ໃນທ້າຍອາທິດຜ່ານມາ, ພົນໂທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ ກອງບັນຊາການ ປກສ ເຂດພິເສດບໍ່ເຕ່ນແຂວງຫຼວງນໍ້າທາ, ໃຫ້ກຽດຕ້ອນຮັບໂດຍ ພັອ ພອນແກ້ວ ພົງແສນຫຼວງ ຮອງຫົວໜ້າກອງບັນຊາການ ປກສ ແຂວງຫຼວງນ້ຳທາ, ມີຫົວໜ້າ-ຄະນະຄຸ້ມຄອງດ່ານ ຕມ ສາກົນບໍ່ເຕ່ນ, ຫົວໜ້າ-ຄະນະກອງບັນຊາການ ປກສ ເຂດພິເສດບໍ່ເຕ່ນ, ນາຍ ແລະ ພົນຕຳຫຼວດ ພາຍໃນ ປກສ ເຂດ ເຂົ້າຮ່ວມ.
ໂອກາດທີ່ລົງມາເຮັດວຽກຄັ້ງນີ້, ພົນໂທ ກົງທອງ ພົງວິຈິດ ໄດ້ຮັບຟັງການລາຍງານສະພາບລວມ, ທີ່ຕັ້ງ, ຈຸດພິເສດ ແລະ ການຈັດຕັ້ງປະຕິບັດໜ້າທີ່ວຽກງານວິຊາສະເພາະປ້ອງກັນຄວາມສະຫງົບ ໂດຍຫຍໍ້ຈາກ ພັທ ອຳໄພ ສໍສະຫວັນແສງ ຫົວ ໜ້າກອງບັນຊາການ ປກສ ເຂດພິເສດບໍ່ເຕ່ນ ເປັນຕົ້ນແມ່ນ ການຂຶ້ນບັນຊີພົນລະເມືອງທີ່ມາພັກອາໄສ, ການເຂົ້າ-ອອກເມືອງ ພ້ອມໄດ້ລົງເກັບກຳສະຖິຕິພົນລະເມືອງ ເພື່ອອອກໃບອະນຸຍາດພັກເຊົາຊົ່ວຄາວຕາມລະບຽບການ ແລະ ໄດ້ນຳເອົາບັນດານິຕິກຳ, ກົດລະບຽບມາເຜີຍແຜ່ໃຫ້ເຂົາເຈົ້າໄດ້ຮັບຮູ້, ເຂົ້າໃຈຢ່າງທົ່ວເຖິງ; ປັດຈຸບັນ ມີພົນລະເມືອງລາວ ແລະ ຕ່າງປະເທດ ທີ່ມາພັກອາໄສຢູ່ເຂດທັງໝົດ 3,284 ຄົນ, ຍິງ 895 ຄົນ (ຄົນລາວ 662 ຄົນ, ຍິງ 407 ຄົນ; ຄົນຕ່າງປະເທດ 2,622 ຄົນ, ຍິງ 488 ຄົນ; ຄົນຈີນ 2.509 ຄົນ, ຍິງ 419 ຄົນ ແລະ ຄົນຫວຽດນາມ 104 ຄົນ, ຍິງ 68 ຄົນ).
ນອກນັ້ນ, ຍັງໄດ້ເອົາໃຈໃສ່ເຄື່ອນໄຫວປ້ອງກັນເວນຍາມ, ປ້ອງກັນສະກັດກັ້ນປາກົດການຫຍໍ້ທໍ້ຕ່າງໆ ຕະຫຼອດ 24 ຊົ່ວ ໂມງ ແລະ ກວດກາສະພາບຂອງປະຊາຊົນ ລາວ-ຈີນ ຢູ່ລຽບຕາມຊາຍແດນ ຈຳນວນໜຶ່ງ ຍັງມີການເຄື່ອນໄຫວລັກລອບ ເຂົ້າ-ອອກ ມາຕາມເສັ້ນທາງນ້ອຍ, ເມື່ອເຈົ້າໜ້າທີ່ພົບເຫັນ ໄດ້ນໍາພວກກ່ຽວມາສຶກສາອົບຮົມ ແລ້ວມອບໃຫ້ພາກສ່ວນທີ່ກ່ຽວຂ້ອງ ແລະ ພ້ອມພັກດັນກັບຄືນປະເທດ.
ພ້ອມດຽວກັນນັ້ນ, ພົທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ມີຄຳເຫັນຊີ້ນຳໃຫ້ ຫົວໜ້າ-ຄະນະ ປກສ ເຂດພິເສດບໍ່ເຕ່ນ ໂດຍເນັ້ນໜັກໃຫ້ສືບຕໍ່ເຮັດວຽກງານການເມືອງ-ແນວຄິດ ໃຫ້ ນາຍ ແລະ ພົນຕຳຫຼວດ ເປັນປົກ ກະຕິຕໍ່ເນື່ອງ ແລະ ທົ່ວເຖິງ, ເຊື່ອໝັ້ນຕໍ່ການນຳພາ-ຊີ້ນຳຂອງຂັ້ນເທິງ, ເອົາໃຈໃສ່ລົງເກັບກຳສະຖິຕິ, ຊອກຮູ້ຕິດຕາມເປົ້າ ໝາຍ ແລະ ກຳແໜ້ນໃຫ້ໄດ້ບັນດາປາກົດການຫຍໍ້ທໍ້ຂອງສັງຄົມທີ່ຈະເກີດຂຶ້ນ ໂດຍສົມທົບກັບຫຼາຍພາກສ່ວນຢູ່ພາຍໃນເຂດ ແລະ ແຂວງ ໃນການສະກັດກັ້ນ ແລະ ຕ້ານ ໃຫ້ທັນເວລາ ເພື່ອຮັກສາໄດ້ສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ.
ຂ່າວ ປກສ ແຂວງຫຼວງນ້ຳທາ
