ໃນຕອນເຊົ້າວັນທີ 31 ທັນວາ 2024, ກະຊວງປ້ອງກັນຄວາມສະຫງົບ ໄດ້ສຳເລັດກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈໍາປີ 2024 ແລະ ວາງທິດທາງແຜນການວຽກງານຈຸດສຸມ ປີ 2025 ພາຍຫຼັງທີໄດ້ດໍາເນີນມາເປັນເວລາ 2 ວັນ ໂດຍພາຍໃຕ້ການເປັນປະທານຂອງ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງ ກັນຄວາມສະຫງົບ, ມີບັນດາທ່ານຮອງລັດຖະມົນຕີ, ປະທານ, ຮອງປະທານກຳມາທິການ ປກຊ-ປກສ ສະພາແຫ່ງຊາດ, ຫົວໜ້າ, ຮອງຫົວໜ້າຫ້ອງການ ປກຊ-ປກສ ສູນກາງ, ຫົວໜ້າ, ຮອງຫົວໜ້າກົມໃຫຍ່, ຫ້ອງວ່າການກະຊວງ, ກົມ-ກອງບັນຊາການ, ວິທະ ຍາຄານ, ກອງບັນຊາການ ປກສ ນະຄອນຫຼວງວຽງ ຈັນ, ກອງບັນຊາການ ປກສ ແຂວງ ທົ່ວປະເທດ ພ້ອມດ້ວຍພະນັກງານຫຼັກແຫຼ່ງຂອງກໍາລັງປ້ອງກັນຄວາມສະຫງົບ ເຂົ້າຮ່ວມ.
ໃນການດໍາເນີນກອງປະຊຸມ, ຜູ້ແທນທີ່ເຂົ້າຮ່ວມໄດ້ຮັບຟັງການລາຍງານບົດສະຫຼຸບວຽກງານປ້ອງກັນຄວາມສະຫງົບ ປະຈຳປີ 2024 ແລະ ທິດທາງແຜນການວຽກງານຈຸດສຸມໃນປີ 2025. ພ້ອມນັ້ນ, ຍັງໄດ້ສຸມໃສ່ຄົ້ນຄວ້າປະກອບຄຳຄິດຄຳເຫັນດ້ວຍບັນຍາກາດຟົດຟື້ນ, ມີເນື້ອໃນທີ່ໜັກແໜ້ນ, ຕີລາຄາບັນຫາຢ່າງພາວະວິໄສ, ມີຄຳເຫັນກົງໄປກົງມາ, ຍົກໃຫ້ເຫັນຜົນງານທີ່ຕັ້ງໜ້າ ແລະ ຜົນສຳ ເລັດທີ່ຍາດມາໄດ້ໃນ 1 ປີທີ່ຜ່ານມາ, ຂໍ້ທີ່ຄົງຄ້າງ, ວິທີແກ້ໄຂ ແລະ ມີຄວາມເປັນເອກະພາບຕໍ່ທິດທາງແຜນການທີ່ຕ້ອງໄດ້ສືບຕໍ່ໃນປີ 2025.
ໃນກອງປະຊຸມ, ຍັງໄດ້ຮັບຟັງການໂອ້ລົມໃຫ້ທິດຊີ້ນໍາຈາກ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ; ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການນຳພາ-ຊີ້ນຳຂອງຄະນະພັກຄະນະນຳແຕ່ລະຂັ້ນ ຍາດມາໄດ້ໃນ 1 ປີຜ່ານມາ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ.
