ກົມຕຳຫຼວດນິຕິວິທະຍາ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ພົບປະແລກປ່ຽນບົດຮຽນກັບ ສະຖາບັນວິທະຍາສາດອາຍາ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໃນວັນທີ 21 ມິຖຸນາ 2024 ທີ່ນະຄອນຫຼວງວຽງຈັນ, ຝ່າຍລາວ ນໍາໂດຍ ພັອ ປອ ດວງຈັນ ວົງວິໄຊ ຫົວໜ້າກົມຕຳຫຼວດນິຕິວິທະຍາ, ຝ່າຍຫວຽດນາມ ນໍາໂດຍ ພັອ ຈິ່ງຕ່ວນຕວນ ຫົວໜ້າຄະນະສະຖາບັນວິທະຍາສາດອາຍາ ພ້ອມດ້ວຍຄະນະຜູ້ແທນທັງສອງຝ່າຍ ເຂົ້າຮ່ວມ.
ໃນພິທີ, ທັງສອງຝ່າຍ ໄດ້ຜັດປ່ຽນກັນລາຍງານສະພາບການຈັດຕັ້ງປະຕິບັດເຮັດໜ້າທີ່ວຽກງານວິຊາສະເພາະ ໃນໄລຍະຜ່ານມາ ໃຫ້ກັນຊາບ ໂດຍສະເພາະ ແມ່ນການພົວພັນຮ່ວມມືລະຫວ່າງສອງຝ່າຍ ໄດ້ບັນລຸໝາກຜົນສໍາເລັດທີ່ສໍາຄັນຫຼາຍດ້ານ, ເປັນຂີດໝາຍບາດກ້າວພັດທະນາອັນໃໝ່ຢ່າງກວ້າງຂວາງ ໃນວຽກງານວິຊາສະເພາະນິຕິວິທະຍາ, ປະກອບສ່ວນເຂົ້າໃນການປ້ອງກັນສະກັດກັ້ນ ແລະ ຕ້ານພວກກໍ່ອາຊະຍາກຳ ແລະ ເພີ່ມທະວີການຮ່ວມມືແລກປ່ຽນຂໍ້ມູນຂ່າວສານເຊິ່ງກັນແລະກັນ ຢ່າງກົງໄປກົງມາ, ເຕັມໄປດ້ວຍມິດຕະພາບທີ່ດີ.
ການພົບປະແລກປ່ຽນບົດຮຽນໃນຄັ້ງນີ້ ມັນແມ່ນບາດລ້ຽວທີ່ສໍາຄັນ ແລະ ເປັນການເພີ່ມທະວີຄວາມຮູ້ຄວາມເຂົ້າໃຈຂອງພະນັກງານຂັ້ນບັນຊາ ແລະ ວິຊາການແຕ່ລະຂັ້ນ ທີ່ເຮັດວຽກງານວິຊາສະເພາະນິຕິວິທະຍາ ໂດຍສະເພາະ ໃນຂົງເຂດວຽກງານຊັນນະສູດສະຖານທີ່ເກີດເຫດ ແລະ ຊາກສົບ, ວຽກງານກວດພິສູດ-ວິໄຈຢາເສບຕິດ ເພື່ອເຮັດໃຫ້ການພັດທະນາຊັບພະຍາກອນມະນຸດ ມີຄຸນນະພາບສູງຂຶ້ນນັ້ນມີຫຼາຍປັດໄຈ, ແຕ່ປັດໄຈສໍາຄັນນັ້ນແມ່ນ ການສຶກສາຄົ້ນຄວ້າປຶກສາຫາລືແລກປ່ຽນບົດຮຽນປະສົບການຕົວຈິງ ໃນຂົງເຂດວຽກງານວິຊາສະເພາະນິຕິວິທະຍາ.
ພ້ອມນີ້, ທັງສອງຝ່າຍ ຍັງໄດ້ແລກປ່ຽນທິດທາງພົວພັນມິດຕະພາບແບບພິເສດ ພັດປ່ຽນກັນເປັນເຈົ້າພາບໃນການພົບປະແລກປ່ຽນບົດຮຽນ ແລະ ການຮ່ວມມືຮອບດ້ານລະຫວ່າງ ກົມຕຳຫຼວດນິຕິວິ ທະຍາ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ສປປ ລາວ ກັບ ສະຖາບັນວິທະຍາສາດອາຍາ ກະຊວງປ້ອງກັນຄວາມສະຫງົບ ສສ ຫວຽດນາມ ອີກດ້ວຍ
