ໃນວັນທີ 22 ພະຈິກ 2024ນີ້, ທີ່ ກະຊວງປ້ອງກັນປະເທດ, ພົນເອກ ຈັນສະໜອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ຕ້ອນຮັບ ພົນເຮືອເອກ ຕົ້ງຈຸນ ລັດຖະ ມົນຕີກະຊວງປ້ອງກັນປະເທດ ແຫ່ງ ສປ ຈີນ ພ້ອມດ້ວຍ ຄະນະຜູ້ແທນການທະຫານຂັ້ນສູງ.
ໃນໂອກາດເດີນທາງມາເຂົ້າຮ່ວມກອງປະຊຸມ ລັດຖະມົນຕີປ້ອງ ກັນປະເທດອາຊຽນ ຄັ້ງທີ 18 ແລະ ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ຄັ້ງທີ 11 ແລະ ຢ້ຽມຢາມ ສປປ ລາວ ຢ່າງເປັນທາງການໃນລະຫວ່າງ ວັນທີ 22-24 ພະຈິກ 2024.
ພິທີຕ້ອນຮັບທາງການໄດ້ຈັດຂຶ້ນຢ່າງສົມກຽດທີ່ກະຊວງປ້ອງກັນປະເທດ. ຈາກນັ້ນ, ໄດ້ມີການພົບປະສອງຝ່າຍ ເຊິ່ງທັງ ສອງ ກອງ ທັບ ລາວ-ຈີນ ໄດ້ແຈ້ງສະພາບການໃຫ້ກັນຊາບກ່ຽວ ກັບບັນຫາທາງດ້ານການເມືອງ, ເສດຖະກິດ-ສັງຄົມຂອງສອງປະເທດ ໂດຍສະເພາະດ້ານວຽກງານປ້ອງກັນຊາດທີ່ຕ່າງຝ່າຍມີຄວາມສົນໃຈ ແລະ ໄດ້ທົບທວນຄືນການຮ່ວມມືລະຫວ່າງສອງກະຊວງປ້ອງກັນປະເທດ ລາວ-ຈີນ, ຈີນ-ລາວ ໃນໄລຍະຜ່ານມາ ແລະ ທິດທາງແຜນການຮ່ວມມືໃນຕໍ່ໜ້າ, ປຶກສາຫາລືການສະ ກັດກັ້ນການກໍ່ການຮ້າຍ, ອາດສະຍາກໍາຂ້າມຊາດ ແລະ ອື່ນໆ, ແນໃສ່ເສີມຂະຫຍາຍການຮ່ວມມືດ້ານການທະຫານ ລະຫວ່າງສອງກະຊວງປ້ອງກັນປະ ເທດ ລາວ-ຈີນ ໃຫ້ມີຄວາມເຂັ້ມແຂງ ແລະ ຂະຫຍາຍຕົວຢ່າງ ບໍ່ຢຸດຢັ້ງ. ສອງຝ່າຍຍັງໄດ້ລົງນາມແຜນການຮ່ວມມືນຳກັນ ໃນການແລກປ່ຽນຄະນະຜູ້ແທນການທະຫານຂັ້ນສູງ, ການກໍ່ສ້າງບຸກຄະລາກອນ, ປັບປຸງກົນໄກຄົບຖ້ວນວຽກງານການຮ່ວມມືປ້ອງກັນຊາຍ ແດນ, ວຽກງານການເມືອງ ແລະ ວຽກ ງານການແພດ.
ສ່ວນກອງທັບປົດປ່ອຍປະຊາຊົນຈີນ ເຫັນດີຈະສືບຕໍ່ໃຫ້ ການຊ່ວຍເຫຼືອທາງດ້ານອຸປະກອນເຕັກນິກການທະຫານ, ດ້ານການແພດ, ວຽກງານກໍ່ສ້າງນາຍທະຫານຢູ່ວິທະຍາຄານຕ່າງໆ ແກ່ກອງທັບປະຊາຊົນລາວ, ສືບຕໍ່ແລກປ່ຽນບົດຮຽນໃນຂົງເຂດວຽກງານຊາຍ ແດນ, ເສດຖະກິດ-ການຄ້າ ແລະ ອື່ນໆ ທີ່ທັງສອງຝ່າຍໄດ້ມີການຮ່ວມມືກັນ.
ໂອກາດນີ້, ພົນເອກ ຈັນສະ ໝອນ ຈັນຍາລາດ ໄດ້ສະແດງຄວາມຍິນດີຕ້ອນຮັບ ແລະ ຕີລາ ຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງ ສະຫາຍ ພົນເຮືອເອກ ຕົ້ງຈຸນ ພ້ອມຄະນະຜູ້ແທນການທະຫານຂັ້ນສູງ ສປ ຈີນ, ເຊິ່ງເປັນການເສີມສ້າງ ແລະ ຂະຫຍາຍສາຍພົວພັນການຮ່ວມມືທີ່ດີລະຫວ່າງສອງກອງທັບ, ກໍຄື ປະຊາຊົນສອງຊາດ ລາວ-ຈີນ, ຈີນ-ລາວ ໃຫ້ໄດ້ຮັບການເພີ່ມພູນຄູນສ້າງ ແລະ ຂະຫຍາຍຕົວ ຂຶ້ນເລື້ອຍໆ ທັງທາງກວ້າງ ແລະ ທາງເລິກ ພ້ອມທັງ ສະແດງຄວາມຂອບໃຈຕໍ່ລັດຖະ ບານ ກໍຄື ກະຊວງປ້ອງກັນປະເທດ ແຫ່ງ ສປ ຈີນ ທີ່ໃຫ້ການສະໜັບ ສະໜູນ, ຊ່ວຍເຫຼືອແກ່ກອງທັບປະຊາຊົນລາວ ໃນຫຼາຍຂົງເຂດວຽກງານ ເວົ້າລວມ, ເວົ້າສະເພາະ ປະກອບສ່ວນຊ່ວຍເຫຼືອດ້ານພາຫະນະອຸປະກອນເຕັກນິກ ໃນການເປັນປະທານອາຊຽນ ຂອງ ສປປ ລາວ ກໍຄື ກອງປະຊຸມລັດຖະມົນຕີປ້ອງກັນປະເທດ ອາ ຊຽນ ຄັ້ງທີ 18 ແລະ ຕີລາຄາສູງຕໍ່ຜົນສຳເລັດຂອງການເຝິກຊ້ອມຮ່ວມສອງກອງທັບລາວ-ຈີນ “ຂະບວນລົດໄຟສັນຕິພາບ 2024 ເພື່ອຊ່ວຍເຫຼືອມະນຸດສະທຳ ແລະ ການບໍລິການດ້ານການແພດແມ່ນໄດ້ຮັບຜົນສຳເລັດຢ່າງຈົບງາມ.
ຈາກນັ້ນ, ລັດຖະມົນຕີກະຊວງປ້ອງກັນປະເທດ ລາວ-ຈີນ ໄດ້ຮ່ວມກັນລົງນາມບົດບັນທຶກເພື່ອສືບຕໍ່ການພົວພັນຮ່ວມມື ວຽກງານໃນຫຼາຍດ້ານ. ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງ ຄະນະຜູ້ແທນການທະຫານຂັ້ນສູງ ສປ ຈີນ ຄັ້ງນີ້ ຍັງໄດ້ໄປຢ້ຽມຢາມໂຮງໝໍສູນກາງ 103 ກອງທັບ, ກອງບັນ ຊາການທະຫານແຂວງຫຼວງພະບາງ ແລະ ທ່ຽວຊົມຕົວເມືອງນະຄອນຫຼວງພະບາງ.
