ກົມໃຫຍ່ການເມືອງ ກະຊວງ ປກສ ໄດ້ຈັດພິທີປະກາດຍົກຍ້າຍ ແລະ ແຕ່ງແຕ່ງຕັ້ງນາຍຕຳຫຼວດຂັ້ນກົມ ໃນວັນທີ 14 ພຶດສະພາ 2024, ໃຫ້ກຽດເປັນປະທານໂດຍ ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີ ກະຊວງ ປກສ ມີບັນດາຄະນະພັກ-ຄະນະບັນຊາອ້ອມຂ້າງກົມໃຫຍ່ການເມືອງ ເຂົ້າຮ່ວມ.
ພັອ ວັນນະເລດ ບຸດຕະວົງ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງລັດຖະມົນຕີ ວ່າດ້ວຍການກຳນົດໂຄງຮ່າງກົງຈັກການຈັດຕັ້ງກົມກວດກາ-ກວດການ, ສະບັບເລກທີ 903/ປກສ, ລົງວັນທີ 22 ເມສາ 2024. ໃນນີ້, ປະກອບມີ 4 ພະແນກ ທີ່ຂຶ້ບກັບກົມກວດກາ-ກວດການ ຄື: ຫ້ອງການບໍລິຫານ ມີ 4 ໜ່ວຍງານ, ພະແນກພະລາທິການ ມີ 3 ໜ່ວຍງານ, ພະແນກກວດກາພັກ ມີ 2 ໜ່ວຍງານ, ພະແນກກວດກາລັດ ແລະ ຕ້ານການສໍ້ລາດບັງຫຼວງ ມີ 3 ໜ່ວຍງານ ແລະ ພະແນກແກ້ໄຂຄຳສະເໜີ ແລະ ຄຳຮ້ອງຟ້ອງ ມີ 3 ໜ່ວຍງານ.
ຈາກນັ້ນ, ກໍໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການຍົກຍ້າຍນາຍຕຳຫຼວດ ທີ່ຂຶ້ນກັບກົມໃຫຍ່ການເມືອງ ປ້ອງກັນຄວາມສະຫງົບ ສະບັບເລກທີ 748/ປກສ ແລະ ສະບັບເລກທີ 762/ປກສ, ລົງວັນທີ 27 ມີນາ 2024, ໃນນີ້ໄດ້ຍົກຍ້າຍ ພັທ ເຄນ ທິດາວົງ ຈາກກົມນະໂຍບາຍ ໄປຮັບໜ້າທີ່ໃໝ່ຢູ່ ຫ້ອງກຳມະບານ ກະຊວງ ປກສ, ພັທ ສັນຕິ ບຸນມາໄລ ຈາກຫ້ອງຊາວໜຸ່ມ ກະຊວງ ປກສ ໄປຮັບໜ້າທີ່ໃໝ່ຢູ່ ກົມນະໂຍບາຍ, ພັທ ແສງດາວ ວິຜາສຸກ ຈາກຫ້ອງ ການກົມໃຫຍ່ການເມືອງ ປກສ ໄປຮັບໜ້າທີ່ໃໝ່ຢູ່ກົມພັກ ແລະ ຍົກຍ້າຍ ພັອ ບຸນຈັນ ອິນພົນມາ ຈາກກົມໃຫຍ່ການເມືອງ ປກສ ໄປຮັບໜ້າທີ່ໃໝ່ຢູ່ກອງບັນຊາການປ້ອງກັນເຄື່ອນທີ່ ແລະ ໄດ້ຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ວ່າດ້ວຍການແຕ່ງຕັ້ງນາຍຕຳຫຼວດທີ່ຂຶ້ນກັບກົມໃຫຍ່ການເມືອງປ້ອງກັນຄວາມສະຫງົບ ສະບັບເລກທີ 749/ປກສ, ລົງວັນທີ 27 ມີນາ 2024. ໃນນີ້ ແຕ່ງຕັ້ງ ພັອ ສົມພອນ ແກ້ວພູທອນ ເປັນຫົວໜ້າກົມພະນັກງານ, ພັອ ພຽນສີ ແສງຄຳຢອງ ເປັນຫົວໜ້າກົມພັກ, ພັທ ແສງດາວ ວິຜາສຸກ ເປັນຮອງຫົວໜ້າກົມພັກ, ພັທ ໂພຄຳ ໄຊຍະປະເສີດ ເປັນຮອງຫົວໜ້າກົມກໍ່ສ້າງກຳລັງ, ພັທ ສັນຕິ ບຸນມາໄລ ເປັນຮອງຫົວໜ້າກົມນະໂຍບາຍ, ພັທ ເຄນ ທິດາວົງ ເປັນຮອງຫົວໜ້າຫ້ອງກຳມະບານ ກະຊວງ ປກສ ແລະ ພັທ ສີສົມບັດ ໄຊປັນຍາ ເປັນຫົວໜ້າຫ້ອງຊາວໜຸ່ມ ກະຊວງ ປກສ.
ໂອກາດນີ້, ພົຕ ຄໍາກິ່ງ ຜຸຍຫຼ້າມະນີວົງ ໄດ້ໂອ້ລົມ ແລະ ໃຫ້ທິດຊີ້ນໍາຕໍ່ນາຍຕໍາຫຼວດທີ່ໄດ້ຮັບການແຕ່ງຕັ້ງ ແລະ ຍົກຍ້າຍໃນຄັ້ງນີ້, ເຊິ່ງທ່ານໄດ້ຍົກໃຫ້ເຫັນເຖິງຄວາມຈໍາເປັນພາວະວິໄສ ໃນການສັບຊ້ອນພະນັກງານນໍາພາ-ບັນຊາຂັ້ນຕ່າງໆ ໂດຍອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ພ້ອມດຽວກັນນີ້, ທ່ານຍັງໄດ້ຮຽກຮ້ອງໃຫ້ນາຍຕໍາຫຼວດທີ່ໄດ້ຮັບການແຕ່ງຕັ້ງ ແລະ ຍົກຍ້າຍ ຕະຫຼອດຮອດຄະນະພັກ-ຄະນະບັນຊາແຕ່ລະຂັ້ນ ຈົ່ງສືບຕໍ່ເອົາໃຈໃສ່ຍົກສູງການຊີ້ນໍາ-ນໍາພາວຽກງານວິຊາສະເພາະຕິດພັນກັບການກໍ່ສ້າງນາຍ ແລະ ພົນຕໍາຫຼວດ ໃຫ້ມີຄວາມເຕີບໃຫຍ່ເຂັ້ມແຂງ ເພື່ອພ້ອມກັນເຮັດສໍາເລັດໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້.
