ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປຶກສາຫາລື ແລະ ມອບໝາຍໜ້າທີ່ ປະເມີນຜົນ 4 ຄາດໝາຍ 4 ແຜນງານ 41 ໂຄງການ, ເປັນປະທານໂດຍ ພົທ ກົງທອງ ພົງວິຈິດ ກໍາມະການສູນກາງພັກ ຮອງລັດຖະມົນຕີ ກະຊວງ ປກສ, ມີຄະນະປະຈໍາພັກ, ຄະນະພັກກະຊວງ, ຫົວໜ້າ, ຮອງຫົວໜ້າກົມໃຫຍ່, ຫ້ອງວ່າການ, ກອງບັນຊາການ, ວິທະຍາຄານ ພ້ອມດ້ວຍພະນັກງານ-ຫຼັກແຫຼ່ງທີ່ກ່ຽວຂ້ອງ ກົມກອງອ້ອມຂ້າງກະຊວງ ເຂົ້າຮ່ວມ ໃນວັນທີ 20 ພະຈິກ 2024.
ກອງປະຊຸມຄັ້ງນີ້ ສຸດທີ່ມີຄວາມໝາຍ, ຄວາມສໍາຄັນ ເຊິ່ງຈັດຂຶ້ນເພື່ອໃຫ້ບັນດາທ່ານໃນຄະນະຮັບຜິດຊອບ ໄດ້ມີການປຶກສາຫາລື, ເອກະພາບດ້ານໂຄງຮ່າງໃນການສະຫຼຸບປະເມີນຜົນ 4 ຄາດໝາຍ 4 ແຜນງານ 41 ໂຄງການ, ພ້ອມທັງເປັນການມອບໝາຍໜ້າທີ່ ໃຫ້ແຕ່ລະອະນຸກຳມະການ ນໍາໄປຈັດຕັ້ງປະຕິບັດໃຫ້ສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ພ້ອມນີ້ ຍັງເປັນການກຳນົດແຜນງານ ແລະ ບັນດາໂຄງການຂອງການເຄື່ອນໄຫວວຽກງານປ້ອງກັນຄວາມສະຫງົບ ໃນແຕ່ໄລຍະ ໃຫ້ຮັບປະກັນຮອບດ້ານ, ມີຈຸດສຸມ, ເປັນວຽກອັນລະອຽດ ໃນແຕ່ລະຂົງເຂດວຽກງານ ເພື່ອກ້າວສູ່ບາດລ້ຽວໃໝ່ ຂອງການພັດທະນາວຽກງານປ້ອງກັນຄວາມສະຫງົບ ຕາມຈຸດໝາຍ, ຄາດໝາຍຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບ ຮ້ອຍປອດໄພທາງສັງຄົມ ໃຫ້ໜັກແໜ້ນ, ເຂັ້ມແຂງ; ເປັນການຍົກສູງຄວາມສາມາດນໍາພາ, ບັນຊາກໍາລັງປ້ອງກັນຄວາມສະຫງົບ ໃນໄລຍະໃໝ່.
ໂອກາດນີ້, ໃນກອງປະຊຸມ ຍັງໄດ້ຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບ ສະບັບເລກທີ 2945/ປກສ ວ່າດ້ວຍການແຕ່ງ ຕັ້ງຄະນະຮັບຜິດຊອບຈັດຕັ້ງປະເມີນ 4 ແຜນງານ 41 ໂຄງການ ເພື່ອເປັນການຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດບັນດາແຜນງານ, ໂຄງການ ແລະ ກິດຈະກຳທີ່ກະຊວງວາງອອກ ຕະຫຼອດໄລຍະ 1 ສະໄໝຜ່ານມາ (2021-2025) ມີດ້ານດີຜົນໄດ້ຮັບ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຄືແນວໃດ, ເນື້ອໃນຂອງການສະຫຼຸບດັ່ງກ່າວຈະເປັນເນື້ອໃນພື້ນຖານປະກອບໃສ່ຮ່າງລາຍງານການເມືອງ ຂອງກອງປະຊຸມໃຫຍ່ຜູ້ແທນ ອົງຄະນະພັກ ກະຊວງ ປກສ ສະໄໝທີ VI ທີ່ຈະໄຂຂຶ້ນໃນກາງປີ 2025.
