ໃນວັນທີ 30 ທັນວາ 2024, ພົຕ ສຸລິນະ ແກ້ວປະເສີດ ຫົວໜ້າຫ້ອງວ່າການກະຊວງປ້ອງ ກັນຄວາມສະຫງົບ ລາຍງານຜົນການຈັດຕັ້ງປະຕິບັດວຽກງານຮັກສາຄວາມສະຫງົບ ແລະ ເປັນລະບຽບຮຽບຮ້ອຍໃນສັງຄົມ ຕໍ່ກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2024 ພາຍໃຕ້ການເປັນປະທານຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສຸນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ.
ພົຕ ສຸລິນະ ແກ້ວປະເສີດ ລາຍງານວ່າ: ໃນປີ 2024, ກໍາລັງປ້ອງກັນຄວາມສະຫງົບ ທົ່ວປະເທດ ໄດ້ສຸມໃສ່ຈັດຕັ້ງປະຕິບັດຄໍາສັ່ງ ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ; ຄໍາສັ່ງວ່າດ້ວຍການສະກັດກັ້ນ ແລະ ແກ້ໄຂປາກົດການຫຍໍ້ທໍ້ໃນສັງຄົມ; ລວມທັງບັນດາໜ້າວຽກຈຸດສຸມປິ່ນອ້ອມໜ້າທີ່ການເມືອງຂອງກໍາລັງ ສາມາດເລີກຮື້, ແກ້ໄຂບັນດາເປົ້າໝາຍອາຊະຍາກຳ ທີ່ສ້າງຄວາມບໍ່ສະຫງົບຢູ່ໃນສັງຄົມ; ເຊິ່ງມີຄະດີອາຍາເກີດຂຶ້ນທັງໝົດ 7.350 ເລື່ອງ ສາມາດມ້າງໄດ້ທັງໝົດ 6.519 ເລື່ອງ, ກັກຕົວຜູ້ຖືກຫາ 9.860 ຄົນ, ຍິງ 1.337 ຄົນ ມີຄົນຕ່າງປະເທດ 344 ຄົນ, ຍິງ 31 ຄົນ ທຽບໃສ່ປີ 2023 ຄະດີເພີ່ມຂຶ້ນ 640 ເລື່ອງ.
ວຽກງານທີ່ພົ້ນເດັ່ນແມ່ນໄດ້ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕາມ 6 ວຽກງານຈຸດສຸມ, ສາມາດມ້າງຄະດີກຸ່ມແກ້ງຄ້າຂາຍຢາເສບຕິດໄດ້ທັງໝົດ 3.771 ເລື່ອງ, ກັກຜູ້ຖືກຫາ 5.125 ຄົນ, ຍິງ 551 ຄົນ ຄົນຕ່າງປະເທດ 214 ຄົນ, ຍິງ 21 ຄົນ, ດໍາເນີນຄະດີສໍາເລັດ 3.494 ຄະດີ, ຢຶດຂອງກາງຢາເສບຕິດປະເພດຕ່າງໆໄດ້ ເຊັ່ນ:
– ຢາບ້າ 86 ລ້ານກວ່າເມັດ ນໍ້າໜັກ 8.000 ກວ່າກິໂລກຼາມ, ເຮໂຣອິນ 388 ກິໂລກຼາມ, ຢາໄອສ໌ 5.000 ກວ່າກິໂລກຼາມ, ຢາອີ 2.725 ເມັດ ເທົ່າກັບ 61 ກິໂລກຼາມ, ຢາຝິ່ນ 88 ກິໂລກຼາມ; ກັນຊາ 3.000 ກວ່າກິໂລກຼາມ, ແປ້ງຝຸ່ນ 10.367 ກິໂລກຼາມ, ເຄຕາມິນ 33 ກິໂລກຼາມ, ລົດໃຫຍ່ 99 ຄັນ, ລົດຈັກ 598 ຄັນ, ອາວຸດປືນ 38 ກະບອກ, ລູກປືນ 2.273 ລູກ, ໝາກແຕກ 5 ໜ່ວຍ, ເງິນກີບ 941 ລ້ານກວ່າກີບ, ເງິນຢວນ 5 ລ້ານກວ່າຢວນ, ເງິນບາດ 2 ລ້ານກວ່າບາດ, ເງິນໂດລາ 2,300 ໂດລາ, ເງິນເຢັນ 50,000 ເຢັນ ແລະ ເຄື່ອງຂອງກາງອື່ນໆອີກຫຼາຍລາຍການ ທຽບໃສ່ ປີ 2023 ຄະດີຢາເສບຕິດ ຫຼຸດລົງ 512 ເລື່ອງ ເທົ່າກັບ 11,95%.
