ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ ໄດ້ຖະ ແຫຼງຜົນສຳເລັດຂອງກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ວ່າ: ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອືີ່ນໆທີີ່ກ່ຽວຂ້ອງໄດ້ຈັດຂຶ້ນໃນລະຫວ່າງ ວັນທີ 27-29 ສິງຫາ 2024 ທີີ່ ນະຄອນຫຼວງວຽງຈັນ ສປປ ລາວ.
ກອງປະຊຸມຄັ້ງນີ້ ປະກອບມີ 2 ລະດັບ ຄື: ກອງປະຊຸມເຈົ້າລະດັບໜ້າທີ່ອາວຸໂສ ເພື່ອກະ ກຽມໃຫ້ແກ່ກອງປະຊຸມລັດຖະ ມົນຕີ ແລະ ກອງປະຊຸມລະດັບລັດຖະມົນຕີປະກອບ ຄື: ກອງປະຊຸມຄົບຄະນະລັດຖະມົນຕີອາຊຽນ, ກອງປະຊຸມລັດຖະ ມົນຕີອາຊຽນ ບວກສາມ, ບວກຈີນ, ບວກຍີີ່ປຸ່ນ ແລະ ເກົາຫຼີ ໂດຍມີບັນດາຄະນະຜູ້ແທນຈາກບັນດາປະເທດສະມາ ຊິກອາຊຽນ, ປະເທດສັງເກດການ, ກອງເລຂາອາຊຽນ ແລະ ປະເທດຄູ່ຮ່ວມເຈລະຈາ ຈຳ ນວນ 250 ກ່ວາທ່ານເຂົ້າຮ່ວມ.
ກອງປະຊຸມໄດ້ແລກປ່ຽນທັດສະນະກ່ຽວກັບ ສະພາບອາຊະຍາກຳ ແລະ ບົດຮຽນໃນການຕ້ານອາຊະຍາກຳຂ້າມຊາດລະ ຫວ່າງປະເທດສະມາຊິກອາຊຽນດ້ວຍກັນ ກໍຄືລະຫວ່າງ ອາຊຽນ ກັບປະເທດຄູ່ເຈລະຈາ; ທົບທວນຄືນ ການຈັດຕັ້ງປະຕິບັດບັນດາແຜນງານ, ໂຄງ ການ, ຂໍ້ຕົກລົງຕ່າງໆຂອງກອງປະຊຸມຄັ້ງທີ່ຜ່ານມາ; ພິຈາລະນາຮັບຮອງເອົາບັນດາເອກະສານຕ່າງໆທີ່ເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານ ການຕ້ານອາຊະຍາກຳຂ້າມຊາດໃນຕໍ່ໜ້າ.
ກອງປະຊຸມໄດ້ຮັບຟັງການລາຍງານກ່ຽວກັບສະພາບການທີ່ພົ້ນເດັ່ນ ແລະ ຜົນສໍາເລັດຂອງກອງປະຊຸມທີ່ຂຶ້ນກັບກົນໄກກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ; ກອງປະຊຸມເຫັນວ່າບັນຫາອາຊະຍາກຳຂ້າມຊາດ ເປັນຕົ້ນແມ່ນການຄ້າຂາຍຢາເສບຕິດ, ການຄ້າມະນຸດ, ການຄ້າອາວຸດ, ອາຊະຍາກຳທາງຄອມພິວເຕີ ແລະ ອື່ນໆ ຍັງສືບຕໍ່ເພີ່ມຂຶ້ນ ແລະ ເປັນໄພຂົ່ມຂູ່ຕໍ່ຄວາມສະຫງົບປອດໄພໃນພາກພື້ນອາຊຽນ; ກອງປະຊຸມເຫັນໄດ້ເຖິງຄວາມຈຳເປັນໃນການເພີ່ມທະວີການຮ່ວມມື, ຊ່ວຍເຫຼືອເຊິ່ງກັນ ແລະ ກັນ, ການແລກປ່ຽນຂໍ້ມູນກ່ຽວກັບບັນຫາອາຊະຍາກຳ ເພື່ອປ້ອງກັນ ແລະ ສະກັດກັ້ນບັນຫາດັ່ງກ່າວ.
