ໃນປີ 2024 ຜ່ານມາ, ກອງບັນຊາການປ້ອງກັນຄວາມສະຫງົບ ເຂດເສດຖະກິດພິເສດສາມຫຼ່ຽມຄໍາ ໄດ້ສຸມໃສ່ໃນການແກ້ໄຂບັນຫາປະກົດການຫຍໍ້ທໍ້ໃນເຂດເສດຖະກິດພິເສດສາມຫຼ່ຽມຄຳ ສາມາດມ້າງກຸ່ມແກ້ງສໍ້ໂກງຊັບທາງໂທລະຄົມໄດ້ 9 ຄັ້ງ.
ພັອ ອານຸສິນ ສັກປະເສີດ ຫົວໜ້າກອງບັນຊາການປ້ອງກັນຄວາມສະຫງົບ ເຂດເສດຖະກິດພິເສດສາມຫຼ່ຽມຄຳ ໃຫ້ສຳພາດໃນໂອກາດທີ່ໄດ້ມາເຂົ້າຮ່ວມກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2024 ແລະ ວາງທິດທາງແຜນການປີ 2025 ໃຫ້ຮູ້ວ່າ: ໂດຍປະຕິບັດຕາມທິດຊີ້ນຳຂອງຄະນະພັກ ຄະນະນຳກະຊວງປ້ອງກັນຄວາມສະຫງົບ ກໍຄືທິດທາງແຜນການຂອງກອງບັນຊາການປ້ອງກັນຄວາມສະຫງົບ ເຂດເສດຖະກິດພິເສດສາມຫຼ່ຽມຄຳ, ພວກເຮົາໄດ້ວາງແຜນມ້າງອາຊະຍາກຳຕ່າງໆໄດ້ດີພໍສົມຄວນ. ໃນນັ້ນ, ພົ້ນເດັ່ນໄດ້ມ້າງກຸ່ມແກ້ງຄໍເຊັນເຕີ້ ຫຼື ສໍ້ໂກງຊັບທາງໂທລະຄົມ.
ຜ່ານມາ, ໄດ້ສຸມໃສ່ມ້າງກຸມດັ່ງກ່າວ ສາ ມາດຈັບກຸມເລີກຮື້ບັນດາຫົວໜ່ວຍ 9 ຄັ້ງ ມີ 267 ຫົວໜ່ວຍ. ໃນນັ້ນ, ມີ 16 ສັນຊາດ. ໃນການມ້າງແຕ່ລະຄັ້ງ, ພວກເຮົາໄດ້ມີການວາງແຜນກັບກະຊວງ ໂດຍສະເພາະກົມໃຫຍ່ຕຳຫຼວດ, ອໍານາດການປົກຄອງເຂດ, ຕຳ ຫຼວດ ສປ ຈີນ ແລະ ສສ ຫວຽດນາມ.
ຜ່ານການມ້າງສະເພາະຄົນຕ່າງປະເທດ ສປປ ຈີນ ແລະ ສສ ຫວຽດນາມ ແມ່ນໄດ້ສົມທົບກັບທີມຕຳຫຼວດສອງປະເທດ ນໍາສົ່ງກັບຄືນປະເທດ, ສ່ວນຄົນຕ່າງປະເທດອື່ນໆໃນອາຊຽນ ຫຼື ໃນໂລກ ພວກເຮົາໄດ້ສົມທົບກັບສະຖານທູດ ເພື່ອສົ່ງມອບກັບຄືນປະເທດ. ສຳລັບຄົນລາວ ໄດ້ຂຶ້ນບັນຊີ ເຮັດບົດບັນທຶກກ່າວເຕືອນ ມອບໃຫ້ຜູ້ປົກຄອງຮັບກັບຄືນບ້ານ.
ໃນຊຸມປີຕໍ່ໜ້າ, ກໍຄືປີ 2025 ກອງບັນຊາການປ້ອງກັນຄວາມສະຫງົບເຂດເສດຖະກິດພິ ເສດສາມຫຼ່ຽມຄຳ ໄດ້ມີແຜນການຮ່ວມກັບກະຊວງປ້ອງກັນຄວາມສະຫງົບ ໂດຍສະເພາະກົມໃຫຍ່ຕຳຫຼວດ ຈະລົບລ້າງກຸ່ມຄໍເຊັນເຕີໃຫ້ໄດ້ ແລະ ໃນຕົ້ນປີຈະໄດ້ມີກອງປະ ຊຸມຖອດ ຖອນບົດຮຽນ ສະຫຼຸບໃນການປາບປາມແກ້ງສໍ້ໂກງຊັບທາງໂທລະຄົມໃຫ້ໝົດໄປ ຕໍ່ກັບບັນ ຫານີ້ຕ້ອງໄດ້ຮ່ວມມືກັບຫຼາຍຝ່າຍ ເປັນຕົ້ນສະພາເຂດ, ຄະນະບໍລິຫານ ຄະນະຄຸ້ມຄອງເຂດ, ກອງບັນຊາການປ້ອງກັນຄວາມສະຫງົບແຂວງບໍ່ແກ້ວ ຈະໄດ້ສືບຕໍ່ຮ່ວມມືກັນໃນຕໍ່ໜ້າ ເພື່ອເຮັດໃຫ້ແຜນການລຸລ່ວງແລະສຳເລັດເປັນຢ່າງດີ.
