ໜ່ວຍພັກຫ້ອງເສນາທິການ ກອງບັນຊາການປ້ອງກັນສູນກາງ (ປກ) ຈັັດກອງປະຊຸມໃຫຍ່ ຄັ້ງທີ VIII ໃນທີ 20 ສິງຫາ 2024, ໂດຍການເປັນປະທານຂອງ ສະຫາຍ ພັອ ຄໍາເຜີຍ ຄໍາດີ ຮອງເລຂາຮອງຫົວໜ້າກອງບັນຊາການປ້ອງກັນສູນກາງ, ມີເລຂາ-ຮອງເລຂາໜ່ວຍ, ສະມາຊິກພັກສົມບູນ-ສໍາຮອງ ແລະ ແຂກຖືກເຊີນ ເຂົ້າຮ່ວມ.
ສະຫາຍ ພັທ ສຸລິເດດ ກອງທະວີໄຊ ຄະນະພັກກອງບັນຊາການ ເລຂາໜ່ວຍພັກຫ້ອງເສນາທິການ ໄດ້ລາຍງານໃຫ້ຮູ້ວ່າ: ຕະຫຼອດໄລຍະ 5 ປີຜ່ານມາ, ໄດ້ຖືເອົາການສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ນາຍ ແລະ ພົນຕໍາຫຼວດຢ່າງຕໍ່ເນື່ອງ ຕິດພັນກັບການນໍາພາວຽກວິຊາສະເພາະໃນການປ້ອງກັນການນໍາພັກ-ລັດ, ແຂກຕ່າງປະເທດ, ສໍານັກງານ-ອົງການຕ່າງໆໃຫ້ມີຄວາມສະຫງົບ ແລະ ມີຄວາມປອດໄພ 100%, ເຊິ່ງສະແດງອອກ ຄື:
+ ໄດ້ຈັດກໍາລັງປ້ອງກັນຜູ້ນໍາຂັ້ນສູງຂອງພັກ-ລັດເຄື່ອນໄຫວຢູ່ສູນກາງ-ທ້ອງຖິ່ນ 181 ຄັ້ງ, ປ້ອງກັນຄຸມແຫ່ຮັບ-ສົ່ງຜູ້ນໍາຂັ້ນສູງຂອງພັກ-ລັດ ເຄື່ອນໄຫວຢ້ຽມຢາມຕ່າງປະເທດ 23 ຄັ້ງ, ປ້ອງກັນສະເຫຼີມສະຫຼອງວັນສໍາຄັນຕ່າງໆຂອງຊາດ-ຂອງພັກ 110 ຄັ້ງ,
+ ສ້າງແຜນປ້ອງກັນ, ແຜນບັນຈຸກຳລັງ ແລະ ແຜນງົບປະມານໄດ້ 192 ສະບັບ, ລົງກວດກາສະຖານທີ່ລ່ວງໜ້າ-ພົວພັນປະ ສານສົມທົບ 130 ຄັ້ງ, ລົງກວດກາສະຖານທີ່, ແຕ້ມແຜນວາດສໍານັກງານອົງການທີ່ສໍາຄັນຂອງພັກ-ລັດ ແລະ ສະຖານທີ່ພັກເຊົາຂອງຜູ້ນໍາຂັ້ນສູງ 5 ຄັ້ງ,
+ ຈັດກໍາລັງປ້ອງກັນຄະນະຜູ້ແທນຕ່າງປະເທດທັງໝົດ 112 ຄັ້ງ, ປ້ອງກັນກອງປະຊຸມສາກົນ 66 ຄັ້ງ, ປ້ອງກັນກອງປະຊຸມພາຍໃນ 154 ຄັ້ງ, ຈັດກໍາລັງປ້ອງກັນຄຸມແຫ່ທູດຍື່ນສານຕາຕັ້ງ 30 ຄັ້ງ,
+ ຮັບໂທລະສັບ ແລະ ໂທແຈ້ງວຽກງານຕ່າງໆ 7.831 ຄັ້ງ, ໂທ ແລະ ຮັບໂຟນີ 4.752 ຄັ້ງ, ສົ່ງ ແລະ ຮັບເອກະສານດ້ວຍແຟັກ 383 ສະບັບ,
+ ແຕ່ງບົດປະກອບເຄື່ອງຕິດຕໍ່ສື່ສານປ້ອງກັນ 44 ສະບັບ, ປະຈໍາການ 1.225 ຄັ້ງ, ຂຽນໜັງສືສະເໜີຂໍອຸປະກອນຮັບໃຊ້ວຽກງານສື່ສານ 92 ສະບັບ,
+ ກວດກາສ້ອມແປງໂທລະສັບສັນຍານອິນເຕີເນັດ 27 ຄັ້ງ, ກວດກາສ້ອມແປງກ້ອງວົງຈອນປິດ 18 ຄັ້ງ, ກວດກາແກ້ໄຂເຄື່ອງຈັກໂຟນີ ຢູ່ບັນດາກອງຮ້ອຍຂຶ້ນກັບກອງພັນ 16 ຄັ້ງ.
