ຄະນະຜູ້ແທນກົມພົວພັນຕ່າງປະເທດ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດ ນາມ ໄດ້ເດີນທາງມາພົບປະຢ້ຽມຢາມ ແລະ ເຮັດວຽກກັບຄະນະຜູ້ແທນກົມກອງອ້ອມຂ້າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ, ຝ່າຍລາວນໍາໂດຍ ພົນຈັດຕະວາ ອານຸເດດ ຄູນຄໍາ ຮອງຫົວໜ້າຫ້ອງວ່າການ ກະຊວງປ້ອງກັນຄວາມສະຫງົບ, ຝ່າຍຫວຽດນາມນໍາໂດຍ ພັນເອກ ຫງວຽນ ມິງ ຫຽວ ຮອງຫົວໜ້າກົມພົວພັນຕ່າງປະເທດ ພ້ອມຄະນະທັງສອງຝ່າຍ ເຂົ້າຮ່ວມ.
ການພົບປະສອງຝ່າຍຄັ້ງນີ້, ເພື່ອເປັນການຜັນຂະຫຍາຍແຜນການຈັດຕັ້ງປະຕິບັດສັນຍາຮ່ວມມື ປະຈຳປີ 2024 ລະຫວ່າງ ສອງກະຊວງ ກໍຄື ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ໂດຍສະເພາະເປັນການຈັດຕັ້ງປະຕິບັດບົດບັນທຶກການຮ່ວມສະກັດກັ້ນ ແລະ ຕ້ານອາຊະຍາກຳ ລະຫວ່າງ ສອງກໍາລັງຕຳຫຼວດ ກະຊວງປ້ອງກັນຄວາມສະຫງົບ ລາວ-ຫວຽດນາມ ໃນການເພີ່ມທະວີການຮ່ວມມືຕ້ານອາຊະຍາກໍາຢາເສບຕິດ.
ໂອກາດດັ່ງກ່າວ, ທັງສອງຝ່າຍ ໄດ້ຕີລາຄາສູງຕໍ່ການພົບປະຄັ້ງນີ້ ເຊິ່ງເປັນການເພີ່ມທະວີວຽກງານພົວພັນການຮ່ວມມືແບບພິເສດ ລາວ-ຫວຽດ ເວົ້າສະເພາະ ວຽກງານຕ້ານອາຊະຍາກໍາຢູ່ລຽບຕາມຊາຍແດນຂອງສອງປະເທດ; ພ້ອມນີ້, ຍັງເປັນການເສີມຂະຫຍາຍສາຍພົວພັນຮ່ວມມືແບບພິເສດຮອບດ້ານຂອງສອງພັກ, ສອງລັດ, ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານ ໃຫ້ຈະເລີນງອກງາມຍິ່ງໆຂຶ້ນ.
