ກອງບັນຊາການປ້ອງກັນສູນກາງ ກະຊວງປ້ອງກັນຄວາມສະຫງົບ ໄດ້ຈັດພິທີປະກາດແຕ່ງຕັ້ງ-ເລື່ອນຊັ້ນໃຫ້ນາຍ ແລະ ພົນຕໍາຫຼວດ ໃນວັນທີ 31 ກໍລະກົດ 2024, ເປັນປະທານໂດຍ ພັອ ສູນເພັງ ສິນທະວອນ ຮອງຫົວໜ້າກອງບັນຊາການປ້ອງກັນສູນກາງ, ມີຄະນະພັກ-ຄະນະກອງບັນຊາການ, ຫ້ອງ, ກອງພັນ, ໂຮງຮຽນ, ນາຍ ແລະ ພົນຕໍາຫຼວດທີ່ໄດ້ຮັບການແຕ່ງຕັ້ງ ແລະ ເລື່ອນຊັ້ນ ເຂົ້າຮ່ວມ.
ພັທ ນາງ ພອນແກ້ວ ວົງສາຍຄໍາ ຮອງຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງ ກົມໃຫຍ່ການເມືອງ ປກສ ແລະ ຂໍ້ຕົກ ລົງຂອງ ກອງບັນຊາການປ້ອງກັນສູນກາງ ວ່າດ້ວຍການເລື່ອນຊັ້ນໃຫ້ນາຍ ແລະ ພົນຕໍຫຼວດທີ່ຂຶ້ນກັບ ກອງບັນຊາການປ້ອງ ກັນສູນກາງ ດັ່ງນີ້:
– ເລື່ອນຊັ້ນ ຮ້ອຍຕີ ຂຶ້ນຮ້ອຍໂທ ຈໍານວນ 6 ສະຫາຍ ຍິງ 4 ສະຫາຍ
– ເລື່ອນຊັ້ນ ວາທີ ຂຶ້ນຊັ້ນ ຮ້ອຍຕີ 1 ສະຫາຍ
– ເລື່ອນຊັ້ນ ສິບເອກ ຂຶ້ນຊັ້ນ ວາທີ ຈໍານວນ 84 ສະຫາຍ ຍິງ 9 ສະຫາຍ
– ເລື່ອນຊັ້ນ ສິບໂທ ຂຶ້ນຊັ້ນ ສິບເອກ ຈໍານວນ 87 ສະຫາຍ ຍິງ 8 ສະຫາຍ
ຈາກນັ້ນ, ໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງນາຍ ແລະ ພົນຕໍາຫຼວດ ທີ່ຂຶ້ນກັບ ກອງບັນຊາການປ້ອງກັນສູນກາງ; ໃນນີ້, ແຕ່ງຕັ້ງນາຍ ແລະ ພົນຕໍາຫຼວດຂັ້ນຫົວໜ້າ ແລະ ຮອງຫົວໜ້າພະແນກ, ກອງຮ້ອຍ, ສໍານັກງານກອງຮ້ອຍ, ໝວດ, ໝູ່ ທີ່ຂຶ້ນກັບບັນດາຫ້ອງ, ກອງພັນ, ໂຮງຮຽນ ປກສ ຊັ້ນຕົ້ນ.
ໂອກາດດັ່ງກ່າວ, ພັອ ສູນເພັງ ສິນທະວອນ ຮອງຫົວໜ້າກອງບັນຊາການປ້ອງກັນສູນກາງ ໄດ້ເປັນກຽດປະດັບຊັ້ນໃຫ້ນາຍ ແລະ ພົນຕໍາຫຼວດທີ່ໄດ້ຮັບການເລື່ອນຊັ້ນ ພ້ອມທັງໄດ້ໂອ້ລົມ ເຊິ່ງທ່ານຮອງຫົວໜ້າກອງບັນຊາການປ້ອງກັນສູນກາງ ໄດ້ສະແດງຄວາມຍ້ອງຍໍຊົມເຊີຍ ແລະ ເໜັ້ນໃຫ້ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານທີ່ການຈັດຕັ້ງຂັ້ນເທິງມອບ ໝາຍໃຫ້, ມີຄວາມຈົງຮັກພັກດີຕໍ່ພັກ-ລັດ, ຕໍ່ກໍາລັງປ້ອງກັນຄວາມສະຫງົບ ແລະ ເພື່ອນມິດສະຫາຍ, ມີຄວາມຮັກແພງຄວາມສາມັກຄີພາຍໃນກຳລັງ, ສືບຕໍ່ເຮັດວຽກງານວິຊາສະເພາະທີ່ໄດ້ຮັບມອບໝາຍໃຫ້ສຳເລັດ ແລະ ສືບຕໍ່ພັດທະນາຕົນເອງໃນທຸກໆດ້ານ ເພື່ອສ້າງໃຫ້ໄດ້ພະນັກງານສືບທອດປ່ຽນແທນທີ່ດີ ແລະ ມີຄຸນນະພາບໃນສະເພາະໜ້າ ແລະ ຍາວນານ.
