ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່າ ແລະ ນັບອໍາລາໜ້າທີ່ຂອງ ທ່ານ ຫງວຽນ ບ໋າ ຮຸ່ງ ເອກອັກຄະລັດ ຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ ໃນວັນທີ 11 ມິຖຸນາ 2024 ໃນໂອກາດທີ່ທ່ານໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ.
ໃນພິທີ, ພົອ ວິໄລ ຫຼ້າຄໍາຟອງ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ຂອງ ທ່ານ ຫງວຽນ ບ໋າ ຮຸ່ງ ຕະຫຼອດໄລຍະການປະຕິບັດໜ້າທີ່ເອກອັກຄະລັດຖະທູດຢູ່ ສປປ ລາວ ຕະຫຼອດ 2 ສະໄໝຜ່ານມາ; ເຊິ່ງທ່ານໄດ້ປະກອບສ່ວນຢ່າງຕັ້ງໜ້າໃນການເສີມຂະຫຍາຍສາຍພົວພັນມິດຕະພາບການຮ່ວມມືແບບພິເສດຂອງສອງພັກ ສອງລັດຖະບານ, ປະຊາຊົນສອງຊາດ ລາວ-ຫວຽດນາມ ເວົ້າສະເພາະແມ່ນການພົວພັນຮ່ວມມືຂອງສອງກໍາລັງປ້ອງກັນຄວາມສະຫງົບ ລາວ-ຫວຽດນາມ ເຕີບໃຫຍ່ຂະຫບາຍຕົວ.
ຕະຫຼອດການດໍາລົງຕຳແໜ່ງເປັນເອກອັກຄະລັດຖະທູດຂອງ ທ່ານ ຫງວຽນ ບ໋າ ຮຸ່ງ, ລັດຖະບານ ສສ ຫວຽດນາມ ກໍໄດ້ໃຫ້ການຊຸກຍູ້ຊ່ວຍເຫຼືອຕໍ່ກໍາລັງປ້ອງກັນຄວາມສະຫງົບລາວ ເຊັ່ນ: ຊ່ວຍເຫຼືອດ້ານທຶນຮອນ, ພື້ນຖານໂຄງລ່າງ, ອຸປະກອນເຕັກ ນິກຮັບໃຊ້ດ້ານວຽກງານວິຊາເພາະ, ການບໍາລຸງ-ກໍ່ສ້າງນາຍຕໍາຫຼວດ ແລະ ອື່ນໆ, ເຊິ່ງສະແດງໃຫ້ເຫັນເຖິງຄວາມສາມັກຄີຮັກແພງຊ່ວຍເຫຼືອເຊິ່ງກັນແລະກັນ, ຮັກສາໄດ້ຄວາມສາມັກຄີແບບພິເສດໃຫ້ຈະເລີນງອກງາຍິ່ງໆຂຶ້ນ.
ໂອກາດດັ່ງກ່າວ, ທ່ານ ຫງວຽນ ບ໋າ ຮຸ່ງ ໄດ້ກ່າວສະແດງຄວາມຂອບໃຈຕໍ່ທ່ານຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຂອບໃຈລັດຖະບານ ແລະ ປະຊາຊົນລາວ ທີ່ໄດ້ໃຫ້ການຮ່ວມມື ແລະ ອໍານວຍຄວາມສະດວກໃຫ້ແກ່ການເຄື່ອນໄຫວວຽກງານການທູດ ຕະຫຼອດໄລຍະຜ່ານມາຂອງຕົນເອງ ຈົນໄດ້ຮັບຜົນສໍາເລັດເປັນຢ່າງດີ.
(ຂ່າວ: ຄຳໂຖ)
