ກອງບັນຊາການປ້ອງກັນທີ່ຕັ້ງ (ປຕ) ກະຊວງ ປກສ ໄດ້ຈັດພິທີປະກາດແຕ່ງຕັ້ງ ຮອງຫົວໜ້າກອງບັນຊາການ ປຕ ເພີ່ມ ຈໍານວນ 3 ສະຫາຍ ໃນວັນທີ 30 ພຶດສະພາ 2024, ເປັນກຽດເຂົ້າຮ່ວມ ໂດຍ ພົຕ ສົມວັນ ສາຍລ້ອງພາ ຄະນະປະຈຳພັກກະຊວງ ຮອງລັດຖະມົນຕີກະຊວງ ປກສ, ມີ ພົຈວ ຄອນສະຫວັນ ສົມພາໄຊ ຮອງຫົວຫນ້າກົມໃຫຍ່ການເມືອງ,ພັອ ຈັນທອນ ແກ້ວມະນີວົງ ຫົວໜ້າກອງບັນຊາການ ປຕ, ມີຄະນະພັກ-ຄະນະບັນຊາ, ຄະນະຫ້ອງ, ກອງພັນ, ກອງເອກະລາດ ແລະ ສູນຝຶກວິຊາສະເພາະ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.
ພັອ ວິຊຽນ ຫານວິໄລ ຮອງຫົວໜ້າກົມພະນັກງານ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບ ເລກທີ 760/ປກສ ,ລົງວັນທີ 27 ມີນາ 2024 ວ່າດ້ວຍ ການແຕ່ງຕັ້ງນາຍຕໍາຫຼວດ ທີ່ຂຶ້ນກັບ ກອງບັນຊາການປ້ອງກັນທີ່ຕັ້ງ. ໃນນີ້, ລັດຖະມົນຕີ ກະຊວງປ້ອງກັນຄວາມສະຫງົບ ຕົກລົງແຕ່ງຕັ້ງ: ພັອ ໄກສອນ ແກ້ວມະນີ, ພັອ ພິມມະສອນ ທຳມະວົງ ແລະ ພັອ ກິຕັນ ໄພໂລດ ເປັນຮອງຫົວໜ້າກອງບັນຊາການປ້ອງກັນທີ່ຕັ້ງ, ສ່ວນຫົວໜ້າ ແລະ ຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.
ໂອກາດນີ້, ພົນຕີ ສົມວັນ ສາຍລ້ອງພາ ກໍໄດ້ໂອ້ລົມຕໍ່ພິທີ ແລະ ເນັ້ນໃຫ້ຜູ້ທີ່ໄດ້ຮັບການແຕ່ງຕັ້ງວ່າ: ການປະກາດແຕ່ງຕັ້ງໜ້າທີ່ໃໝ່ໃນຄັ້ງນີ້ ແມ່ນການປະຕິບັດຕາມການຕົກລົງເຫັນດີເອກະພາບ ຕາມແຜນຂອງກະຊວງປ້ອງກັນຄວາມສະຫງົບ ເປັນໄປຕາມກົດເກນ, ເປັນປົກກະຕິ ແລະ ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່, ສະຫາຍທີ່ຍົກຍ້າຍມາຢູ່ກອງບັນຊາການ ປຕ ແລະ ໄດ້ຮັບການແຕ່ງຕັ້ງຄັ້ງນີ້ ລ້ວນແລ້ວແຕ່ໄດ້ຜ່ານຂະບວນວິວັດແຫ່ງການທົດສອບ, ມີຄວາມເຕີບໃຫຍ່ເຂັ້ມແຂງ, ໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງໃນແຕ່ລະຂັ້ນ, ແມ່ນໝາກຜົນຂອງການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ; ເຊິ່ງນາຍ ແລະ ພົນຕຳຫຼວດພວກເຮົາໄດ້ປະກອບສ່ວນຢ່າງຕັ້ງໜ້າເຂົ້າໃນການປະຕິບັດ 2 ໜ້າທີ່ຍຸດທະສາດ ຄື: ການປົກປັກຮັກສາ ແລະ ສ້າງສາພັດທະນາປະເທດຊາດ ຂອງກຳລັງປ້ອງກັນຄວາມສະຫງົບ.
