ໃນວັນທີ 28 ກັນຍາ 2022, ພົທ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ພອລ ຄຽວລີ ເອກອັກຄະລັດຖະທູດວິສາມັນ ຜູ້ມີອໍານາດເຕັມແຫ່ງປະເທດອົດສະຕຣາລີ ປະຈໍາ ສປປ ລາວ ເພື່ອປຶກສາຫາລືຄະນະຜູ້ແທນລາວ ຈະ ຢ້ຽມຢາມ ອົດສະຕຣາລີ ໃນກາງເດືອນຕຸລານີ້.
ພົທ ກົງທອງ ພົງວິຈິດ ກໍໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ການຢ້ຽມຂໍ່ານັບໃນຄັ້ງນີ້, ພ້ອມນີ້ ທັງສອງຝ່າຍກໍໄດ້ປຶກສາຫາລືຫຼາຍວຽກງານ ໂດຍສະເພາະແມ່ນ ກະກຽມວຽກງານການໄປຢ້ຽມຢາມ ປະເທດອົດສະຕຣາລີ ຂອງຄະນະຜູ້ແທນ ສປປ ລາວ ໃນກາງເດືອນຕຸລາທີ່ຈະມາເຖິງນີ້ ເປັນຕົ້ນແມ່ນວຽກງານການພົວພັນ-ຮ່ວມມືສອງຝ່າຍ, ວຽກງານປ້ອງກັນຄວາມສະຫງົບ, ວຽກງານສິດທິມະນຸດ ແລະ ວຽກງານອື່ນໆ.
ໂອກາດນີ້, ທ່ານທູດອົດສະຕຣາລີ ກໍໄດ້ຕີລາຄາສູງໃນການຮ່ວມມືໃນໄລຍະຜ່ານມາ ເປັນຕົ້ນແມ່ນວຽກງານຝຶກອົບຮົມພາສາອັງກິດໃນໄລຍະສັ້ນ, ວຽກງານຝຶກອົບຮົມວິຊາສະເພາະຈໍານວນໜຶ່ງ ໃຫ້ແກ່ ກະຊວງ ປກສ ແລະ ວຽກງານອື່ນໆ ພ້ອມທັງຈະສືບຕໍ່ຮ່ວມມືກັນໃນຕໍ່ໜ້າໃຫ້ດີຂຶ້ນກວ່າເກົ່າ.
