ກອງປະຊຸມສະຫຼຸບວຽກງານກວດກາ-ກວດການ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຈັດຂຶ້ນໃນວັນທີ 6 ມິຖຸນາ 2024, ເຂົ້າຮ່ວມເປັນປະທານໂດຍ ພົຕ ສົມວັນ ສາຍລ້ອງພາ ຄະນະປະຈໍາພັກ ປະທານກວດກາ ພັກກະຊວງ ຮອງລັດຖະມົນຕີ ກະຊວງ ປກສ, ມີຄະນະພັກ-ຄະນະບັນຊາຈາກກົມກອງອ້ອມຂ້າງ ກະຊວງ, ວິທະຍາຄານ, ກອງບັນຊາການ ປກສ ນະຄອນຫຼວງວຽງຈັນ, ປກສ ແຂວງ ພ້ອມດ້ວຍນາຍ ແລະ ພົນຕໍາຫຼວດ ເຂົ້າຮ່ວມ.
ພົຈວ ບຸນລຽນ ສະອາດສີ ຮອງປະທານກວດກາພັກກະຊວງ ຫົວໜ້າກົມກວດກາ-ກວດການ ກົມໃຫຍ່ການເມືອງ ກະຊວງ ປກສ ກ່າວວ່າ: ການເຄື່ອນໄຫວວຽກງານກວດກາໃນ 1 ປີຜ່ານມາ, ຄະນະພັກ-ຄະນະບັນຊາກົມກວດກາ-ກວດການ ປກສ ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ໃຫ້ນາຍ ແລະ ພົນຕຳຫຼວດເປັນກົກ ເພື່ອເປັນການປູກຈິດສຳນຶກໃຫ້ແກ່ສະມາຊິກພັກ, ນາຍ ແລະ ພົນຕຳຫຼວດ ໃນທົ່ວກຳລັງ ປກສ ເວົ້າສະເພາະ ກຳລັງກວດກາ-ກວດການ ປກສ ໃຫ້ມີຄຸນທາດການເມືອງໜັກ ແໜ້ນ, ເປັນເສນາທິການໃຫ້ແກ່ ຄະນະພັກ-ຄະນະບັນຊາໃນວຽກ ງານຄົ້ນຄວ້າສັງລວມ, ວາງແຜນ ການ, ສະຫຼຸບສ່ອງແສງລາຍງານໃຫ້ຂັ້ນເທິງເປັນປົກກະຕິ.
ພ້ອມນັ້ນ, ກໍເປັນເຈົ້າການປະສານສົມທົບກັບກົມກອງອ້ອມຂ້າງ ແລະ ປກສ ທ້ອງຖິ່ນ ເພື່ອຮັບປະກັນເຮັດໃຫ້ວຽກງານຂອງກົມກອງໄດ້ເຄື່ອນໄຫວມີປະສິດທິພາບສູງ, ເຊິ່ງສະແດງອອກບາງວຽກງານທີ່ພົ້ນເດັ່ນ ຄື: ຄົ້ນຄວ້າຄໍາຮ້ອງທຸກ ຈໍານວນ 27 ເລື່ອງ, ແກ້ໄຂສໍາເລັດ 20 ເລື່ອງ. ປັດຈຸບັນ, ກຳລັງດໍາເນີນ 7 ເລື່ອງ. ໃນນີ້, ຄໍາຮ້ອງອ້ອມຂ້າງກະຊວງ 4 ເລື່ອງ ແລະ ທ້ອງຖິ່ນ 3 ເລື່ອງ, ຄົ້ນຄວ້າເນື້ອໃນຮ່າງເຈາະຈີ້ມ ເພື່ອສະເໜີໃຫ້ເພີ່ມເຕີມ, ຕັດອອກກ່ຽວກັບກົດໝາຍ ວ່າດ້ວຍຕ້ານການສໍ້ລາດບັງຫຼວງ ແລະ ກົດໝາຍ ວ່າດ້ວຍກຳລັງ ປກສ ສົ່ງໃຫ້ກົມໃຫຍ່ການເມືອງ ປກສ ສໍາເລັດ, ປັບປຸງຂໍ້ຕົກລົງຂອງທ່ານ ລັດຖະ ມົນຕີກະຊວງ ປກສ ວ່າດ້ວຍການແຕ່ງຕັ້ງຄະນະຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີຢູ່ກະຊວງ ປກສ ເພື່ອລາຍງານທ່ານຮອງລັດຖະມົນຕີເຊັນຮັບຮອງ.
