ກອງປະຊຸມຝຶກອົບຮົມ ເຈົ້າໜ້າທີ່ອາວຸໂສຕຳຫຼວດອາຊຽນ, ກອງເລຂາຕໍາຫຼວດອາຊຽນ ແລະ ພາກສ່ວນທີ່ກ່ຽວຂ້ອງ ທີ່ເຮັດວຽກດ້ວຍຄວາມຮັບຜິດຊອບສູງ ໃນການປະກອບສ່ວນເຮັດໃຫ້ການຝຶກອົບ ຮົມເຈົ້າໜ້າທີ່ອາວຸໂສຕຳຫຼວດອາຊຽນ ຄັ້ັ້ງທີ 31 ມີຜົນສໍາເລັດຕາມລະດັບຄາດໝາຍ ໃນວັນທີ 22 ສິງຫາ 2024 ທີ່ນະຄອນຫຼວງວຽງຈັນ ສປປ ລາວ, ໂດຍການເປັນປະທານຂອງ ພັອ ນາງ ວັນເພັງ ພົມມີໄຊ ຫົວໜ້າກົມຕຳຫຼວດສາກົນ, ໃຫ້ກຽດເຂົ້າຮ່ວມໂດຍ ພົຈວ ກອງສະຫວັດ ບຸນລ້ຽງ ຮອງຫົວ ໜ້າກົມໃຫຍ່ຕຳຫຼວດ, ພັອ ເດວິດ ມາຕີເນັດ ວິນລວນ ຫົວໜ້າກອງເລຂາຕໍາຫຼວດອາຊຽນ, ມີບັນດາຄະນະຜູ້ແທນຝຶກອົບຮົມ ເຈົ້າໜ້າທີ່ອາວຸໂສຕຳຫຼວດອາຊຽນ ເຂົ້າຮ່ວມ.
ພົຈວ ກອງສະຫວັດ ບຸນລ້ຽງ ກ່າວວ່າ: ໃນໄລຍະຝຶກອົບຮົມທີ່ຜ່ານມາ, ບັນດາຄະນະຜູ້ແທນ ໄດ້ແລກປ່ຽນບົດຮຽນກັບຜູ້ຊ່ຽວຊານຈາກພາກສ່ວນຕ່າງໆ ລວມທັງບັນດາປະເທດສະມາຊິກຕໍາຫຼວດອາຊຽນ, ທັງເປັນການແລກປ່ຽນປະສົບການ, ບົດຮຽນທີ່ດີໃນການສະກັດກັ້ນ ແລະ ຕ້ານອາຊະຍາກໍາຂ້າມຊາດທຸກຮູບແບບ ທັງເປັນການຫຼຸດຜ່ອນໄພຂົ່ມຂູ່ທີ່ເປັນຜົນກະທົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ການພັດທະນາເສດຖະກິດ-ສັງຄົມຂອງພາກພື້ນ.
ສິ່ງດັ່ງກ່າວ, ມັນໄດ້ຢັ້ງຢືນເຖິງຄວາມພະຍາຍາມ ເພື່ອສ້າງໃຫ້ພາກພື້ນມີຄວາມສະຫງົບ ແລະ ປອດໄພ; ແຕ່ເຖິງຢ່າງໃດກໍ ຕາມ, ການແກ້ໄຂບັນຫາອາຊະຍາກໍາຂ້າມຊາດ ບໍ່ສາມາດຈະເຮັດໄດ້ພຽງປະເທດໜຶ່ງປະເທດດຽວ ໂດຍຈະຕ້ອງໄດ້ສືບຕໍ່ປະສານງານ, ຮ່ວມມືກັນກັບບັນດາປະເທດໃນພາກພື້ນ ແລະ ໃນໂລກ.
ໃນຖານະທີ່ ສປປ ລາວ ຈັດການຝຶກອົບຮົມ ເຈົ້າໜ້າທີ່ອາວຸໂສຕຳຫຼວດອາຊຽນ ຄັ້ັ້ງທີ 31 ແລະ ຕາງໜ້າໃຫ້ກໍາລັງຕໍາຫຼວດລາວ ຂໍສະແດງຄວາມຂອບໃຈມາຍັງ ບັນດາຕໍາຫຼວດປະເທດສະມາຊິກອາຊຽນ ທີ່ໄດ້ປະກອບສ່ວນເຮັດໃຫ້ການຝຶກອົບຮົມໃນຄັ້ງນີ້ ປະສົບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
ໃນພິທີ, ໄດ້ມອບໃບຢັ້ງຢືນຜົນສຳເລັດການຝຶກອົບຮົມ ເຈົ້າໜ້າທີ່ອາວຸໂສຕຳຫຼວດອາຊຽນ ຄັ້ງທີ 31 ໃຫ້ບັນດາຄະນະຜູ້ແທນທີ່ມາຈາກ 10 ປະເທດອາຊຽນ.
(ຂ່າວ: ບຸນພະຈັນ)
