ເປີດຝຶກອົບຮົມວຽກງານການເມືອງໃຫ້ພົນຕໍາຫຼວດ ທີ່ສໍາເລັດການສຶກສາຈາກ ສສ ຫວຽດນາມ

ກົມກໍ່ສ້າງກໍາລັງ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ເປີດຝຶກອົບຮົມວຽກງານການເມືອງ ງວດທີ II ໃຫ້ພົນຕໍາຫຼວດທີ່ສໍາເລັດການສຶກສາຈາກ ສສ ຫວຽດນາມ ປະຈໍາປີ 2024 ໃນວັນທີ 25 ພະຈິກ 2024 ເຂົ້າຮ່ວມໂດຍ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການເມືອງ ປກສ, ມີຫົວໜ້າ-ຮອງຫົວໜ້າກົມ, ຫ້ອງ, ຄະນະຮັບຜິດຊອບບັ້ນຝຶກອົບຮົມ, ນາຍຕຳຫຼວດທີ່ສຳເລັດການສຶກສາ ຈາກ ສສ ຫວຽດນາມ ແລະ ແຂກຮັບເຊີນເຂົ້າຮ່ວມ.

ພົຕ ປອ ສຸວັນນີ ສີສຸພາບມີໄຊ ກ່າວວ່າ: ການຝຶກອົບຮົມວຽກງານການເມືອງໃນຄັ້ງນີ້ແມ່ນສຸດທີ່ມີຄວາມໝາຍສໍາຄັນ ເພື່ອແນໃສ່ໃຫ້ບັນດາສະຫາຍມີຄຸນທາດການເມືອງທີ່ໜັກແໜ້ນ, ເຊື່ອໝັ້ນການນໍາພາຂອງພັກ-ລັດ ແລະ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ, ເຊື່ອມຊຶມເອກະສານກ່ຽວກັບວຽກງານ ພັກ-ວຽກງານການເມືອງ ແລະ ນິຕິກຳຕ່າງໆ, ກົດໝາຍວ່າດ້ວຍກໍາລັງປ້ອງກັນຄວາມສະຫງົບ ປະຊາຊົນ, ຂໍ້ກໍານົດວ່າດ້ວຍລະບຽບວິໄນ ຂອງກໍາລັງປ້ອງກັນຄວາມສະຫງົບ ແລະ ບັນດາຂໍ້ຫ້າມ ຕ່າງໆ. ພ້ອມດຽວ ກັນນັ້ນ ກໍເພື່ອເຮັດໃຫ້ນັກສຶກສາ ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມເຂັ້ມ ງວດໃນການປະຕິບັດໜ້າທີ່ວຽກງານກໍ່ຄືລະບຽບວິໄນຂອງກຳລັງປ້ອງກັນຄວາມສະຫງົບ ແລະ ມີ ແບບແຜນທີ່ທັນສະໄໝ, ຮູ້ໝູນໃຊ້ບັນດາຄວາມຮູ້, ຄວາມສາມາດທາງດ້ານວິຊາສະເພາະທີ່ໄດ້ສຶກ ສາຮໍ່າຮຽນມາໝູນໃຊ້ໃຫ້ຖືກຕ້ອງສອດຄ່ອງກັບລະບຽບກົດໝາຍ ແລະ ສະພາບຄວາມເປັນຈິງຂອງສັງຄົມ.

ນັກສຶກສາທີ່ຈົບວິຊາສະເພາະລະດັບປະລິນຍາຕີ ຂະແໜງການ ຕ່າງໆມາຈາກ ສສ ຫວຽດນາມ ໃນຄັ້ງນີ້ທັງໝົດ 121 ສະຫາຍ ຍິງ 48 ສະຫາຍ; ໃນນີ້ ຈົບຈາກວິທະຍາຄານຕໍາຫຼວດປະຊາຊົນ 51 ສະຫາຍ ຍິງ 18 ສະຫາຍ, ຈົບຈາກວິທະຍາຄານການເມືອງ ປກສ 20 ສະຫາຍ ຍິງ 8 ສະຫາຍ ແລະ ຈົບຈາກວິທະຍາຄານສັນຕິບານປະຊາຊົນ 50 ສະຫາຍ ຍິງ 22 ສະຫາຍ.