ໃນວັນທີ 3 ສິງຫາ 2024, ທີ່ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ຈັດກອງປະຊຸມພົບປະ ລະຫວ່າງ ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບລາວ ແລະ ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບຫວຽດນາມ, ຝ່າຍລາວ ນໍາໂດຍ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະ ຫງົບລາວ, ຝ່າຍຫວຽດນາມ ນໍາໂດຍ ພົນຕີ ຫງວຽນ ວັນ ລອງ ຮອງລັດຖະມົນຕີກະຊວງປ້ອງກັນຄວາມສະຫງົບຫວຽດນາມ ໂດຍມີຄະນະຜູ້ແທນຂັ້ນສູງທັງສອງຝ່າຍເຂົ້າຮ່ວມ.
ໃນກອງປະຊຸມ, ທັງສອງຝ່າຍໄດ້ລາຍງານສະພາການທີ່ພົ້ນເດັ່ນ ແລະ ການເຄື່ອນໄຫວປະຕິບັດໜ້າທີ່ວຽກງານປ້ອງກັນຄວາມສະຫງົບ ໃນໄລຍະຜ່ານມາໃຫ້ກັນຊາບ ເປັນຕົ້ນສະພາບການພາກພື້ນ ແລະ ສາກົນ, ສະພາບພາຍໃນປະເທດ, ການພົວພັນຮ່ວມມື ລະຫວ່າງ ສອງກະຊວງປ້ອງກັນຄວາມສະຫງົບ ເຊັ່ນ: ໂຄງການກໍ່ສ້າງຫ້ອງການປະສານງານ ປກສ ບ້ານ ລຽບຕາມຊາຍແດນລາວ-ຫວຽດນາມ, ໂຄງການສ້າງລະບົບຄຸ້ມຄອງສໍາມະໂນຄົວ ແລະ ອອກບັດປະຈໍາຕົວທັນສະໄໝ, ໂຄງ ການກໍ່ສ້າງສູນບຳບັດຜູ້ຕິດຢາເສບຕິດ ແລະ ວຽກງານສໍາອື່ນໆມີຜົນສໍາເລັດເປັນຢ່າງດີຕ່າງຝ່າຍຕ່າງໄດ້ຮັບຜົນປະໂຫຍດ ແລະ ແຕກດອກອອກຜົນຍິ່ງໆຂຶ້ນ. ພ້ອມນີ້, ທັງສອງຝ່າຍຍັງໄດ້ຕີລາຄາສູງຕໍ່ຜົນສໍາເລັດໃນການພົບປະຮ່ວມມືລະຫວ່າງສອງກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມ ໃນໄລຍະຜ່ານມາ.
ການພົບປະປຶກສາຫາລືໃນຄັ້ງນີ້ຈະເປັນຂີດໝາຍອັນດີໃນການສືບຕໍ່ຈັດຕັ້ງຜັນຂະຫຍາຍເນື້ອໃນບົດບັນທຶກຂອງກໍາລັງຕຳ ຫຼວດລາວ ແລະ ກໍາລັງຕຳຫຼວດຫວຽດນາມ ກໍຄືການຈັດຕັ້ງຜັນຂະຫຍາຍສັນຍາຮ່ວມມືປະຈຳປີ ລະຫວ່າງ ສອງກະຊວງ ແລະ ທັງເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ, ສອງກຳລັງປ້ອງກັນຄວາມສະຫງົບປະຊາຊົນລາວ-ຫວຽດນາມ ໃຫ້ນັບມື້ແໜ້ນແຟ້ນ ແລະ ຈະເລີນງອກງາມຍິ່ງໆຂຶ້ນ.
ໂອກາດນີ້, ພົນຕີ ຄໍາກິ່ງ ຜຸຍຫຼ້າມະນີວົງ ຍັງໄດ້ຕາງໜ້າໃຫ້ຄະນະນໍາກະຊວງ, ນາຍ ແລະ ພົນຕໍາຫຼວດລາວ ຂໍສະແດງຄວາມເສຍໃຈຢ່າງສຸດຊຶ້ງຕໍ່ການຈາກໄປຂອງ ສະຫາຍ ຫງວຽນ ຟູ ຈອງ ອະດີດເລຂາທິການໃຫຍ່ຄະນະບໍລິຫານງານພັກກອມມູ ນິດຫວຽດນາມ ແລະ ກ່າວສະແດງຄວາມຮູ້ບຸນຄຸນ, ຂອບໃຈຢ່າງສູງຕໍ່ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບຫວຽດນາມ ທີ່ໄດ້ມາຢ້ຽມຢາມ, ເຮັດວຽກຢູ່ລາວໃນຄັ້ງນີ້ ແລະ ອວຍພອນໄຊໃຫ້ມີສຸຂະພາບແຂງແຮງ, ມີຜົນສໍາເລັດໃນໜ້າທີ່ວຽກງານ, ອວຍພອນໄຊແດ່ສາຍພົວພັນມິດຕະພາບ, ການຮ່ວມມື ແລະ ຄວາມສາມັກຄີພິເສດ ລະຫວ່າງ 2 ຊາດ ລາວ-ຫວຽດນາມ ເວົ້າສະເພາະ ລະຫວ່າງ 2 ກໍາລັງປ້ອງກັນຄວາມສະຫງົບ ລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫຼອດໄປ.
ພາບ-ຂ່າວ:ແກ້ວ
