ຝືກອົບຮົມເຈົ້າໜ້າທີ່ອາວຸໂສຕຳຫຼວດອາຊຽນ ຄັ້ງທີ 31 ໄດ້ຈັດຂຶ້ນໃນວັນທີ 20 ສິງຫາ 2024 ທີ່ນະຄອນຫຼວງວຽງຈັນ ສປປ ລາວ, ເຊິ່ງຈະດໍາເນີນເປັນເວລາ 3 ວັນ (ວັນທີ 20 – 22 ສິງຫາ 2024, ພາຍໃຕ້ການເປັນປະທານຂອງ ພັອ ນາງ ວັນເພັງ ພົມມີໄຊ ຫົວໜ້າກົມຕຳຫຼວດສາກົນ, ໃຫ້ກຽດເຂົ້າຮ່ວມຂອງ ພົຈວ ກອງສະຫວັດ ບຸນລ້ຽງ ຮອງຫົວໜ້າກົມໃຫຍ່ຕຳຫຼວດ ກະ ຊວງປ້ອງກັນຄວາມສະຫງົບ ສປປ ລາວ, ພັອ ເດວິດ ມາຕີເນັດ ວິນລວນ ຫົວໜ້າກອງເລຂາຕໍາຫຼວດອາຊຽນ, ມີຄະນະຜູ້ ແທນມາຈາກ 10 ປະເທດສະມາຊິກຕໍາຫຼວດອາຊຽນ. ໃນນັ້ນ, ລວມມີ: ບຣູໄນ, ກໍາປູເຈຍ, ອິນໂດເນເຊຍ, ສປປ ລາວ, ມາ ເລເຊຍ, ມຽນມາ, ຟິລິບປິນ, ສີງກະໂປ, ໄທ ແລະ ຫວຽດນາມ; ພ້ອມແຂກຖືກເຊີນ ເພື່ອເປັນຜູ້ບັນ ລະຍາຍຕາງໜ້າຈາກບັນດາສະຖານທູດ ແລະ ຂະແໜງການກ່ຽວຂ້ອງເຊັ່ນ: ຕາງໜ້າສະ ຖານທູດອົດສະຕຣາລີ, ອາເມລິກາ, ລັດເຊຍ, ສປ ຈີນ ແລະ ອົງການໄອຍະການປະຊາຊົນສູງສຸດ.
ການຝຶກອົບຮົມເຈົ້າໜ້າທີ່ອາວຸໂສຕຳຫຼວດອາຊຽນ ຄັ້ງທີ 31 ແມ່ນນອນຢູ່ໃນ 4 ກອງປະຊຸມ ແລະ ຝຶກອົບຮົມທີ່ກໍາລັງຕໍາຫຼວດລາວ ເປັນເຈົ້າພາບພາຍຫຼັງເປັນປະທານກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ແລະ ພາຍຫຼັງສໍາເລັດ ຈະໄດ້ມອບຕໍ່ໃຫ້ກໍາລັງຕໍາຫຼວດມຽນມ້າ ໃນກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 42, ເຊິ່ງຈະຈັດຂື້ນໃນເດືອນຕຸລາ ປີ 2024.
ໃນໂອກາດນີ້, ພົຈວ ກອງສະຫວັດ ບຸນລ້ຽງ ໄດ້ກ່າວເປີດວ່າ: ການຝືກອົບຮົມເຈົ້າໜ້າທີ່ອາວຸໂສຕໍາຫຼວດອາຊຽນ ເປັນການຝຶກອົບຮົມໜຶ່ງທີ່ມີຄວາມໝາຍສຳຄັນເປັນຢ່າງຍິ່ງ ເພື່ອເປັນການສົ່ງເສີມການຮ່ວມມືໃນຂົງເຂດວຽກງານຕ້ານອາຊະຍາກຳຂ້າມຊາດ ແລະ ບັນຫາອາຊະຍາກຳອື່ນໆທີ່ກ່ຽວຂ້ອງ ເພື່ອແລກປ່ຽນບົດຮຽນທີ່ດີ ແລະ ປະສົບການດ້ານວຽກງານຕຳຫຼວດ ກັບບັນດາຊ່ຽວຊານທີ່ມີປະສົບການສູງ, ລວມທັງບົດຮຽນຈໍານວນໜື່ງຈາກເຈົ້າ ໜ້າທີ່ອາວຸໂສບັນດາປະເທດສະມາຊິກຕຳ ຫຼວດອາຊຽນ ທີ່ເຂົ້າຮ່ວມຝຶກອົບຮົມໃນຄັ້ງນີ້.
ການຝຶກອົບຮົມຄັ້ງນີ້, ໄດ້ດໍາເນີນໄປດ້ວຍບັນຍາກາດທີ່ສ້າງສັນ, ປຶກສາຫາລື ແລະ ແລກ ປ່ຽນບົດຮຽນເຊິ່ງກັນແລະກັນກ່ຽວກັບບັນຫາການຕ້ານອາຊະຍາກຳຂ້າມຊາດ, ການສະກັດກັ້ນ ແລະ ຕ້ານການຄ້າຂາຍຢາເສບຕິດ, ການຕ້ານການຄ້າມະນຸດ, ການສໍ້ໂກງທາງໂທລະຄົມ, ອາຊະຍາກຳທາງຄອມພິວເຕີ ແລະ ການສົ່ງຜູ້ຮ້າຍຂ້າມແດນເປັນຕົ້ນ.
ນອກນັ້ນ, ການຝຶກອົບຮົມຄັ້ງນີ້ຍັງເປັນເວທີໃນການປຶກສາຫາລືເພື່ອຊອກຫາຊ່ອງທາງ ອຳ ນວຍຄວາມສະດວກໃນການປະ ສານງານ ແລະ ຮ່ວມມືໃນແລກປ່ຽນກ່ຽວກັບກົນໄກຂອງແຕ່ລະປະເທດໃນການຮັບມື ແລະ ຊ່ວຍເຫຼືອເຊິ່ງກັນ ແລະ ກັນລະ ຫວ່າງບັນດາປະເທດສະມາຊິກຕຳຫຼວດອາຊຽນ.
