ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ກະຊວງ ປກສ ໄດ້ລາຍງານໃຫ້ຮູ້ວ່າ: ກົມໃຫຍ່ການເມືອງ ປກສ ໄດ້ເປັນເສນາທິການຄົ້ນຄວ້າກຳນົດຍຸດທະສາດ, ແຜນນະ ໂຍບາຍ, ພ້ອມທັງນຳສະເໜີວິທີການຈັດຕັ້ງປະຕິບັດວຽກງານພັກ-ວຽກງານການເມືອງ ໃນກໍາລັງປ້ອງກັນຄວາມສະຫງົບ ໃນແຕ່ລະໄລຍະ ເພື່ອເປັນພື້ນຖານ ໃນການປັບປຸງກໍ່ສ້າງກໍາລັງປ້ອງກັນຄວາມສະ ຫງົບໜັກແໜ້ນທາງດ້ານແນວຄິດ.
ການລາຍງານດັ່ງກ່າວໄດ້ມີຂຶ້ນໃນວັນທີ 30 ທັນວາ 2024, ເຊິ່ງແມ່ນໂອກາດທີ່ທ່ານ ຫົວ ໜ້າກົມໃຫຍ່ການເມືອງ ປກສ ເຂົ້າຮ່ວມກອງປະຊຸມສະຫຼຸບວຽກງານປ້ອງກັນຄວາມສະ ຫງົບ ປີ 2024 ແລະ ວາງທິດທາງຈຸດສຸມ ປີ 2025; ທ່ານກ່າວວ່າ: ເພື່ອກໍ່ສ້າງໃຫ້ກຳລັງ ປກສ ມີຄວາມໜັກແໜ້ນທາງດ້ານແນວຄິດ, ກົມໃຫຍ່ການເມືອງ ປກສ ໄດ້ເອົາໃຈໃສ່ຢ່າງຕັ້ງໜ້າ ຕໍ່ວຽກງານສຶກສາອົບ ຮົມການເມືອງນໍາພາແນວຄິດ, ຍົກເປັນວຽກງານທີ່ສໍາຄັນ ແລະ ຖືເປັນໜ້າທີ່ຕົ້ນຕໍຂອງຄະນະພັກແຕ່ລະຂັ້ນ, ເຮັດເປັນປະຈໍາ ດ້ວຍຫຼາຍເນື້ອໃນ, ຫຼາຍຮູບ ການ, ໂດຍສະເພາະແມ່ນເນື້ອໃນ 3 ທາດແທ້, 7 ມູນເຊື້ອ, 4 ໜ້າທີ່ ແລະ 4 ການພົວພັນ ຂອງກຳລັງປ້ອງກັນຄວາມສະຫງົບ, ຕິດພັນກັບການປຸກລະດົມຂະບວນການແນວຄິດ “ຮັກ ຊາດ-ພັດທະນາ” ຢ່າງຕັ້ງໜ້າ; ຈັດຕັ້ງເຊື່ອມຊຶມກໍາແໜ້ນແນວທາງນະໂຍບາຍຂອງພັກ, ກົດ ໝາຍຂອງລັດ ແລະ ລະບຽບວິໄນຂອງກໍາລັງ.
ຜ່ານການຈັດຕັ້ງປະຕິບັດ ເຫັນວ່າທຸກຂົງເຂດວຽກງານ ສາມາດຍາດໄດ້ຜົນສໍາເລັດອັນໃໝ່ໃນຫຼາຍດ້ານ ແລະ ຕີຖອຍໄດ້ບັນດາປະກົດການຫຍໍ້ທໍ້ຕ່າງໆ ໃນກຳລັງ ປກສ ໄດ້ດີພໍສົມຄວນ, ສ້າງການຫັນປ່ຽນໃໝ່ໄດ້ຢ່າງແຂງແຮງ ກ້າວໄປເຖິງການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເທື່ອລະກ້າວ, ສະມາຊິກພັກ, ນາຍ ແລະ ພົນຕໍາຫຼວດສ່ວນຫຼາຍມີແນວຄິດອຸ່ນອຽນທຸ່ນທ່ຽງ ຍຶດ ໝັ້ນ ຕໍ່ອຸດົມການຂອງພັກ, ມີທັດສະນະຫຼັກໝັ້ນຊົນຊັ້ນ, ມີນ້ຳໃຈຮັກຊາດ, ເສຍສະລະເພື່ອຊາດ, ເພື່ອປະຊາຊົນ, ມີຄວາມດຸໝັ່ນບຸກບືນຮໍ່າຮຽນພັດ ທະນາຕົນເອງໃນທຸກດ້ານກຽມພ້ອມຮັບໃຊ້ປະເທດຊາດຢ່າງບໍ່ມີເງື່ອນໄຂ.
ພົຕ ປອ ສຸວັນນີ ສີສຸພາບມີໄຊ ກ່າວວ່າ: ” ໃນປີ 2025 ຄະນະພັກ-ຄະນະບັນຊາທຸກຂັ້ນ ຕ້ອງຕັ້ງໜ້າສຶກສາອົບຮົມການເມືອງ-ແນວຄິດໃຫ້ສະມາ ຊິກພັກນາຍ ແລະ ພົນຕໍາຫຼວດ ມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ລະບອບປະ ຊາທິປະໄຕປະຊາຊົນ, ປະຕິບັດກົດລະບຽບຂອງພັກ, ລັດຖະທໍາມະນູນ, ກົດໝາຍຂອງລັດ ແລະ ຂໍ້ກຳນົດ, ລະບຽບວິໄນຂອງກຳລັງປ້ອງກັນຄວາມສະຫງົບປະຊາຊົນ ຢ່າງເຂັ້ມງວດ.
