ກອງບັນຊາການ ປກສ ແຂວງສາລະວັນ ໄດ້ຈັດກອງປະຊຸມປຶກສາຫາລືກ່ຽວກັບການວາງແຜນປ້ອງກັນງານມະຫາກໍາກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 7 ທີ່ແຂວງສາລະວັນ ເປັນເຈົ້າພາບ ເມື່ອບໍ່ດົນມານີ້ ໂດຍພາຍໃຕ້ການເປັນປະທານຂອງ ທ່ານ ພົຈວ ສີເສີດ ສອນດາລາ ຫົວໜ້າກອງບັນຊາການ ປກສ ແຂວງ.
ກອງປະຊຸມໄດ້ປຶກສາຫາລື ແລະ ປະກອບຄໍາຄິດຄຳເຫັນຢ່າງກົງໄປກົງມາ ເປັນຕົ້ນແມ່ນ ການປ້ອງກັນບໍລິເວນຍຸດທະສາດ, ການປ້ອງກັນແຂກ, ປ້ອງກັນການນໍາ, ຄູຝືກ ແລະ ນັກກິລາ ຢູ່ບ່ອນທີ່ມີຈຸດພັກເຊົາ, ເຮືອນພັກ, ໂຮງແຮມ ຕະຫຼອດຮອດບໍລິເວນອື່ນໆໃນເທດສະບານແຂວງ ແລະ ເມືອງ. ໃນນັ້ນໄດ້ເນັ້ນໃສ່ວຽກງານຕໍາຫຼວດ, ວຽກງານເຄື່ອນທີ່, ວຽກງານສັນຕິບານ, ວຽກງານ 504 ແລະ ກອງຮາກຖານປະຈໍາພື້ນທີ່ໃຫ້ມີການປະສານງານຢ່າງໜັກແໜ້ນລະຫວ່າງເມືອງ ແລະ ແຂວງ, ຫ້ອງ ການບໍລິການປະຊາຊົນ, ກໍາລັງ ປກສ ເຄິ່ງອາຊີບ ໂດຍດ່ວນທັນ ເວລາ ເປັນຕົ້ນແມ່ນ ການປ້ອງກັນສະກັດກັ້ນ ກຸ່ມຂີ້ລັກງັດແງະ, ຂີ່ລົດກວນເມືອງ, ກໍອາລະວາດຕີກັນ ແລະ ບັນຫາອື່ນໆໃຫ້ຫຼຸດລົງຢ່າງຂາດຕົວ, ນອກນັ້ນໃຫ້ມີການເຄື່ອນໃຫວກວດກາສະໜາມກິລາທີ່ຕັ້ງຢູ່ບ້ານນາໂຄກ ກ່ຽວກັບການວາງແຜນ, ວາງກໍາລັງປ້ອງກັນເຂົ້າໃສ່ແຕ່ລະຈຸດແຕ່ລະຟື້ນທີ່ໃຫ້ພຽງພໍ.
