ຄະນະຜູ້ແທນທີ່ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍອາຊະຍາກໍາຂ້າມຊາດຄັ້ງທີ 24 ນໍາໂດຍ ທ່ານ ພົຕ ສຸລິນະ ແກ້ວປະເສີດ ຫົວໜ້າຫ້ອງວ່າການກະຊວງ ປກສ, ປະທານກອງປະຊຸມ ແລະ ທັງເປັນຫົວໜ້າເຈົ້າໜ້າທີ່ອາວຸໂສ ຮັບ ຜິດຊອບວຽກງານຕ້ານອາຊະຍາກໍາຂ້າມຊາດ ຂອງ ສປປ ລາວ ພ້ອມດ້ວຍຄະນະຜູ້ແທນເຈົ້າໜ້າທີ່ອາວຸ ໂສທີ່ຮັບຜິດຊອບກ່ຽວກັບວຽກງານຕ້ານອາຊະຍາກໍາຂ້າມຊາດຈາກບັນດາປະເທດສະມາຊິກອາຊຽນ ໄດ້ເຂົ້າພົບ ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ໃນວັນທີ 26 ມິຖຸນາ 2024 ນີ້, ທີ່ໂຮງແຮມແລນມາກ ນະຄອນຫຼວງວຽງຈັນ.
ໃນໂອກາດນີ້, ທ່ານ ພົຕ ສຸລິນະ ແກ້ວປະເສີດ ໄດ້ລາຍງານສະພາບຄວາມພ້ອມ ແລະ ບັນຫາສໍາຄັນທີ່ຈະໄດ້ມີການປຶກສາຫາລື ແລະ ແລກປ່ຽນບົດຮຽນນໍາກັນ ຂອງບັນດາເຈົ້າໜ້າທີ່ອາວຸໂສທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດຈາກບັນດາປະເທດສະມາຊິກອາຊຽນ, ປະ ເທດສັງເກດການ ແລະ ຄູ່ຮ່ວມເຈລະຈາ ຢູ່ໃນກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍອາຊະຍາກໍາຂ້າມຊາດຄັ້ງທີ 24 ທີ່ ສປປ ລາວ ເປັນເຈົ້າພາບ, ເຊິ່ງມີຫຼາຍບັນຫາທີ່ຈະຕ້ອງໄດ້ຮ່ວມມືກັນໃນຕໍ່ໜ້າເພື່ອແນ່ໃສເຮັດໃຫ້ພາກພື້ນ ແລະ ສາກົນ ມີຄວາມສະຫງົບ.
ພ້ອມນີ້, ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ກໍ່ໄດ້ກ່າວຕ້ອນຮັບ ແລະ ຊົມເຊີຍຕໍ່ບັນດາຄະນະຜູ້ແທນທີ່ໄດ້ເສຍສະຫຼະເວລາອັນມີຄ່າເຂົ້າຮ່ວມກອງປະຊຸມໃນຄັ້ງນີ້, ພ້ອມທັງສະແດງຄວາມເຊື່ອໝັ້ນວ່າ: ຜ່ານກອງປະຊຸມໃນຄັ້ງນີ້ ຈະເຮັດໃຫ້ວຽກງານການພົວພັນຮ່ວມມືລະຫວ່າງປະເທດສະມາຊິກອາຊຽນ, ປະເທດສັງ ເກດການ ແລະ ບັນດາປະເທດຄູ່ຮ່ວມເຈລະຈາ ຕໍ່ກັບການສະກັດກັ້ນ ແລະ ຕ້ານອາຊະຍາກໍາຂ້າມຊາດ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ຈະເປັນບ້າວກ້າວທີ່ສໍາຄັນໃນການສ້າງພາກພື້ນອາຊຽນ ກໍຄືສາກົນໃຫ້ມີຄວາມສະຫງົບ, ເປັນລະບຽບຮຽບຮ້ອຍ, ເຊິ່ງຈະເປັນພື້ນ ຖານໃຫ້ແກ່ການພັດທະນາເສດຖະກິດ-ສັງຄົມຂອງພາກພື້ນອາຊຽນ ໃຫ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
