ໃນຕອນເຊົ້າຂອງວັນທີ 30 ທັນວາ 2024, ກະຊວງ ປກສ ໄດ້ເປີດກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2024 ແລະ ວາງທິດທາງວຽກງານຈຸດສຸມປີ 2025; ເຊິ່ງຈະດຳເນີນເປັນເວລາ 2 ວັນ ເຖິງວັນທີ 31 ທັນວາ 2024, ພາຍໃຕ້ການເປັນປະທານຂອງ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ, ມີບັນດາທ່ານຮອງລັດຖະມົນຕີ, ຮອງກຳມາ ທິການ ປກຊ-ປກສ ສະພາແຫ່ງຊາດ, ຮອງຫົວໜ້າຫ້ອງ ການ ປກຊ-ປກສ ສູນກາງ ແລະ ຫົວໜ້າອົງການຜູ້ຕາງໜ້າກະຊວງປ້ອງກັນຄວາມສະຫງົບລາວ ປະຈຳ ສ ສ ຫວຽດນາມ, ຫົວໜ້າກົມ, ຮອງກົມໃຫຍ່, ຫ້ອງວ່າການກະຊວງ, ກົມ-ກອງບັນຊາການ, 3 ວິທະຍາຄານອ້ອມຂ້າງກະຊວງ, ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ກອງບັນຊາການ ປກສ ແຂວງ ທົ່ວປະເທດ ພ້ອມດ້ວຍພະນັກງານຫຼັກແຫຼ່ງຂອງກໍາລັງປ້ອງກັນຄວາມສະ ຫງົບ ເຂົ້າຮ່ວມ.
ການດຳເນີນກອງປະຊຸມໃນຄັ້ງນີ້ ເພື່ອສະຫຼຸບຕີລາຄາຄືນການຈັດຕັ້ງເຄື່ອນໄຫວວຽກງານປ້ອງກັນຄວາມສະຫງົບ ໃນ 1 ປີ ທີ່ຜ່ານມາ ຄື: ການຈັດຕັ້ງປະຕິບັດ 4 ຄາດໝາຍ 4 ແຜນງານ 41 ໂຄງການທີ່ກະຊວງວາງອອກ ເພື່ອຈະໄດ້ພ້ອມກັນສະຫຼຸບຕີລາຄາສັງລວມໃຫ້ເຫັນດ້ານດີຜົນງານ-ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້, ພ້ອມກັນຄົ້ນຄ້ວາ, ວິເຄາະ, ວິໃຈບັນຫາປະກົດການຫຍໍ້ທໍ້ໃນກໍາລັງຫາງສຽງວິພາກວິຈານຂອງ ສັງຄົມ ຕໍ່ກໍາລັງປ້ອງກັນຄວາມສະຫງົບ, ຊອກຫາວິທີການ ແລະ ມາດຕະການສຸມໃສ່ແກ້ໄຂໃນປີ 2025 ໃຫ້ມີໝາກຜົນສູງສຸດເຮັດໃຫ້ບັນຫາຫາງສຽງຂອງສັງຄົມ ຕໍ່ກໍາລັງໃຫ້ໜ້ອຍລົງ, ເຮັດໃຫ້ບົດບາດຂອງກຳ ລັງສູງຂຶ້ນໃນສັງຄົມ ແລະ ເປັນທີ່ເພິ່ງຂອງປະຊາຊົນຢ່າງແທ້ຈິງ, ພ້ອມດຽວກັນນັ້ນ, ຍັງຕ້ອງໄດ້ ຄົ້ນຄວ້າ, ກຳແໜ້ນທິດຊີ້ນໍາຂອງຂັ້ນເທິງ ໂດຍສະເພາະຄໍາເຫັນຊີ້ນໍາຂອງທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ຕໍ່ວຽກງານປ້ອງກັນຄວາມສະຫງົບ ໃນຕໍ່ໜ້າ.
ກອງປະຊຸມ, ຜູ້ເຂົ້າຮ່ວມຈະໄດ້ຮັບຟັງບົດສະຫຼຸບການເຄື່ອນໄຫວວຽກງານປ້ອງກັນຄວາມສະຫງົບ ປະຈຳປີ 2024 ແລະ ທິດທາງແຜນການວຽກງານຈຸດສຸມ ປີ 2025; ບົດລາຍງານຜົນສໍາເລັດບັ້ນປ້ອງກັນກອງປະຊຸມສຸດຍອດອາຊຽນ ຄັ້ງທີ 44,45 ແລະ ກອງປະຊຸມປິ່ນອ້ອມອື່ນໆ ທີ່ ສປປ ລາວ ເປັນເຈົ້າພາບ.
ຈາກນັ້ນ, ບັນດາກົມ-ກອງອ້ອມຂ້າງກະຊວງ, ກອງບັນຊາການ ປກສ ແຂວງທົ່ວປະເທດຈະໄດ້ປະກອບຄໍາຄິດເຫັນຕໍ່ຄໍາຖາມເຈາະຈີ້ມຂອງປະທານ.
