ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ (509) ກະຊວງປ້ອງກັນຄວາມສະຫງົບ ຈັດພິທີມອບ-ຮັບໜ້າທີ່ ລະຫວ່າງ ຫົວໜ້າກົມຜູ້ເກົ່າ ແລະ ຜູ້ໃໝ່ ໃນວັນທີ 21 ພຶດສະພາ 2024 ໂດຍການເຂົ້າຮ່ວມຂອງ ພົນຕີ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງ ປກສ, ມີຄະນະພັກກະຊວງ, ຫົວໜ້າກົມກົມກອງອ້ອມຂ້າງ, ແຂກຖືກເຊີນ, ນາຍ ແລະ ພົນຕໍາຫຼວດເຂົ້າຮ່ວມ.
ໂອກາດນີ້, ພົຈວ ໜູໃບ ອິນທິສານໄດ້ມີຄຳເຫັນສະຫຼຸບສັງລວມໂດຍຫຍໍ້ການເຄື່ອນໄຫວນຳພາ-ຊີ້ນຳຂອງຕົນຕໍ່ຂົງເຂດວຽກ ງານຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານກະຊວງ ປກສ ໃນໄລຍະຜ່ານມາ ເຊິ່ງໄດ້ຍົກໃຫ້ເຫັນສະພາບຜົນງານທີ່ພົ້ນເດັ່ນ, ບັນດາຜົນງານ ແລະ ໄຊຊະນະທີ່ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານຍາດມາໄດ້ ແລະ ຈຸດອ່ອນ-ຂໍ້ຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂ ເຮັດໃຫ້ວຽກງານຂອງກະຊວງ ກໍຄືຂອງກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານມີຄວາມເຕີບໃຫຍ່ຂະຫຍາຍຕົວຂຶ້ນເປັນກ້າວໆ.
ໂອກາດດັ່ງກ່າວ, ພົຕ ຄໍາກິ່ງ ຜຸຍຫຼ້າມະນີວົງ ໄດ້ໄດ້ຍົກໃຫ້ເຫັນບັນດາຄາດໝາຍສູ້ຊົນ ແລະ ວຽກງານຈຸດສຸມຕົ້ນຕໍທີ່ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານຕ້ອງສຸມໃສ່ເຮັດໃນຊຸມປີຕໍ່ໜ້າ. ພ້ອມກັນນັ້ນ, ໄດ້ຮຽກຮ້ອງໃຫ້ຄະນະພັກ-ຄະນະບັນຊາ, ພະນັກງານຫຼັກແຫຼ່ງພາຍໃນກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານຈົ່ງຍົກສູງສະຕິຄວາມຮັບຜິດຊອບທາງການເມືອງຂອງຕົນຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ, ສາມັກຄີຮ່ວມແຮງ ຮ່ວມໃຈກັນບຸກບືນສູ້ຊົນປະຕິບັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ມີຜົນສຳເລັດເປັນຢ່າງດີ.
ຈາກນັ້ນ ພົນຈັດຕະວາ ໜູໃບ ອິນທິສານ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ຜູ້ເກົ່າ ແລະ ພົນຈັດຕະ ວາ ແກ່ນຈັນ ພົມມະຈັກ ຫົວໜ້າຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ຜູ້ໃໝ່ ໄດ້ລົງລາຍເຊັນມອບ-ຮັບໜ້າທີ່ວຽກ ງານ ໂດຍຊ່ອງໜ້າບັນດາສະຫາຍແຂກທີ່ເຂົ້າຮ່ວມ.
ພາບ-ຂ່າວ: ສົມສະໄຫວ
