ກອງປະຊຸມລັດຖະມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11 ໄດ້ຈັດໃນວັນທີ 29 ສິງຫາ 2024 ທີ່ນະຄອນຫຼວງວຽງຈັນ, ພາຍໃຕ້ການເປັນປະ ທານຮ່ວມຂອງ ທ່ານ ດາຕຸກ ເຊີຣີ ໄຊຟູດິນ ນາຊູຕີຢອນ ບິນ ອິສະມາອິວລັດຖະມົນຕີກະຊວງພາຍໃນ ແຫ່ງມາເລເຊຍ ແລະ ທ່ານ ລິວ ຊົງອີ່ ຜູ້ຊ່ວຍລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສາທາລະນະລັດ ປະຊາຊົນຈີນ, ທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ມີບັນດາລັດຖະມົນຕີປະເທດສະມາຊິກອາຊຽນ ແລະ ຕີມໍເລັດສະເຕ ຮັບຜິດ ຊອບວຽກງານຕ້ານອາຊະຍາກໍາຂ້າມຊາດ, ພ້ອມດ້ວຍຄະນະຜູ້ແທນເຂົ້າ ຮ່ວມ.
ກອງປະຊຸມຄັ້ງນີ້, ໄດ້ປຶກສາຫາລືຫຼາຍບັນຫາກ່ຽວກັບອາຊະຍາກຳຂ້າມຊາດ ພ້ອມທັງຢັ້ງ ຢືນເຖິງຜົນສໍາເລັດຂອງການຮ່ວມ ມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສປ ຈີນ ເປັນຕົ້ນແມ່ນ ການຮ່ວມມືສະກັດກັ້ນບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງິນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັບລອບນໍາຄົນເຂົ້າ-ອອກເມືອງ.
ຜູ້ແທນທີ່ເຂົ້າຮ່ວມ ໄດ້ແລກປ່ຽນຄໍາຄິດຄໍາເຫັນຢ່າງກົງໄປ-ກົງມາ ແລະ ມີລັກສະນະສ້າງ ສັນ ເພື່ອເຮັດໃຫ້ການພົວພັນຮ່ວມມືລະຫວ່າງອາຊຽນ ແລະ ສປ ຈີນ ໃນການສະກັດກັ້ນ ແລະ ຕ້ານອາຊະຍາກໍາຂ້າມຊາດ ໃນຕໍ່ໜ້າມີປະສິດທິພາບສູງຂຶ້ນ. ພ້ອມນີ້, ກອງປະຊຸມ ໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດຖະມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11 ແລະ ບົດລາຍງານຂອງກອງປະຊຸມ ເພື່ອເປັນບ່ອນອີງສໍາຄັນທີ່ຈະເຮັດໃຫ້ການພົວພັນຮ່ວມມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສປ ຈີນ ມີຄວາມແໜ້ນແຟ້ນຂຶ້ນກວ່າເກົ່າ.
