ເຈົ້າໜ້າທີ່ສະກັດກັ້ນ-ຕ້ານອັກຄີໄພ ແລະ ກູ້ໄຟ-ກູ້ຊີບ ສາມປະເທດ ກຳປູເຈຍ, ລາວ, ຫວຽດນາມ ໄດ້ຈັດສຳມະນາ ວ່າດ້ວຍການຮ່ວມມື ແລະ ແລກປ່ຽນປະສົບການ ວຽກງານສະກັດ-ຕ້ານອັກຄິໄພ ແລະ ກູ້ໄພ-ກູ້ຊີບ ຢູ່ທີ່ນະຄອນດານັງ ສສ ຫວຽດ ນາມ ໃນວັນທີ 28 ມີນາ 2024; ເພື່ອເປັນການປຶກສາຫາລື ແລະ ການຮ່ວມມືຂອງສາມປະເທດ ໃນການສ້າງຄວາມອາດສາ ມາດການບັນເທົາທຸກຈາກໄພພິບັດ, ແລກປ່ຽນປາສົບການໃນການ ກູ້ໄພ-ກູ້ຊີບ ຈາກໄພພິບັດຕ່າງໆ.
ທ່ານ ພົນຕີ ຫງວຽນ ຕັວນ ແອັງ ຫົວໜ້າກົມຕຳຫຼວດສະກັດກັ້ນ-ຕ້ານອັກຄິໄພ ແລະ ຊ່ວຍເຫຼືອກູ້ຊີບ ກະຊວງປ້ອງກັນຄວາມສະຫງົບຫວຽດນາມ ໄດ້ຂຶ້ນກ່າວເປີດພິທີຢ່າງເປັນທາງການ, ເຊິ່ງທ່ານໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ກຳລັງຕໍາຫຼວດສະກັດກັ້ນ ແລະ ຕ້ານອັກຄິໄພ ກຳປູເຈຍ ແລະ ລາວ ທີ່ໄດ້ເຂົ້າຮ່ວມງານສຳມະນາໃນຄັ້ງນີ້; ເຊິ່ງມີຄວາມໝາຍ-ສຳ ຄັນຢ່າງຍິ່ງໃນການແລກປ່ຽນບົດຮຽນ ແລະ ການຮ່ວມມືຂອງສາມກຳລັງໃຫ້ນັບມື້ເເໜ້ນແຟ້ນຂຶ້ນໄປເລື້ອຍໆ.
ຈາກນັ້ນ, ຕາງໜ້າເຈົ້າໜ້າທີ່ຕຳຫຼວດສະກັດກັ້ນ-ຕ້ານອັກຄີໄພ ແລະ ກູ້ໄພ-ກູ້ຊີບ ທັງສາມປະເທດໄດ້ຜັດປ່ຽນກັນຂຶ້ນນຳສະເໜີກ່ຽວກັບບັນດາເຫດການທີ່ເກີດຂຶ້ນຢູ່ພາຍໃນປະເທດຂອງຕົນ ພ້ອມທັງວິທີການສະກັດກັ້ນ-ແກ້ໄຂໃນໄລຍະຜ່ານມາ ເພື່ອເປັນການແລກປ່ຽນປະສົບການ, ວິທີການ ແລະ ທິດທາງການຮ່ວມມືກັນໃນຕໍ່ໜ້າຢ່າງມີປະສິດທິພາບ ແລະ ປະສິດທິຜົນ.
ທ່ານ ພັອ ວິລະພອນ ວົງຄຳມຸນຕີ ຫົວໜ້າກົມຕຳຫຼວດສະກັດກັ້ນ ແລະ ຕ້ານອັກຄີໄພ ກະຊວງປ້ອງກັນຄວາມສະຫງົບລາວ ໄດ້ມີຄຳເຫັນວ່າ: ເຈົ້າໜ້າທີຕໍາຫຼວດສະກັດກັ້ນ ແລະ ຕ້ານອັກຄີໄພ ສປປ ລາວ ມີຄວາມຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ເຂົ້າຮ່ວມກອງປະຊຸມສຳມະນາແລກປ່ຽນບົດຮຽນກ່ຽວກັບວຽກງານສະກັດກັ້ນ-ຕ້ານອັກຄີໄພ ແລະ ກູ້ໄພ-ກູ້ຊີບ; ທິດທາງການຮ່ວມມືໃນຕໍ່ໜ້າ ແລະ ກົນໄກການເຂົ້າຮ່ວມສະກັດກັ້ນ-ຕ້ານອັກຄີໄພ ແລະ ກູ້ໄພ-ກູ້ຊີບ ເມື່ອມີເຫດການເກີດຂຶ້ນໃນເຂດຊາຍແດນຂອງສາມປະເທດ ລາວ-ຫວຽດນາມ-ກໍາປູເຈຍ. ກອງປະຊຸມຄັ້ງນີ້ ແມ່ນໂອກາດອັນດີໃນການພົບ ປະແລກປ່ຽນທອດຖອນບົດຮຽນເຊິ່ງກັນແລະກັນກ່ຽວກັບວຽກງານສະກັດກັ້ນ-ຕ້ານອັກຄີໄພ ແລະ ກູ້ໄພ-ກູ້ຊີບ, ເຊິ່ງເປັນອີກບາດກ້າວອັນສຳຄັນໃນການເພີ່ມທະວີຮັດແໜ້ນສາຍພົວພັນຂອງສາມປະເທດ (ກຳປູເຈຍ-ລາວ-ຫວຽດນາມ) ຍົກສູງລະດັບຄວາມຮູ້ຄວາມສາມາດຂອງເຈົ້າໜ້າທີ່ ແລະ ລວມເຖິງທັກສະຕ່າງໆໃນການຈັດຕັ້ງປະຕິບັດພາລະກິດການມອດໄຟ ແລະ ກູ້ໄພ-ກູ້ຊີບ ຈາກອາຄານຖະຫຼົ່ມ, ນ້ຳຖ້ວມ, ຈາກການຂຸດຄົ້ນແຮ່ທາດ ແລະ ຈາກສານເຄມີທີ່ອັນຕະລາຍ ເພື່ອໃຫ້ສາມາດແກ້ໄຂບັນຫາໄດ້ທັນເວລາ ແລະ ທັງເປັນການກຽມຄວາມພ້ອມໃນການຮັບມືໄພພິບັດດັ່ງກ່າວໄດ້ເປັນຢ່າງດີໃນອານາຄົດ.
ຂ່າວ-ພາບ: ພັຕ ຄຳແສງ
