ວັນທີ 19 ພະຈິກ 2024, ແຂວງ ບໍລິຄຳໄຊ ໄດ້ຈັດກອງປະຊຸມຜັນຂະຫຍາຍການໂອນຖ່າຍສໍາເນົາສໍາມະໂນຄົວ ເປັນເອກະສານຂໍ້ມູນເອເລັກໂຕຣນິກ ໂດຍພາຍໃຕ້ການເປັນປະທານ ຂອງ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ, ມີ ພົຈວ ແກ່ນຈັນ ພົມມະຈັກ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ພົຈວ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ, ມີນາຍ ແລະ ພົນຕຳຫຼວດກ່ຽວຂ້ອງເຂົ້າຮ່ວມ.
ພົຈວ ກົງຈັນ ໄຊປັນຍາ ໄດ້ຜ່ານຂໍ້ຕົກລົງ ຂອງກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງຄະນະຮັບຜິດຊອບ ໂອນຖ່າຍສຳເນົາສໍາມະໂນຄົວ ເປັນເອກະສານຂໍ້ມູນເອເລັກໂຕຣນິກ ແຕ່ວັນທີ 19 ພະຈິກ-01 ທັນວາ 2024, ຂໍ້ຕົກລົງຂອງກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ວ່າດ້ວຍການແບ່ງຄວາມຮັບຜິດຊອບ ໂອນຖ່າຍສຳເນົາສຳມະໂນຄົວ ເປັນເອກະສານຂໍ້ມູນ ເອເລັກໂຕຣນິກ ຂອງໂຄງການກໍ່ສ້າງລະບົບຄຸ້ມຄອງພົນລະເມືອງ ແລະ ບັດປະຈຳຕົວ ເພື່ອຈັດຕັ້ງຜັນຂະຫຍາຍແຜນກໍ່ສ້າງລະບົບຖານຂໍ້ ມູນພົນລະເມືອງ ແລະ ບັດປະຈໍາຕົວໃຫ້ແກ່ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ພະນັກງານ ປກສ ຂັ້ນແຂວງ ປກສ ຂັ້ນເມືອງ ໃນໄລຍະ 3 ປີ 2024 – 2026 ໃຫ້ເປັນຮູບປະທໍາໃນວຽກງານຕົວຈິງ ເຮັດໃຫ້ພະນັກງານ ປກສ ຂັ້ນແຂວງ, ຂັ້ນເມືອງເຂົ້າ ໃຈແຈ້ງໃນການນໍາໃຊ້ລະບົບເຊື່ອມໂຍງຖານຂໍ້ມູນພົນລະເມືອງ ແລະ ບັດປະຈໍາຕົວກັບບັນດາກະຊວງອົງການທຽບເທົ່າກະຊວງທີ່ກ່ຽວຂ້ອງ ແລະ ບັນດາແຂວງ, ສ້າງພື້ນຖານໂຄງລ່າງຂໍ້ມູນຕົ້ນຕໍກ່ຽວກັບທີ່ຢູ່ອາໄສແຕ່ລະຂັ້ນຕອນເພື່ອກ້າວເຂົ້າສູ່ການຫັນເປັນດີຈີຕອນແຫ່ງຊາດ, ນອກຈາກນີ້, ຍັງເປັນບ່ອນອີງໃຫ້ຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງໄດ້ປະກອບສ່ວນເຮັດໃຫ້ການຈັດ ຕັ້ງປະຕິບັດແຜນເກັບກໍາ, ທົດລອງປ່ອນຂໍ້ມູນເຂົ້າໃນລະບົບໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້.
