຫຼວງວຽງຈັຍ, ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ມີຜູ້ແທນຈາກບັນດາປະເທດສະມາຊິກອາຊຽນ, ຕີມໍ-ແລັດສະເຕ, ເລຂາທິຫານໃຫຍ່ອາຊຽນ ແລະ ຜູ້ແທນກະຊວງປ້ອງກັນປະເທດປະເທດ ສປ ຈີນ, ລັດເຊຍ, ອິນເດຍ, ສ. ເກົາຫຼີ, ຍີ່ປຸ່ນ, ອົດສະຕຣາລີ, ນິວຊີແລນ, ສະຫະລັດ ອາເມລິກາ ເຂົ້າຮ່ວມ.
ທ່ານ ພົນເອກ ຈັນສະໝອນ ຈັນຍາລາດ ກ່າວເປີດກອງປະຊຸມວ່າ: ກອງປະຊຸມລັດຖະມົນ ຕີປ້ອງກັນປະເທດອາຊຽນ-ບວກ (ຈີນ, ລັດເຊຍ, ອິນເດຍ, ສ. ເກົາຫຼີ, ຍີ່ປຸ່ນ, ອົດສະຕຣາລີ, ນິວຊີແລນ ແລະ ສາຫະລັດ ອາເມລິກາ (ADMM-ບວກ) ຄັ້ງທີ 11 ນີ້ໄດ້ດຳເນີນພາຍໃຕ້ ຫົວຂໍ້ “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”, ເຊິ່ງໄດ້ຈັດຂຶ້ນທ່າມກາງສະພາບການຂອງໂລກ ແລະ ພາກພື້ນມີຄວາມຫຍຸ້ງຍາກສັບສົນ, ສະ ຫຼັບສັບຊ້ອນ ແລະ ຍາກທີ່ຈະຄາດຄະເນໄດ້, ມີຫຼາຍພາກພື້ນໃນໂລກກຳລັງປະເຊີນໜ້າກັບຄວາມໝັ້ນຄົງ ທາງການທະຫານ ແລະ ບໍ່ແມ່ນທາງການທະຫານ ທີ່ສົ່ງຜົນກະທົບຕໍ່ຊິວິດ ແລະ ຊັບສິນຂອງປະຊາຊົນ ກໍຄືການພັດທະນາເສດຖະກິດ-ສັງຄົມໂດຍລວມ; ເປັນໂອກາດດີທີ່ບັນດາທ່ານລັດຖະມົນຕີປ້ອງກັນ ປະເທດອາຊຽນ-ບວກ ໄດ້ມາພົບກັນ ເພື່ອປຶກສາຫາລື ແລະ ແລກປ່ຽນສະພາບກ່ຽວກັບ ຄວາມໝັ້ນຄົງຂອງພາກພື້ນ ແລະ ສາກົນ ທີ່ພົ້ນເດັ່ນ, ເຊິ່ງລວມມີ ໄພຂົ່ມຂູ່ ແລະ ສິ່ງທ້າທາຍທາງດ້ານຄວາມໝັ້ນຄົງ ພາຍໃນພາກພື້ນ ກໍຄືສາກົນ ພ້ອມທັງການໃຫ້ຄຳແນະນຳ ແລະ ວິທີທາງ ໃນການຮັບມືກັບສິ່ງທ້າທາຍດັ່ງກ່າວ ໃຫ້ມີປະສິດທິພາບ ແລະ ທັນເວລາ. ໃນເວລາດຽວກັນ, ສະພາບຄວາມໝັ້ນຄົງຂອງພາກພື້ນ ແລະ ສາກົນ ໄດ້ຢໍ້າເຕືອນໃຫ້ພວກເຮົາຕ້ອງໄດ້ ສົ່ງເສີມການສ້າງຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ແລະ ການຮ່ວມມືທີ່ເປັນຮູບປະທຳ ເພື່ອສ້າງ ຄວາມພ້ອມໃນການຮັບມືກັບບັນຫາດັ່ງກ່າວ; ທັງນີ້, ກໍເພື່ອເສີມຂະຫຍາຍການຮ່ວມມື ດ້ານວຽກງານປ້ອງກັນຊາດ ແລະ ຄວາມໝັ້ນຄົງ, ສົ່ງເສີມຄວາມເຂົ້າໃຈ ແລະ ຄວາມໄວ້ວາງໃຈເຊິ່ງກັນ ແລະ ກັນ ເພື່ອປະກອບສ່ວນເຂົ້າໃນການປົກປັກຮັກສາ ແລະ ສ້າງສາສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງ ພາກພື້ນ.
ໃນວາລະຂອງກອງປະຊຸມ, ຍັງໄດ້ຍັງໄດ້ຈັດພິທີມອບໂອນການປະທານກອງປະຊຸມລັດຖະ ມົນຕີປ້ອງກັນປະເທດອາຊຽນໃຫ້ປະເທດມາເລເຊຍ.
