ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມສະຫຼຸບລາຍງານຄວາມຄືບໜ້າໃນການກະກຽມຄວາມພ້ອມເປັນເຈົ້າພາບກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ, ໃນວັນທີ 30 ກໍລະກົດ 2024, ໂດຍການເປັນປະທານຂອງ ພົຕ ສົມວັນ ສາຍລ້ອງພາ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ມີຄະນະກົມໃຫຍ່, ຫ້ອງວ່າການ, ກົມກອງອ້ອມຂ້າງກະຊວງ, ບັນດາອະນຸກຳມະການດ້ານຕ່າງໆ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ໄດ້ສະຫຼຸບຖອດຖອນບົດຮຽນການເປັນເຈົ້າພາບ ແລະ ປະທານກອງປະຊຸມເຈົ້າໜ້າທີ່ອາວຸໂສອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 24 ແລະ ກອງປະຊຸມອື່ນໆທີ່ກ່ຽວຂ້ອງ ທີ່ໄດ້ຈັດຂຶ້ນໄລຍະຜ່ານມາ; ຜ່ານແຜນ ການ ແລະ ຂໍ້ຕົກລົງແຕ່ງຕັ້ງຄະນະຮັບຜິດຊອບຈັດກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ພ້ອມທັງລາຍງານຄວາມຄືບໜ້າໃນການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ, ເຊິ່ງຈະໄດ້ຈັດຂຶ້ນໃນລະຫວ່າງວັນທີ 26-30 ສິງຫາ 2024.
ບັນດາຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນປະກອບຄຳຄິດເຫັນ ແລະ ຖອດຖອນບົດຮຽນຕີລາຄາຄືນດ້ານດີດ້ານອ່ອນຂໍ້ຄົງຄ້າງໃນການເປັນເຈົ້າພາບກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍການຕ້ານອາຊະຍາກຳຂ້າມຊາດຄັ້ງທີ 24 ແລະ ກອງປະຊຸມອື່ນໆທີ່ກ່ຽວຂ້ອງ ພ້ອມທັງປຶກສາຫາລືຄວາມຄືບໜ້າໃນການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນວ່າດ້ວຍການຕ້ານອາຊະຍາກຳຂ້າມຊາດຄັ້ງທີ 18 ເພື່ອເຮັດໃຫ້ກອງປະຊຸມດັ່ງກ່າວມີຜົນສຳເລັດຕາມລະດັບຄາດໝາຍທີ່ວາງໄວ້.
ໂອກາດດຽວກັນນີ້, ພົຕ ສົມວັນ ສາຍລ້ອງພາ ໄດ້ມີຄໍາເຫັນ ແລະ ໃຫ້ທິດຊີ້ນໍາຕໍ່ບັນດາອະນຸກໍາມະການດ້ານຕ່າງໆໃຫ້ຖອດຖອນບົດຮຽນການຈັດກອງປະຊຸມເຈົ້າໜ້າທີອາວຸໂສທີ່ຜ່ານມາ ດ້ານດີ, ດ້ານອ່ອນຂໍ້ຄົງຄ້າງ ບົດຮຽນທີ່ຖອດຖອນໄດ້, ປຶກສາຫາລືຄວາມຄືບໜ້າ ແລະ ບັນດາໜ້າວຽກທີ່ຕ້ອງສຸມໃສ່ ເພື່ອກະກຽມຄວາມພ້ອມໃຫ້ແກ່ການເປັນເຈົ້າພາບ ແລະ ປະທານກອງປະຊຸມລັດຖະມົນຕີອາຊຽນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 18 ແລະ ກອງປະຊຸມອື່ນໆທີ່ກ່ຽວຂ້ອງ ຮັບປະກັນໃຫ້ກອງປະຊຸມດໍາເນີນໄປຢ່າງໂລ່ງລຽນ ແລະ ສອດຄ່ອງກັບລະບຽບການອາຊຽນ; ພ້ອມທັງຮັບປະກັນໄດ້ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ.
ພາບ-ຂ່າວ: ບຸນພະຈັນ
