ກອງປະຊຸມໃຫຍ່ ຄັ້ງທີ VII ໜ່ວຍພັກຮາກຖານຫ້ອງການ ກົມໃຫຍ່ຕໍາຫຼວດ
ກອງປະຊຸມໃຫຍ່ ຄັ້ງທີ VII ໜ່ວຍພັກຮາກຖານ ຫ້ອງການ ກົມໃຫຍ່ຕໍາຫຼວດ ກະຊວງ ປກສ ໄດ້ຈັດຂຶ້ນໃນວັນທີ 23 ສິງຫາ 2024 ເປັນປະທານໂດຍ ສະຫາຍ ພັອ ສຸກພະຈັນ ບຸດດາຄໍາ ເລຂາໜ່ວຍພັກຮາກຖານ ຫົວໜ້າຫ້ອງການ ກົມໃຫຍ່ຕໍາຫຼວດ, ໂດຍມີ ສະຫາຍ ພົຕ ຄໍາກິ່ງ ຜຸຍຫຼ້າມະນີວົງ ຄະນະປະຈໍາພັກກະຊວງ ເລຂາຄະນະພັກ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງ ປກສ, ມີຄະນະໜ່ວຍພັກຮາກຖານ, ຈຸພັກ, ແຂກຮັບເຊີນ ພ້ອມດ້ວຍສະມາຊິກພັກ ເຂົ້າຮ່ວມ.
ສະຫາຍ ພັອ ສຸກພະຈັນ ບຸດດາຄຳ ກ່າວວ່າ: ໄລຍະ 5 ປີ ຜ່ານມາ, ຄະນະພັກ ຫ້ອງການ ໄດ້ນໍາພາ-ຊີ້ນໍາບັນດາຈຸພັກເຄື່ອນໄຫວເຮັດວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ນາຍ ແລະ ພົນຕໍາຫຼວດ ຢ່າງເປັນປົກກະຕິ, ເຮັດໃຫ້ທຸກສະຫາຍມີຄຸນທາດການເມືອງທີ່ໜັກແໜ້ນ, ມີຄວາມດຸໝັ້ນຫ້າວຫັນພ້ອມກັນເຮັດສໍາເລັດໜ້າທີ່ການເມືອງສະແດງອອກຄື: ໄດ້ສັງລວມຜົນງານຂອງບັນດາພະແນກ ເພື່ອເຮັດບົດສະຫຼຸບປະຈຳອາທິດ, ບົດບັນທຶກສ່ອງແສງ, ບົດສະ ຫຼຸບປະຈໍາເດືອນ, ໄຕມາດ, ບົດສະຫຼຸບ 6 ເດືອນ ແລະ ສະຫຼຸບປີ ຂອງຫ້ອງການ (ວຽກພັກ-ວຽກລັດ) ພ້ອມທັງລາຍງານຂັ້ນເທິງ ຈໍານວນ 268 ສະບັບ, ຮ່າງເອກະສານທາງການ (ເຮັດໜັງສືສະເໜີ, ມະຕິຕົກລົງ, ຂໍ້ຕົກລົງ, ບົດບັນທຶກ, ບົດລາຍງານ, ແຈ້ງການ, ແຈ້ງຕອບ, ສະໂນດນໍາສົ່ງ, ໃບກິດສໍາພັນ) ຂອງຫ້ອງການ ໄດ້ທັງໝົດ 873 ສະບັບ, ຂຶ້ນແຜນ, ສະຫຼຸບຮ່ວງເງິນຕ່າງໆ ແລະ ຮັບ-ເບີກຈ່າຍເງິນເດືອນ, ເງິນນະໂຍບາຍ, ເງິນປະຈໍາການ, ເງິນຮັບແຂກ, ເງິນພະແນກ, ເຄື່ອງອຸປະໂພກ-ບໍລິ ໂພກ ແລະ ອຸປະກອນຮັບໃຊ້ວຽກງານຫ້ອງການ ໄດ້ທັງໝົດ ຈໍານວນ 321 ຄັ້ງ, ຮັບແຂກພາຍໃນ ແລະ ຕ່າງປະເທດ ທີ່ມາພົວພັນວຽກນໍາກົມໃຫຍ່ຕຳຫຼວດ 285 ຄັ້ງ, ສ້າງແຜນປ້ອງກັນ ແລະ ເຂົ້າຮ່ວມປ້ອງກັນກອງປະຊຸມງານສໍາຄັນຕ່າງໆ ຂອງພັກຂອງຊາດໄດ້ ຈໍານວນ 470 ຄັ້ງ, ຄົ້ນຄ້ວາຄໍາຮ້ອງຟ້ອງ, ຄໍາຮ້ອງທຸກ, ຄໍາຮ້ອງຂໍຄວາມເປັນທຳ ແລະ ຄໍາຮ້ອງອື່ນໆ ເພື່ອຂໍຄໍາເຫັນກົມໃຫຍ່ຕຳຫຼວດ ແລ້ວສົ່ງໃຫ້ກົມວິຊາສະເພາະຈັດຕັ້ງປະຕິບັດ ຈໍານວນ 1.489 ເລື່ອງ, ຄົ້ນຄ້ວາບົດລາຍງານຄະດີ, ໜັງສືສະເໜີ ແລະ ເອກະສານຕ່າງໆ ທີ່ມາຈາກກົມ ແລະ ຫ້ອງ ອ້ອມຂ້າງກົມໃຫຍ່ຕຳຫຼວດ ຈໍານວນ 3.441 ເລື່ອງ. ພ້ອມນີ້, ໄດ້ເອົາໃຈໃສ່ເຮັດວຽກງານຂະຫຍາຍພັກ, ໃຫ້ຖືກຕາມກົດລະບຽບຂອງພັກ ຮັບປະກັນທາງປະລິມານ ແລະ ຄຸນນະພາບ ສະແດງອອກ ໄດ້ເປີດຮຽນສະໜັບສະໜູນໃຫ້ມະຫາຊົນຜູ້ກ້າວໜ້າ 5 ຄັ້ງ, ມີ 20 ສະຫາຍ, ໄດ້ເຂົ້າຮຽນລະບຽບຂອງພັກ 9 ສະຫາຍ, ຮັບມະຫາຊົນກ້າວໜ້າ ເຂົ້າເປັນສະມາຊິກພັກສຳຮອງ ຈໍານວນ 12 ສະຫາຍ, ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຈໍານວນ 11 ສະຫາຍ, ຟື້ນຟູພັກຄືນ 1 ສະຫາຍ.
ໃນກອງປະຊຸມ, ຍັງໄດ້ປ່ອນບັດຄັດເລືອກເອົາຄະນະໜ່ວຍພັກຮາກຖານຫ້ອງການກົມໃຫຍ່ຕໍາຫຼວດ ຊຸດໃໝ່ ເຊິ່ງມີຜູ້ລົງສະໝັກ ຈໍານວນ 7 ສະຫາຍ ເລືອກເອົາ 5 ສະຫາຍ, ຜ່ານການປ່ອນບັດເລືອກໄດ້ ສະຫາຍ ພັອ ສຸກພະຈັນ ບຸດດາຄຳ ເປັນເລຂາ, ສະຫາຍ ພັທ ບຸນທ່ຽງ ແສນນະເຂດ ເປັນຮອງເລຂາ, ສະຫາຍ ພັທ ອູຟູ ໄຊຍະຫວາດ ເປັນປະທານກວດກາ, ສະຫາຍ ພັທ ພັນທະໄໝ ອຸປະດີ ແລະ ສະຫາຍ ພັທ ອັກຄະສອນ ແກ້ວກັນລະຍາ ເປັນຄະນະ.