ພ້ອມນີ້, ຍັງໄດ້ຕັ້ງໜ້າປັບປຸງການຈັດຕັ້ງຕິດພັນກັບ ຂະບວນການກໍ່ສ້າງໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ ດ້ວຍວິທີສຶກສາອົບຮົມ, ໂຄສະນາເຜີຍແຜ່ທີ່ຕັ້ງພາລະບົດບາດ, ຂອບເຂດສິດ, ໜ້າທີ່ ແລະ ແບບແຜນວິທີເຮັດວຽກຂອງໜ່ວຍພັກ ໃຫ້ພະນັກງານ-ສະມາຊິກພັກຢ່າງກວ້າງຂວາງເລິກເຊິ່ງ ໂດຍຜ່ານການຮ່ວມຊີວິດຂອງໜ່ວຍພັກ, ການດໍາເນີນກອງປະຊຸມຕ່າງໆ ແລະ ສາມາດເປີດກອງປະຊຸມໃຫຍ່ຂັ້ນຂອງຕົນ ສໍາເລັດຕາມຄາດໝາຍ ແລະ ໃນການເປີດບັ້ນດໍາເນີນຊີວິດການເມືອງ ປີ 2023 ມີຈຳນວນພົນທັງໝົດ 36 ສະຫາຍ ຍິງ 8 ສະຫາຍ, ເຊິ່ງຜ່ານການຄັດເລືອກແບ່ງປະເພດ ໄດ້ປະເພດແຂງ ທັງໝົດ.
ນອກນີ້, ຍັງສາມາດຂະຫຍາຍມະຫາຊົນຜູ້ກ້າວໜ້າເຂົ້າພັກໄດ້ 4 ສະຫາຍ, ເຂົ້າສໍາຮອງ 1 ສະຫາຍ, ເລື່ອນສໍາຮອງຂຶ້ນສົມບູນໄດ້ 2 ສະຫາຍ ແລະ ຜ່ານການເປີດບັ້ນດໍາເນີນຊີວິດການເມືອງ ໃນແຕ່ລະປີ ສາມາດຍາດໄດ້ໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ເຖິງ 5 ປີຊ້ອນ.
ກອງປະຊຸມຄັ້ງປະຖົມມະລຶກ ໄດ້ປ່ອນບັດເລືອກຕັ້ງເອົາ ຄະນະໜ່ວຍພັກ ຊຸດໃໝ່, ໂດຍມີຜູ້ລົງສະໝັກ ຈໍານວນ 5 ສະຫາຍ ເລືອກເອົາ 3 ສະຫາຍ ແລະ ຜ່ານການລົງຄະແນນສຽງ ເລືອກໄດ້ ສະຫາຍ ພັທ ສຸລິເດດ ກອງທະວີໄຊ ເປັນເລຂາ, ສະຫາຍ ພັທ ສົມພົງ ທໍາມະວົງ ເປັນຮອງເລຂາ ແລະ ສະຫາຍ ພັທ ບຸນມີ ສີລິມົນດີ ເປັນຜູ້ກວດກາ.
