ກອງປະຊຸມລັດຖະມົນຕີອາຊຽນ + ຍິ່ປຸ່ນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 9 ໄດ້ຈັດຂຶ້ນໃນວັນທີ 29 ສິງຫາ 2024 ທີ່ນະຄອນຫຼວງວຽງຈັນ, ທັງສອງຝ່າຍໄດ້ຕີລາຢ່າງຮອບດ້ານຕໍ່ກັບຜົນສໍາເລັດໃນການຮ່ວມມືຂອງອາຊຽນ ແລະ ຍິ່ປຸ່ນ ໃນການຕ້ານອາຊະຍາກໍາຂ້າມຊາດ.
ກອງປະຊຸມພາຍໃຕ້ການເປັນປະທານຮ່ວມຂອງ ທ່ານ ນາງ ຊູນ ຊື້ລິງ ລັດຖະມົນຕີກະຊວງພາຍໃນ ແລະ ກະຊວງພັດທະນາສັງຄົມ ແລະ ຄອບຄົວ ແຫ່ງ ສາທາລະນະລັດ ສິງກະໂປ ແລະ ທ່ານ ຄູຊູໂນກິ ໂຢຊິໂນບຸ ຮອງຜູ້ບັນຊາການສູງສຸດ ຕໍາຫຼວດແຫ່ງຊາດ ຍິ່ປຸ່່ນ, ໂດຍການເຂົ້າຮ່ວມຂອງທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ມີບັນດາລັດຖະມົນ ຕີປະເທດສະມາຊິກອາຊຽນ ແລະ ຕີມໍເລັດສະເຕ, ພ້ອມດ້ວຍຄະນະຜູ້ແທນທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດ ເຂົ້າ ຮ່ວມ.
ກອງປະຊຸມຄັ້ງນີ້, ຄະນະຜູ້ແທນ ໄດ້ຕີລາຄາຢ່າງຮອບດ້ານຕໍ່ກັບຜົນສໍາເລັດໃນການຮ່ວມມືຂອງອາຊຽນ ແລະ ຍິ່ປຸ່ນ ໃນການຕ້ານອາຊະຍາກໍາຂ້າມຊາດ ເພື່ອສ້າງໃຫ້ພາກພື້ນ ແລະ ສາ ກົນ ມີຄວາມສະຫງົບປອດໄພໂດຍພື້ນຖານ. ພ້ອມນັ້ນ, ຍັງໄດ້ຮ່ວມກັນແລກປ່ຽນທັດສະ ນະ ແລະ ໄດ້ປຶກສາຫາລືຫຼາຍບັນຫາ ໂດຍສະເພາະແມ່ນບັນຫາກ່ຽວຂ້ອງກັບການຮ່ວມມືລະ ຫວ່າງ ອາຊຽນ-ຍິ່ປຸ່ນ ໃນການຕ້ານອາຊະຍາກໍາຂ້າມຊາດ. ໃນນັ້ນ, ໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດແຜນງານຂອງອາຊຽນ-ຍິ່ປຸ່ນ ກ່ຽວກັບການຮ່ວມມືເພື່ອຕ້ານອາຊະຍາກໍາຂ້າມຊາດ ໄລຍະຜ່ານມາ, ທັງໝົດນັ້ນ, ສະແດງໃຫ້ເຫັນເຖິງການຮ່ວມ ມືທີ່ແໜ້ນແຟ້ນ ລະຫວ່າງອາຊຽນ ແລະ ຍິ່ປຸ່ນ ໃນການຕ້ານອາຊະຍາກຳຂ້າມຊາດຕະຫຼອດຫຼາຍປີຜ່ານມາທີ່ມີຜົນສໍາເລັດຫຼາຍດ້ານ.
ນອກນັ້ນ, ຍັງໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດຖະມົນຕີອາຊຽນ + ຍິ່ປຸ່ນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 9 ແລະ ບົດລາຍງານຜົນຂອງກອງປະຊຸມໃນຄັ້ງນີ້ຕື່ມອີກ ເພື່ອເປັນພື້ນຖານເຮັດໃຫ້ການຮ່ວມມືໃຫ້ມີຄວາມເລິກເຊິ່ງ, ກວ້າງ ຂວາງ ແລະ ມີຜົນສໍາເລັດຕາມຄາດໝາຍ.
