ວັນທີ 25 ກໍລະກົດ 2024, ກອງບັນຊາການ ປກສ ແຂວງຫົວພັນ ໄດ້ເປັນເຈົ້າພາບຈັດກອງປະຊຸມສ່ອງແສງ ວຽກງານພັກ-ວຽກງານການເມືອງປ້ອງກັນຄວາມສະຫງົບ 5 ແຂວງ ເຂດ III ປະຈຳໄຕມາດ II ປີ 2024 ມີບັນດາແຂວງຄື: ແຂວງຫົວພັນ, ແຂວງຊຽງຂວາງ, ແຂວງບໍລິຄໍາໄຊ, ແຂວງໄຊສົມບູນ ແລະ ແຂວງຄຳມ່ວນ, ເປັນກຽດເຂົ້າຮ່ວມໂດຍ ພົຈວ ປອ ຫຸມພັນ ຜິວເຂັມພອນ ຮອງກົມໃຫຍ່ການເມືອງກະຊວງປ້ອງກັນຄວາມສະຫງົບ ພ້ອມດ້ວຍຄະນະຮັບຜິດຊອບສ່ອງແສງ, ຄະນະກອງບັນຊາການ ປກສ 5 ແຂວງ ແລະ ຄະນະຫ້ອງ ຕະຫຼອດຮອດພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ, ຄະນະພັກ-ຄະນະກອງບັນຊາການ ປກສ 5 ໄດ້ພັດປ່ຽນກັນຂຶ້ນລາຍງານສະພາບປາກົດການຫຍໍ້ທໍ້ທາງດ້ານສັງຄົມຂອງແຕ່ລະແຂວງ ເປັນຕົ້ນແມ່ນບັນຫາຢາເສບຕິດ, ອຸບັດຕິເຫດ, ອັກຄີໄພ, ປຸ້ນຈີ້-ຊີງຊັບ, ຄາດຕະກຳ, ຄ້າຂາຍເຖື່ອນ, ບັນຫາສາສະໜາ ແລະ ອື່ນໆ ທີ່ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ.
ໂອກາດນີ້, ພົຈວ ປອ ຫຸມພັນ ຜິວເຂັມພອນ ຍັງໄດ້ເນັ້ນໜັກໃຫ້ ຄະນະພັກ-ຄະນະກອງບັນຊາການ ປກສ 5 ແຂວງ ສືບຕໍ່ເຮັດວຽກງານສຶກສາອົບຮົມການເມືອງ-ນຳພາແນວຄິດໃຫ້ສະມາຊິກພັກ, ນາຍ ແລະ ພົນຕຳຫຼວດ ຢ່າງເນື່ອງນິດລຽນຕິດ, ມີຄວາມສາມັກຄີເປັນເອກະພາບ, ມີລະບຽບວິໄນ, ປະຕິບັດລະບຽບກົດໝາຍຢ່າງເຂັ້ມງວດ, ມີສະຕິລະວັງຕົວຕໍ່ກຸ່ມຄົນບໍ່ດີ ພ້ອມກັນເຮັດວຽກງານວິຊາສະເພາະໃຫ້ໜັກແໜ້ນ, ເຂັ້ມແຂງ ສຸມໃສ່ແກ້ໄຂບັນດາປາກົດການຫຍໍ້ທໍ້ທີ່ເກີດຂື້ນໃຫ້ນັບມື້ຫຼຸດໜ້ອຍຖອຍລົງ.
