ກອງປະຊຸມໃຫຍ່ຜູ້ແທນອົງຄະນະພັກກົມຄຸມຄອງສໍາມະໂນຄົວ ແລະ ກໍ່ສ້າງຮາກຖານ ຄັ້ງທີ III ກະຊວງ ປກສ ໄດ້ຈັດຂຶ້ນໃນວັນທີ 26 ທັນວາ 2024, ເປັນປະທານໂດຍ ສະຫາຍ ພົຈວ ແກ່ນຈັນ ພົມມະຈັກ ຄະນະພັກກະຊວງ ເລຂາຄະນະພັກ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ໂດຍການເຂົ້າຮ່ວມຂອງ ສະຫາຍ ພົທ ຄໍາກິ່ງ ຜຸຍຫຼ້າມະນີວົງ ຄະນະປະຈໍາພັກກະຊວງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ, ມີແຂກຮັບເຊີນ, ຄະນະຮັບຜິດຊອບຊຸກຍູ້ກອງປະຊຸມໃຫຍ່ຂັ້ນກະຊວງ ພ້ອມດ້ວຍຜູ້ແທນສົມບູນ ເຂົ້າຮ່ວມ.
ສະຫາຍ ພົຈວ ແກ່ນຈັນ ພົມມະຈັກ ໄດ້ຂຶ້ນຜ່ານບົດລາຍງານການເມືອງ ໃຫ້ຮູ້ວ່າ: ໃນໄລຍະ 5 ປີຜ່ານມາ, ໄດ້ຕັ້ງໜ້າສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ນາຍ ແລະ ພົນຕໍາຫຼວດ ຢ່າງຕໍ່ເນື່ອງດ້ວຍຫຼາຍເນື້ອໃນ, ຫຼາຍວິທີການ, ພ້ອມທັງສຸມໃສ່ສ້າງ, ປັບປຸງບັນດານິຕິກໍາ ແລະ ຄຸ້ມຄອງສໍາມະໂນຄົວ. ໃນຂອບເຂດທົ່ວປະເທດ ມີ 17 ແຂວງ 1 ນະຄອນຫຼວງ, ມີ 145 ເມືອງ, 3 ນະຄອນ, ມີ 8.406 ບ້ານ, ມີ 1.362.242 ຫຼັງຄາເຮືອນ, ມີ 1.419.436 ຄອບຄົວ, ມີຈໍານວນພົນທັງໝົດ 7.382.618 ຄົນ ຍິງ 3.725.192 ຄົນ, ໄດ້ຈົດທະບຽນສໍາມະໂນຄົວສໍາເລັດໂດຍພື້ນຖານ; ວຽກງານຄຸ້ມຄອງຄົນຕ່າງດ້າວມີ 5.219 ຄອບຄົວ, ມີຈໍານວນພົນ 12.214 ຄົນ ຍິງ 5.612 ຄົນ; ວຽກງານອອກບັດປະຈໍາຕົວລາວ ຈໍານວນ 556.581 ບັດ ຍິງ 296.087 ບັດ, ບັດປະຈໍາຕົວຕ່າງດ້າວ ຈໍານວນ 3.977 ບັດ ຍິງ 1.795 ບັດ, ໄດ້ຮັບເອກະສານຜະລິດຕາປະທັບທັງໝົດ 5.720 ສະບັບ, ມີຕາປະທັບ 60.341 ໜ່ວຍ, ຂຶ້ນທະບຽນຕາປະທັບໄດ້ທັງໝົດ 4.764 ສະບັບ, ມີຕາປະທັບ 57.188 ໜ່ວຍ, ຮັບເອກະສານ ແລະ ອອກບັດຖືອາວຸດປືນເສິກໄດ້ທັງໝົດ ຈໍານວນ 3.092 ບັດ, ລົງຊຸກຍູ້ຕິດຕາມ, ກວດກາ, ການຜະລິດຕາປະທັບວິສາຫະກິດຢູ່ບັນດາ ປກສ ແຂວງ ໃນຂອບເຂດທົ່ວປະເທດໄດ້ທົງໝົດ 6.267 ຫົວໜ່ວຍ, ມີຕາປະທັບ 16.364 ໜ່ວຍ.
ພ້ອມນີ້, ຍັງໄດ້ເອົາໃຈໃສ່ກໍ່ສ້າງພັກຕາມ 5 ຫຼັກການ 3 ທິດນໍາ, ຮັບປະກັນໄດ້ 3 ລັກສະນະ, ຜ່ານການຕີລາຄາປະເພດສະມາຊິກພັກເຫັນວ່າມີສະມາຊິກພັກແຂງ 641 ສະຫາຍ ຍິງ 77 ສະຫາຍ, ກວມເອົາ 98,76% ຂອງສະມາຊິກພັກທັງໝົດ, ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໄດ້ 20 ໜ່ວຍ, ເທົ່າກັບ 90,90%. ປັດຈຸບັນ, ມີສະມາຊິກພັກທັງໝົດ 680 ສະຫາຍ ຍິງ 77 ສະຫາຍ, ສະມາຊິກພັກສໍາຮອງ 71 ສະຫາຍ ຍິງ 3 ສະຫາຍ; 5 ປີຜ່ານມາ, ຂະຫຍາຍສະມາຊິກພັກໃໝ່ໄດ້ 206 ສະຫາຍ ຍິງ 13 ສະຫາຍ, ໄດ້ປັບປຸງກົງຈັກການຈັດຕັ້ງ, ຊັບຊ້ອນ 4 ສະຫາຍ, ບົ່ງຕົວແຕ່ງຕັ້ງ 2 ສະຫາຍ, ໄດ້ຍຸບ-ໂຮມໜ່ວຍພັກຮາກຖານ 2 ໜ່ວຍ, ນໍາພາດໍາເນີນກອງປະຊຸມໃຫຍ່ຂັ້ນໜ່ວຍພັກຮາກຖານສໍາເລັດ 22 ໜ່ວຍ.
ໃນກອງປະຊຸມ, ໄດ້ປ່ອນບັດຄັດເລືອກເອົາຄະນະພັກກົມຄຸມຄອງສໍາມະໂນຄົວ ແລະ ກໍ່ ສ້າງຮາກຖານ ຊຸດໃໝ່ ເຊິ່ງມີຜູ້ລົງສະໝັກ ຈໍານວນ 13 ສະຫາຍ ເລືອກເອົາ 11 ສະຫາຍ, ຜ່ານການປ່ອນບັດ, ກອງປະຊຸມຄັ້ງປະຖົມມະລຶກເລືອກເອົາ ສະຫາຍ ພົຈວ ແກ່ນຈັນ ພົມມະຈັກ ເປັນເລຂາ, ສະຫາຍ ພັອ ສົມສະນິດ ຈັນທະວົງ ເປັນຮອງເລຂາ, ສະຫາຍ ພັອ ລໍາໄພ ຍົດປະໄພ ເປັນປະທານກວດກາ ແລະ ອີກ 8 ສະຫາຍ ເປັນຄະນະ.
