ກະຊວງປ້ອງກັນຄວາມສະຫງົບ ຮ່ວມກັບຄອບຄົວ ບຸດດາຄໍາ ໄດ້ຈັດພິທີນໍາອັດທິ ພົຕ ຄໍາຜົນ ບຸດດາຄໍາ ນັກຮົບແຂ່ງຂັນແຫ່ງຊາດ ອະດີດກໍາມະການສູນກາງພັກ 3 ສະໄໝ ອະດີດຮອງລັດຖະມົນຕີກະຊວງພາຍໃນ ( ກະຊວງປ້ອງກັນຄວາມສະຫງົບ ໃນປັດຈຸບັນ ) ອະດີດຮອງປະທານສະຫະພັນນັກຮົບເກົ່າແຫ່ງຊາດ ນໍາໄປສະທິດໄວ້ຢູ່ສຸສານນັກຮົບປະຕິວັດ ໃນວັນທີ 21 ພຶດສະພາ 2024 ໂດຍ ມີ ທ່ານ ປອ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ, ມີຫົວໜ້າກົມໃຫຍ່, ຮອງຫົວໜ້າຫ້ອງວ່າການ, ຄອບຄົວການນໍາພັກ-ລັດ, ນາຍຕໍາຫຼວດກົມກອງອ້ອມຂ້າງກະຊວງເຂົ້າຮ່ວມ.
ພົທ ກົງທອງ ພົງວິຈິດ ໄດ້ກ່າວສະດຸດີເຖິງດວງວິຍານ ພົຕ ຄໍາຜົນ ບຸດດາຄໍາ ວ່າ: ພົຕ ຄໍາຜົນ ບຸດດາຄໍາ ໄດ້ເຂົ້າການປະຕິວັດແຕ່ປີ 1954 ເຊິ່ງເຂົ້າເປັນທະຫານລາວອິດສະຫຼະ; ຕະຫຼອດໄລຍະຜ່ານມາ ພົຕ ຄໍາຜົນ ບຸດດາຄໍາ ໄດ້ຖືກມອບໝາຍໜ້າທີ່ໃຫ້ຮັບຜິດຊອບຫຼາຍວຽກງານ, ພ້ອມນັ້ນສະຫາຍຍັງໄດ້ຖືກມອບໝາຍໃຫ້ໄປຊີ້ນໍາ-ນໍາພາວຽກງານສືບຂ່າວນອກເຂດ, ປ້ອງກັນການເມືອງ, ປ້ອງກັນພາຍໃນ, ສືບຂ່າວຕ້ານສືບຂ່າວ, ປ້ອງກັນໃກ້ສິດ, ຕິດຕໍ່ສື່ສານ, ຊຶ່ງບັນດາວຽກດັ່ງກ່າວ ເປັນວຽກ ທີ່ໜັກໜ່ວງ ແລະ ຫຍຸ້ງຍາກ, ແຕ່ສະຫາຍກໍໄດ້ບຸກບືນ, ມີຄວາມອົດທົນຜ່ານຜານໍາພາ, ຈັດຕັ້ງປະຕິບັດ ແນວທາງ, ແຜນນະໂຍບາຍຂອງພັກ, ລະບຽບກົດໝາຍຂອງລັດ, ໃນຖານະເປັນພະນັກງານຂັ້ນນໍາ, ເປັນກຳມະການສູນກາງພັກ, ສະຫາຍແມ່ນຜູ້ໜຶ່ງທີ່ມີຄວາມຫ້າວຫັນໃນການຄົ້ນຄວ້າ ແລະ ປະກອບຄໍາຄິດຄໍາ ເຫັນເຂົ້າໃນການປັບປຸງບູລະນະບັນດາແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບສຸກ ແຕ່ລະໄລຍະເປັນຢ່າງດີ.
