ໃນວັນທີ 23 ເມສາ 2024 ກົມໃຫຍ່ການເມືອງ ກະຊວງ ປກສ ໄດ້ຈັດກອງປະຊຸມກະກຽມຈັດຕັ້ງສະເຫຼີມສະຫຼອງວັນສ້າງຕັ້ງກໍາລັງກົມໃຫຍ່ການເມືອງປ້ອງກັນຄວາມສະຫງົບ ຄົບຮອບ 59 ປີ (3 ພຶດສະພາ 1965-3 ພຶດສະພາ 2024) ໂດຍການເປັນປະທານຂອງ ພົຈວ ຄອນສະຫວັນ ສົມພາໄຊ ຮອງຫົວໜ້າກົມໃຫຍ່ການເມືອງ ປກສ, ມີບັນດາຄະນະກົມ, ຫ້ອງ, ໂຮງຮຽນ ອ້ອມຂ້າງກົມໃຫຍ່ການເມືອງ ປກສ ເຂົ້າຮ່ວມ.
ໃນກອງປະຊຸມ, ໄດ້ຜ່ານແຜນການກະກຽມຈັດຕັ້ງສະເຫຼີມສະຫຼອງວັນສ້າງຕັ້ງກຳລັງກົມໃຫຍ່ການເມືອງປ້ອງກັນຄວາມສະຫງົບ ຄົບຮອບ 59 ປີ ເຊິ່ງມີເນື້ອໃນ ແລະ ຮູບການຄື: ຊຸກຍູ້ສ້າງຂະບວນການແຂ່ງຂັນປະຕິບັດວຽກງານວິຊາສະເພາະຢູ່ແຕ່ລະກົມກອງໃຫ້ເປັນຂະບວຝົດຟື້ນ ເພື່ອຂໍ່ານັບຮັບຕ້ອນວັນສ້າງຕັ້ງກຳລັງກົມໃຫຍ່ການເມືອງ ປກສ ໃຫ້ບັນລຸຜົນສໍາເລັດໄປດ້ວຍດີມີຄວາມສະຫງົບ ແລະ ປອດໄພຮອບດ້ານ, ຈັດຕັ້ງການອອກແຮງງານລວມ, ອານາໄມຕາມຕຶກອາຄານສະຖານທີ່ເຮັດວຽກຂອງແຕ່ລະກົມ, ຫ້ອງ, ໂຮງຮຽນອ້ອມຂ້າງກົມໃຫຍ່ການເມືອງ ປກສ ໃຫ້ມີຄວາມສະອາດຈົບງາມ ວັນທີ 26 ເມສາ 2024 ເວລາ 8:30 ໂມງ (ມອບໃຫ້ຊາວໜຸ່ມອ້ອມຂ້າງກົມໃຫຍ່), ວັນທີ 2 ພຶດສະພາ 2024 ເວລາ 8:00-17:00 ໂມງ ພິທີເປີດ-ປິດ ການແຂ່ງຂັນກິລາ 3 ປະເພດ ເຊັ່ນ: ກິລາເປຕັງ, ກິລາບານເຕະ ແລະ ບານສົ່ງຍິງ-ຊາຍ ອ້ອມຂ້າງກົມໃຫຍ່ການເມືອງ ປກສ (ສະຖານທີ່ສູນຮັບຕ້ອນກົມໃຫຍ່ການເມືອງ ປກສ), ວັນທີ 3 ພຶດສະພາ 2024 ເວລາ 8:00 ໂມງ ຈັດພິທີສະ ເຫຼີມສະຫຼອງປາຖະກະຖາເລົ່າມູນເຊື້ອກົມໃຫຍ່ການເມືອງ ປກສ ຄົບຮອບ 59 ປີ (ສະໂມສອນກົມໃຫຍ່ການເມືອງ ປກສ ສະໜາມມ້າ).
ທັງນີ້, ກໍເພື່ອເປັນການໂຄສະນາເຜີຍແຜ່ທາດແທ້ມູນເຊື້ອອັນສະຫງ່າອົງອາດ, ນໍ້າໃຈເສຍສະຫຼະອັນສູງສົ່ງ ແລະ ຜົນງານໄຊຊະນະອັນໃຫຍ່ຫຼວງທີ່ກໍາລັງກົມໃຫຍ່ການເມືອງ ປກສ ຍາດມາໄດ້ຕະຫຼອດໄລຍະ 59 ປີ ຜ່ານມາ ໃນພາລະກິດຕໍ່ສູ້ປົດປ່ອຍຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ແນໃສ່ເຮັດໃຫ້ນາຍ-ພົນຕຳຫຼວດ ທຸກສະຫາຍໄດ້ຮັບຮູ້ ແລະ ເຂົ້າໃຈແຈ້ງ, ເຊື່ອມຊຶມໄດ້ຢ່າງເລິກເຊິ່ງເຖິງທາດແທ້ ແລະ ມູນເຊື້ອຂອງຕົນ, ເປັນການສຶກສາອົບຮົມນໍ້າໃຈຮັກຊາດ, ຮັກລະບອບປະຊາທິປະໄຕປະຊາຊົນ, ສ້າງຄວາມເຊື່ອໝັ້ນຕໍ່ອຸດົມການສັງຄົມນິຍົມ, ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ມີສະຕິເຄົາລົບຕໍ່ລະບຽບກົດໝາຍ ແລະ ລະບຽບວິໄນຂອງກໍາລັງປ້ອງກັນຄວາມສະຫງົບຢ່າງເຂັ້ມງວດ, ຖືເອົາໂອກາດນີ້ເປັນການປັບປຸງກໍ່ສ້າງ ກຳລັງປ້ອງກັນຄວາມສະຫງົບປະຊາຊົນ ເວົ້າສະເພາະ ກໍາລັງກົມໃຫຍ່ການເມືອງ ໃຫ້ກາຍເປັນກໍາລັງປະຕິວັດອັນແທ້ຈິງ, ມີຄວາມປອດໃສ ເຂັ້ມແຂງ ໜັກແໜ້ນ ເພື່ອເຮັດສຳເລັດໜ້າທີ່ການເມືອງທີ່ພັກ-ລັດ ແລະ ປະຊາຊົນ ມອບໝາຍໃຫ້.
ພາບ-ຂ່າວ: ແກ້ວ ອຸເພັດ
