ໃນວັນທີ 3 ມັງກອນ 2025 ຢູ່ທີ່ຫ້ອງປະຊຸມໃຫຍ່ ອົງການປົກຄອງ ແຂວງຊຽງຂວາງ ໄດ້ຈັດພິທີປະກາດການອະນຸມັດໃຫ້ຫົວໜ້າກອງບັນຊາການ ປກສ ແຂວງຊຽງຂວາງ ພັກການຮັບອຸດໜູນບໍານານ ແລະ ແຕ່ງຕັ້ງຫົວໜ້າກອງບັນຊາການ ປກສ ຊຽງຂວາງ ຜູ້ໃໝ່, ໃຫ້ກຽດເຂົ້າຮ່ວມເປັນປະທານໂດຍ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ, ມີທ່ານ ບຸນຈັນ ສີວົງພັນ ກຳມະການສູນກາງພັກ ເຈົ້າແຂວງໆ ຊຽງຂວາງ, ມີບັນດາຄະນະພັກ, ຄະນະນໍາແຂວງ, ກົມໃຫຍ່, ຫ້ອງວ່າການກະຊວງ ປກສ, ພ້ອມດ້ວຍແຂກຖືກເຊີນຈາກພະແນກການ-ກົມກອງ ແລະ ພະນັກງານບັນຊາກອງບັນຊາກການປ້ອງກັນຄວາມສະຫງົບແຂວງ ເຂົ້າຮ່ວມຢ່າງພ້ອມພຽງ.
ພົຈວ ຄອນສະຫວັນ ສົມພາໄຊ ຄະນະພັກກະຊວງ, ຮອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ຂຶ້ນຜ່ານມະຕິຕົກ ລົງ ຂອງຄະນະເລຂາທິການສູນກາງພັກ ສະບັບເລກທີ 288/ຄລສພ; ດໍາລັດ ຂອງນາຍົກລັດຖະມົນຕີ ສະບັບເລກທີ 614/ນຍ ວ່າດ້ວຍການອະນຸມັດໃຫ້ນາຍຕໍາຫຼວດ ອອກພັກການ-ຮັບອຸດໜູນບໍານານ ໃນນີ້, ໄດ້ອະນຸມັດໃຫ້ ພົຈວ ບຸນລົດ ຄໍາແພງພັນ ກຳມະ ການປະຈໍາພັກແຂວງ ຫົວໜ້າກອງບັນຊາການ ປກສ ແຂວງຊຽງຂວາງ ກະຊວງປ້ອງກັນຄວາມສະຫງົບ ອອກພັກການ-ຮັບອຸດໜູນບໍານານ, ຜ່ານຄໍາສັ່ງ ຂອງທ່ານນາຍົກລັດຖະມົນຕີ ສະບັບເລກທີ 23/ນຍ ວ່າດ້ວຍການຍົກຍ້າຍນາຍຕໍາຫຼວດໄປຮັບໜ້າທີ່ໃໝ່, ນາຍົກລັດຖະມົນຕີອອກຄໍາສັ່ງ ຍົກຍ້າຍ ພົຈວ ສີວັນທາ ເພຍສະຂາ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ໄປຮັບໜ້າທີ່ໃໝ່ຢູ່ກອງບັນຊາການປ້ອງກັນຄວາມສະຫງົບ ແຂວງຊຽງຂວາງ ແລະ ແຕ່ງຕັ້ງ ເປັນຫົວໜ້າກອງບັນຊາການປ້ອງກັນຄວາມສະ ຫງົບ ແຂວງຊຽງຂວາງ.
ພ້ອມນີ້, ໃນພິທີ ສະຫາຍ ສູນທອນ ພົມມີໄຊ ຫົວໜ້າຄະນະຈັດຕັ້ງແຂວງຊຽງຂວາງ ກໍໄດ້ຜ່ານມະຕິຕົກລົງ ຂອງຄະນະປະຈໍາພັກແຂວງ ສະບັບເລກທີ 320/ຄປພຂ ວ່າດ້ວຍການບົ່ງຕົວແຕ່ງຕັ້ງ ສະຫາຍ ພົຈວ ສີວັນທາ ເພຍສະຂາ ເປັນເລຂາຄະນະພັກກອງບັນຊາການ ປກສ ແຂວງຊຽງຂວາງ.
ໂອກາດນີ້, ພົອ ວິໄລ ຫຼ້າຄໍາຟອງ ໄດ້ໂອ້ລົມ ໂດຍທ່ານໄດ້ກ່າວວ່າ: ການເຂົ້າຮັບບຳ ນານຂອງນາຍຕໍາຫຼວດ ໃນຄັ້ງນີ້ ຖືວ່າ: ແມ່ນນະໂຍບາຍອັນສູງສົ່ງຂອງພັກ, ລັດຖະ ບານ ກໍຄືກະຊວງປ້ອງກັນຄວາມສະຫງົບ ເພື່ອໃຫ້ ສະຫາຍ ໄດ້ພັກຜ່ອນເມື່ອຮອດອາຍຸກະສຽນ ແລະ ກໍເພື່ອປັບປຸງ, ຊັບຊ້ອນບຸກຄະລາກອນໃໝ່ເຂົ້າໃນການຈັດຕັ້ງໃຫ້ຄົບຖ້ວນ ເພື່ອຕອບສະໜອງກັບຄວາມຮຽກຮ້ອງຕ້ອງການໜ້າທີ່ການເມືອງຂອງພັກ, ລັດ, ກຳລັງປ້ອງກັນຄວາມສະຫງົບ ໃນໄລຍະໃໝ່.
ຈາກນັ້ນ, ທ່ານໄດ້ເນັ້ນໜັກບັນດາສະຫາຍ ທີ່ຖືກແຕ່ງຕັ້ງ ສືບຕໍ່ຮ່ວມກັບໝູ່ຄະນະ ພາຍໃຕ້ການຊີ້ນຳຂອງປະທານ, ຄະນະກຳ ມະການ ປກຊ-ປກສ ແຂວງ, ຄະນະບໍລິ ຫານງານພັກແຂວງ ເພື່ອເຮັດໃຫ້ສະພາບພາຍໃນແຂວງ ແລະ ສະພາບພາຍໃນກົມກອງມີຄວາມສະຫງົບ, ມີຄວາມໜັກແໜ້ນ, ສາມາດປະຕິບັດສຳເລັດທຸກໜ້າທີ່ການເມືອງ ທີ່ໄດ້ຮັບມອບໝາຍ.