ດ້ວຍຜົນງານ ແລະ ຄຸນງາມຄວາມດີທີ່ໄດ້ປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດ ສະຫາຍ ພົນຕີ ຄໍາຜົນ ບຸດດາຄໍາ ຈິ່ງໄດ້ຮັບການຍ້ອງຍໍຈາກພັກ-ລັດ ຄື: ໄດ້ຮັບຫຼຽນນາມມະຍົດນັກຮົບແຂ່ງຂັນ 1 ໜ່ວຍ, ຫຼຽນໄຊອິດສະຫຼະຊັ້ນ II 3 ໜ່ວຍ, ຫຼຽນໄຊອິດສະຫຼະຊັ້ນ III 2 ໜ່ວຍ, ຫຼຽນໄຊຊະນະເລີດຊັ້ນ I 1 ໜ່ວຍ, ຫຼຽນໄຊແຮງງານຊັ້ນ I 1 ໜ່ວຍ, ຫຼຽນໄຊແຮງງານ ຊັ້ນ II 2 ໜ່ວຍ, ຫຼຽນກາຕ້ານຝຣັ່ງ 1 ໜ່ວຍ, ຫຼຽນກາຕ້ານອາເມລິກາ 1 ໜ່ວຍ, ຫຼຽນມິດຕະພາບລາວ-ຫວຽດນາມ 3 ໜ່ວຍ, ຫຼຽນກາມິດຕະພາບກູບາ 3 ໜ່ວຍ, ຫຼຽນກາມິດຕະ ພາບໂຊວຽດ 1 ໜ່ວຍ, ຫຼຽນກາ 5 ປີ 2 ໜ່ວຍ, ຫຼຽນກາລະນຶກຄົບຮອບ 50 ປີ ຂອງພັກ 1 ໜ່ວຍ, ຫຼຽນກາຄົບຮອບ 50 ປີຂອງ ປກສ 1 ໜ່ວຍ, ຫຼຽນກາລະນຶກ 50 ປີ ກອງພັນທີ 2 ຈໍານວນ 1 ໜ່ວຍ, ຫຼຽນກາລະນຶກຄົບຮອບ 60 ປີຂອງແນວລາວສ້າງຊາດ 1 ໜ່ວຍ. ນອກນັ້ນຍັງໄດ້ໃບຍ້ອງຍໍຕ່າງໆອີກຈໍານວນໜຶ່ງ.
ສະຫາຍ ພົນຕີ ຄໍາຜົນ ບຸດດາຄໍາ ໄດ້ເສຍຊີວິດດ້ວຍໄວຊະລາ ໃນເວລາ 08 ໂມງ 10 ນາທີ ຂອງວັນທີ 26 ມິຖຸນາ 2011 ລວມອາຍຸ 81 ປີ. ເພື່ອປະຕິບັດນະໂຍບາຍຕໍ່ຜົນງານ ແລະ ຄຸນງາມຄວາມດີຂອງ ພົຕ ຄໍາຜົນ ບຸດດາຄໍາ ການຈັດຕັ້ງ ພັກ-ລັດ ໂດຍສະເພາະກະຊວງປ້ອງກັນຄວາມສະຫງົບ ຊຶ່ງໃດ້ຮັບການຕົກລົງມອບ ໝາຍຈາກ ພັກ-ລັດ ດັ່ງນັ້ນ, ການຈັດຕັ້ງພວກເຮົາ ພ້ອມກັບຄອບຄົວ, ລູກຫຼານ, ຍາດຕິພີ່ນ້ອງໄດ້ທໍາພິທີ ເຄື່ອນຍ້າຍອັດຖິຂອງ ພົຕ ຄໍາຜົນ ບຸດດາຄໍາ ມາສະຖິດໄວ້ທີ່ສຸສານນັກຮົບປະຕິວັດແຫ່ງຊາດ ເພື່ອເປັນບ່ອນກາບໄຫວ້ສັກກາລະບູຊາ, ທັງເປັນບ່ອນສຶກສາຮຽນຮູ້ເຖິງຜົນງານຄຸນງາມຄວາມດີ ທີ່ສະຫາຍໄດ້ສ້າງໄວ້ໃຫ້ແກ່ພະນັກງານ-ລັດຖະກອນ, ກໍາລັງປະກອບອາວຸດ, ລູກຫຼານຜູ້ສືບທອດຕະຫຼອດໄປ.
ພາບ-ຂ່າວ: ຄຳໂຖ