ພິເສດ, ກອງປະຊຸມໄດ້ຮັບຮອງເອົາຫຼາຍເອກະສານທີ່ຈໍາເປັນສໍາລັບການຮ່ວມມືໃນຕໍ່ໜ້າ, ໃນນັ້ນ ມີເອກະສານກ່ຽວກັບການສ້າງຕັ້ງກອງປະຊຸມໜ່ວຍງານວິຊາການວ່າດ້ວຍການຕ້ານການລັກລອບນໍາ ຄົນເຂົ້າ-ອອກເມືອງ ແລະ ເອກະສານບຸລິມະສິດຂອງປະທານກອງປະຊຸມ ປີ 2024 ຈຳນວນ 6 ສະບັບ ຄື:
1. ຖະແຫຼງການວຽງຈັນ ວ່າດ້ວຍການເພີ່ມທະວີການຮ່ວມມືປະຕິບັດກົດໝາຍຕ້ານການ ຫຼອກລວງຈ້າງງານທາງອອນລາຍ;
2. ລະບຽບການ ວ່າດ້ວຍການປະສານງານທີ່ມີປະສິດທິພາບຂອງຈຸດປະສານງານກອງປະ ຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ;
3. ລະບຽບການປະຕິບັດ ແລະ ພິທີການສໍາລັບກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ;
4. ເອກະສານໂຄງຮ່າງບົດສະເໜີໂຄງການ ສໍາລັບການຈັດຕັ້ງປະຕິບັດຂໍ້ລິເລີ່ມ ພາຍໃຕ້ ກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ແລະ ກົນໄກທີ່ຂຶ້ນກັບ;
5. ເອກະສານພາລະບົດບາດຂອງກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາ ຊະຍາກຳຂ້າມຊາດ;
6. ຖະແຫຼງການຜູ້ນໍາອາຊຽນ ວ່າດ້ວຍການເພີ່ມທະວີການຮ່ວມມືຕ້ານການລັກລອບຄ້າຂາຍຢາເສບຕິດ ແລະ ສານເຄມີຕົ້ນ, ເອກະສານສະບັບນີ້ ຈະໄດ້ສືບຕໍ່ນໍາສະເໜີຮັບຮອງໃນ ກອງປະຊຸມສຸດຍອດອາຊຽນ ໃນເດືອນ ຕຸລາ 2024 ນີ້.
ການດໍາເນີນກອງປະຊຸມ ໄດ້ປ່ຽມລົ້ນໄປດ້ວຍຄວາມສາມັກຄີກົມກຽວຂອງຄະນະຜູ້ແທນ, ຜ່ານການກະກຽມ ແລະ ຈັດກອງປະຊຸມສາມາດບັນລຸຄາດໝາຍ. ໃນນີ້, ກໍາລັງປ້ອງກັນຄວາມສະຫງົບປະຊາຊົນລາວໄດ້ຮຽນຮູ້ ແລະ ເກັບກຳບົດຮຽນຕົວຈິງທາງດ້ານວິຊາການຈາກບັນດາປະເທດສະມາຊິກອາຊຽນ, ຜົນສໍາເລັດດັ່ງກ່າວໄດ້ສະແດງໃຫ້ເຫັນເຖິງຄວາມພະຍາຍາມຂອງບັນດາທ່ານລັດຖະມົນຕີ, ຫົວໜ້າຄະນະຜູ້ແທນປະເທດສະມາຊິກອາຊຽນທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດ ລວມທັງການມີສ່ວນຮ່ວມ ຂອງບັນດາຄູ່ເຈລະຈາ ແລະ ຜູ້ສັງເກດການທີ່ເຂົ້າຮ່ວມໃນກອງປະຊຸມຄັ້ງນີ້.