ທິດທາງແຜນການໃນຕໍ່ໜ້າ, ສືບຕໍ່ຈັດຕັ້ງຄົ້ນຄວ້າ, ເຊື່ອມຊຶມ ແລະ ກຳແໜ້ນຫຼັກການ, ເນື້ອໃນ, ຮູບການກວດກາ-ກວດການ, ເຊິ່ງເປັນເນື້ອໃນທີ່ສໍາຄັນເປັນບ່ອນອີງໃນເວລາຈັດຕັ້ງປະຕິບັດຕົວຈິງ ແລະ ເພື່ອເຮັດໃຫ້ທິດສະດີຕິດພັນກັບພຶດຕິກຳ ແລະ ສອດຄ່ອງກັບສະພາບຄວາມເປັນຈິງ, ເຊິ່ງບັນຫານີ້ຈະນໍາໄປເຖິງຜົນສໍາເລັດຢ່າງມີປະສິດທິພາບສູງຂອງວຽກງານກວດກາ, ສືບຕໍ່ສູ້ຊົນຄົ້ນຄວ້າວາງລະບອບ, ລະບຽບ, ກົນໄກ ຕິດຕາມ, ກວດກາພັກ-ລັດ, ສະກັດກັ້ນ ແລະ ຕ້ານການສໍ້ລາດ ບັງຫຼວງໃຫ້ຄົບຖ້ວນ, ການກວດກາຕ້ອງຮັບປະກັນຄວາມສາມັກຄີເປັນເອກະພາບ, ສ້າງເງື່ອນໄຂໃຫ້ການຈັດຕັ້ງ, ສະມາຊິກພັກ, ນາຍ ແລະ ພົນຕຳຫຼວດ, ມະຫາຊົນເຂົ້າຮ່ວມໃນວຽກງານຕິດຕາມ, ກວດກາ, ຕ້ອງສູ້ຊົນແກ້ໄຂລັດທິ ເອກະຊົນ, ພະຍາດອາຍາສິດ, ສໍ້ລາດບັງຫຼວງໃຫ້ຫຼຸດໜ້ອຍຖອຍລົງ ແລະ ຂາດໂຕໃນອະນາຄົດ.
ໃນກອງປະຊຸມ, ຍັງໄດ້ເຜີຍແຜ່ເອກະສານຄຳສັ່ງແນະນຳຂອງຄະນະເລຂາທິການສູນກາງພັກ ເລື່ອງເພີ່ມທະວີການນຳພາ-ຊີ້ນຳຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນຂອງການກວດກາ, ຄຳແນະນຳການຈັດຕັ້ງປະຕິບັດກົດໝາຍ ວ່າດ້ວຍການກວດກາລັດ (ສະບັບປັບປຸງ), ຄຳແນະນຳກ່ຽວກັບການປັບປຸງການຈັດຕັ້ງຄະນະກວດກາພັກ ແລະ ອົງການກວດກາລັດແຕ່ລະຂັ້ນ ແລະ ຄຳແນະນຳ ການກະກຽມ ແລະ ດໍາເນີນຊີວິດການເມືອງທ້າຍ ສະໄໝ ກອງປະຊຸມໃຫຍ່ 3 ຂັ້ນ ຂອງພັກ.
