ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດ ຖະມົນຕີກະຊວງ ປກສ ໄດ້ມີທິດຊີ້ນຳໃຫ້ເຫຼົ່າວິຊາສະເພາະໃນຖັນແຖວກຳລັງປ້ອງກັນຄວາມສະຫງົບ ໃນຂອບເຂດທົ່ວປະເທດ ສືບຕໍ່ປະຕິບັດວຽກງານປົກປັກຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ ເພື່ອຮັບປະກັນໃຫ້ບັນດາເຫດການ ການເມືອງສຳຄັນຂອງພັກ, ລັດ ແລະ ສະພາແຫ່ງຊາດ ໄດ້ຮັບການຈັດ ຕັ້ງປະຕິບັດ, ດຳເນີນໄປດ້ວຍຄວາມປອດໄພ ແລະ ທັງເປັນການປັບປຸງແບບແຜນ, ການຈັດ ຕັ້ງປະຕິບັດໜ້າທີ່ການເມືອງຂອງກຳລັງ ປກສ ໃນປີ 2025 ໃຫ້ເຂົ້າສູ່ລະບົບທີ່ໜັກແໜ້ນ.
ທິດຊີ້ນຳດັ່ງກ່າວ, ມີຂຶ້ນໃນໂອກາດທີ່ ພົອ ວິໄລ ຫຼ້າຄຳຟອງ ໄດ້ເປັນປະທານພິທີປິດກອງປະ ຊຸມສະຫຼຸບວຽກງານ ປກສ ປະຈໍາປີ 2024 ແລະ ວາງທິດທາງວຽກງານຈຸດສຸມ ປະຈຳປີ 2025 ຂອງກະຊວງປ້ອງກັນຄວາມສະຫງົບ ໃນວັນທີ 31 ທັນວາ 2024 ພາຍຫຼັງດຳເນີນມາເປັນເວລາ 2 ວັນ.
ທ່ານ ຮອງນາຍຍົກລັດຖະມົນຕີ ກ່າວວ່າ: “ ໃນຕໍ່ໜ້າ, ບັນດາສະຫາຍໃນຄະນະພັກ-ຄະນະບັນຊາແຕ່ລະຂັ້ນນັບທັງສູນກາງ ແລະ ທ້ອງຖິ່ນ ຈົ່ງເອົາໃຈໃສ່ນຳພາ-ບັນຊາວຽກງານປົກປັຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ ໂດຍການສືບຕໍ່ຮັບປະກັນໃຫ້ປະເທດຊາດມີສະຖຽນລະພາບ, ມີຄວາມສະຫງົບປອດໄພຢ່າງໜັກແໜ້ນ, ມາດຕະການຍຸດທະສາດ ຍັງແມ່ນຫັນກຳລັງລົງກໍ່ສ້າງຮາກຖານການເມືອງ ຕິດພັນກັບການສ້າງ ບ້ານ-ກຸ່ມບ້ານພັດທະນາ ຕາມທິດ 3 ສ້າງຢູ່ພື້ນທີ່ສ່ຽງ, ບໍລິເວນຊາຍ ແດນ ທັງໃຫ້ຕິດພັນກັບການສືບຕໍ່ຊຸກຍູ້ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ຂັ້ນທ້ອງຖິ່ນຮາກຖານໃຫ້ແຂງແຮງ; ປຸກລະດົມປະຊາຊົນເຂົ້າ ຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຟົດຟື້ນກວ້າງຂວາງ ແລະ ຖືເອົາວຽກງານນີ້ເປັນໜ້າທີ່ຂອງທົ່ວປວງຊົນ ”.
ຄຽງຄູ່ກັບການສືບຕໍ່ສ້າງ, ປັບປຸງກຳລັງ, ລະບົບສູນບັນຊາ, ພາຫະນະ, ວຽກງານຮັບປະກັນ, ແຜນການກຽມພ້ອມສູ້ຮົບ ແລະ ນິຕິກຳກ່ຽວຂ້ອງ ເພື່ອສາມາດ ແກ້ໄຂສະພາບໄດ້ໃນທຸກກໍລະນີ; ໃນນັ້ນ, ໃຫ້ສຸມໃສ່ປ້ອງກັນບັນດາເຫດການການເມືອງທີ່ສຳຄັນຂອງ ພັກ, ຂອງຊາດ ໃຫ້ມີຄວາມຮັບປະກັນຮອບດ້ານ.