ໃນກອງປະຊຸມຄັ້ງນີ້, ທ່ານລັດຖະມົນຕີກະຊວງປ້ອງກັນຄວາມສະຫງົບ ຍັງໄດ້ເນັ້ນໜັກຫຼາຍບັນຫາທີ່ສໍາຄັນ ເພື່ອໃຫ້ຄະນະພັກ, ຄະ ນະນໍາ ແຕ່ລະຂັ້ນເອົາໃຈໃສ່ ເປັນຕົ້ນແມ່ນໃຫ້ສືບຕໍ່ຮັບປະກັນໃຫ້ປະເທດຊາດມີສະຖຽນລະພາບ, ມີຄວາມສະຫງົບປອດໄພຢ່າງຮອບດ້ານ ດ້ວຍມາດຕະການຍຸດທະສາດທີ່ເຂັ້ມງວດ. ພ້ອມຫັນກໍາລັງລົງກໍ່ສ້າງຮາກຖານການເມືອງຢ່າງໜັກແໜ້ນ, ຕິດພັນກັບການສ້າງບ້ານ-ກຸ່ມບ້ານພັດທະນາ ຕາມທິດ 3 ສ້າງ ຕິດພັນກັບການສືບຕໍ່ຊຸກຍູ້ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ຂັ້ນທ້ອງຖິ່ນຮາກຖານໃຫ້ແຂງແຮງ; ປຸກລະດົມປະຊາຊົນເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຟົດຟື້ນກວ້າງຂວາງ ແລະ ຖືເອົາວຽກງານນີ້ເປັນໜ້າທີ່ຂອງທົ່ວປວງຊົນ, ເພີ່ມທະວີການເຄື່ອນໄຫວວຽກງານວິຊາສະເພາະຢູ່ແຕ່ລະຂັ້ນໃຫ້ແຂງແຮງ, ສືບຕໍ່ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະແຕ່ປີ 2024-2025 ໃຫ້ບັນລຸຕາມຈຸດປະສົງ ແລະ ຄາດໝາຍທີ່ໄດ້ກໍານົດ, ຄຸ້ມຄອງຄົນເຂົ້າ-ອອກເມືອງ, ຄຸ້ມຄອງສໍາມະໂນຄົວ, ສຸມໃສ່ການຄຸ້ມຄອງ-ກວດກາ ການຫຼຸດຜ່ອນອຸບັດຕິເຫດຕາມເສັ້ນທາງສັນຈອນ, ການນໍາໃຊ້ສື່ສັງຄົມອອນລາຍ, ການສືບສວນ-ສອບສວນ-ແກ້ໄຂຄະດີໃຫ້ເຂົ້່າສູ່ນິຕິກຳ ແລະ ກົດໝາຍ; ສືບຕໍ່ວຽກງານປັບປຸງກໍ່ສ້າງພັກ, ກໍ່ສ້າງກໍາລັງປ້ອງກັນຄວາມສະຫງົບ ຕິດ ຕາມ, ເກັບກໍາສະພາບການເມືອງແນວຄິດຂອງພະນັກ ງານ-ນັກຮົບໃນທົ່ວກໍາລັງ, ສຸມໃສ່ຈັດຕັ້ງຜັນຂະຫຍາຍບັນດາມະຕິກອງປະຊຸມໃຫຍ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ຄັ້ງທີ V ຂອງຄະນະພັກກະຊວງໄລຍະທ້າຍສະ ໄໝ, ການປັບປຸງລະບົບການຈັດຕັ້ງນໍາພາ-ບັນຊາ, ການກໍານົດໂຄງປະກອບບຸກຄະລາກອນ ແລະ ຈໍານວນພົນໃຫ້ແທດເໝາະກັບໜ້າທີ່ການເມືອງ; ການປັບປຸງການຈັດຕັ້ງໃຫ້ດໍາເນີນໄປຄຽງຄູ່ກັບການແກ້ໄຂປະກົດການຫຍໍ້ທໍ້ໃນກົມກອງ; ສຸມໃສ່ກະກຽມຄວາມພ້ອມດ້ານຕ່າງໆ ເພື່ອເຮັດໃຫ້ກອງປະຊຸມໃຫຍ່ພັກ ແຕ່ລະຂັ້ນຂອງ ພວກເຮົາ ດໍາເນີນໄປຕາມແຜນການ.
