ໃນວັນທີ 29 ສິງຫາ 2024, ພາຍຫຼັງສຳເລັດການດຳເນີນກອງປະຊຸມໄດ້ມີພິທີມອບຮັບໜ້າ ທີ່ໃນການເປັນປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດໃນ ຄັ້ງທີ 19 ທີ່ປະເທດມາເລເຊຍ ຈະເປັນເຈົ້າພາບ ໂດຍການກ່າວມອບ ຂອງ ທ່ານ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກ່າວຮັບໂດຍ ທ່ານ ດາຕຸກ ເຊີຣີ ໄຊຟູດິນ ນາຊູຕີຢອນ ບິນ ອິດສະມາອິວ ລັດຖະມົນຕີກະຊວງພາຍໃນປະເທດມາເລເຊຍ.
ທ່ານ ພົນເອກ ວິໄລ ຫຼ້າຄໍາຟອງ ກ່າວສະແດງຄວາມຮູ້ສຶກເປັນກຽດ ແລະ ພາກພູມໃຈ ຢ່າງຍິ່ງທີ່ ສປປ ລາວ ໄດ້ເປັນເຈົ້າພາບ ແລະ ປະທານກອງປະຊຸມລະດັບລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ກໍຄືກອງປະຊຸມຂອງເຈົ້າໜ້າທີ່ອາວຸໂສ ແລະ ກອງປະຊຸມໜ່ວຍງານວິຊາການທີ່ກ່ຽວຂ້ອງ ໃນປີ 2024 ນີ້, ຜ່ານການປະຕິບັດໜ້າ ທີ່ປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມທີ່ກ່ຽວຂ້ອງ ສາມາດຍາດໄດ້ຜົນສໍາເລັດຫຼາຍດ້ານ, ນໍາຜົນປະໂຫຍດຕົວຈິງມາສູ່ບັນດາປະເທດ ສະມາຊິກອາຊຽນ ແລະ ເຊື່ອໝັ້ນວ່າ ພາຍໃຕ້ການເປັນປະທານຂອງປະເທດມາເລເຊຍ, ກອງປະຊຸມອາຊຽນ ລະດັບຕ່າງໆ ຈະສາມາດຍົກສູງບົດບາດຂອງຕົນໃນການຕ້ານອາຊະຍາກຳຂ້າມຊາດ ເປັນການປະກອບສ່ວນເຂົ້າໃນການຮັກສາຄວາມສະຫງົບປອດໄພ ສ້າງເງື່ອນໄຂອຳນວຍຄວາມສະດວກໃຫ້ແກ່ການພັດທະນາປະເທດຊາດ ຍົກລະດັບຊີວິດການເປັນຢູ່ຂອງປະຊາຊົນ ໃນພາກພື້ນອາຊຽນໃຫ້ນັບມື້ດີຂຶ້ນ.
ທ່ານ ດາຕຸກ ເຊີຣີ ໄຊຟູດິນ ນາຊູຕີຢອນ ບິນ ອິດສະມາອິວ ລັດຖະມົນຕີກະຊວງພາຍໃນ ປະເທດມາເລເຊຍ ໄດ້ກ່າວຮັບໜ້າທີ່ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ກັບ ສປປ ລາວ ທີ່ໄດ້ເອົາໃຈໃສ່ ແລະ ສຸມທຸກກໍາລັງແຮງ ເຂົ້າໃນການກະກຽມ ແລະ ດໍາເນີນກອງປະຊຸມລັດຖະມົນ ຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດຄັ້ງທີ 18 ເຮັດໃຫ້ກອງປະຊຸມດັ່ງກ່າວມີຜົນສໍາເລັດຢ່າງຈົບງາມ, ເຊື່ອໝັ້ນວ່າ ຜ່ານກອງປະຊຸມຄັ້ງນີ້ ຈະເຮັດໃຫ້ວຽກງານການຮ່ວມມືລະຫວ່າງບັນດາປະເທດອາຊຽນ ແລະ ລະຫວ່າງອາຊຽນ ກັບຄູ່ຮ່ວມເຈລະຈາ ໃນການຕ້ານອາຊະຍາກໍາຂ້າມຊາດ ມີບາດກ້າວທີ່ດີຂື້ນ. ພ້ອມນີ້,ທ່ານຍັງໄດ້ຢືນຢັນວ່າ ປະເທດມາເລເຊຍ ຈະສຸມໃສ່ຢ່າງຮອບດ້ານຕໍ່ກັບການເປັນປະທານກອງປະຊຸມລັດຖະມົນຕີອາຊຽນວ່າ ດ້ວຍການຕ້ານອາຊະຍາກໍາຂ້າມຊາດ ຄັ້ງທີ 19 ທີ່ ໃຫ້ມີຜົນສໍາເລັດເປັນຢ່າງດີ.
