ວັນທີ 29 ສິງຫາ, ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນປະເທດ ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມຄະນະ ໄດ້ເຄື່ອນໄຫວຕິດຕາມສະພາບນ້ຳຖ້ວມຢູ່ແຂວງອຸດົມໄຊ, ໃຫ້ກຽດຕ້ອນຮັບໂດຍ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ພ້ອມດ້ວຍການນຳຂອງແຂວງ ແລະ ບັນດາພະແນກການອ້ອມຂ້າງແຂວງ.
ທ່ານຮອງນາຍົກ ພ້ອມຄະນະ ໄດ້ເຂົ້າຮັບຟັງການລາຍງານສະພາບໄພພິບັດທີ່ເກີດຂຶ້ນຢູ່ແຂວງອຸດົມໄຊ, ໂດຍ ທ່ານ ບຸນຄົງ ຫຼ້າຈຽມພອນ ເຈົ້າແຂວງ ລາຍງານໃຫ້ຮູ້ວ່າ:
ໃນວັນທີ 26 ສິງຫາ ຜ່ານມາ, ຢູ່ແຂວງອຸດົມໄຊ ໄດ້ຮັບຜົນກະທົບຈາກລົມພະຍຸໝູນລະດູຮ້ອນ ມາອອນ ( MAON ) ເຊິ່ງພະຍຸດັ່ງກ່າວໄດ້ສ້າງຜົນກະທົບ, ຜົນເສຍຫາຍໃຫ້ແກ່ 4 ເມືອງ ຄື: ເມືອງໄຊ, ເມືອງນາໝໍ້, ເມືອງງາ ແລະ ເມືອງຫຼາ ເຮັດໃຫ້ມີຝົນຕົກໜັກຕິດຕໍ່ກັນຫຼາຍຊົ່ວໂມງ ກໍ່ໃຫ້ເກີດມີນໍ້າປ່າໄຫຼຊຸແຮງ ແລະ ສ້າງຄວາມເສຍຫາຍຢ່າງໜັກໜ່ວງໃຫ້ແກ່ປະຊາຊົນທີ່ອາໄສຢູ່ລຽບຕາມແຄມນໍ້າກໍ ເມືອງໄຊ, ນໍ້າພາກ ເມືອງຫຼາ, ນໍ້າແຊ ເມືອງນາໝໍ້, ນໍ້າຫ້ວຍຊານ ເມືອງງາ ແລະ ບັນດາຫ້ວຍຮ່ອງຕ່າງໆ ອັນເປັນສາເຫດນໍາຄວາມເສຍຫາຍເຊັ່ນ: ພື້ນຖານໂຄງລ່າງ, ຊີວິດ, ຊັບສິນ, ເຮືອນ ຊານບ້ານຊ່ອງ, ສັດລ້ຽງ, ເນື້ອທີ່ທໍາການຜະລິດ, ເສັ້ນທາງຄົມມະນາຄົມ, ໄຟຟ້າ, ນໍ້າປະປາ, ນໍ້າລິ່ນ, ໂຮງຮຽນ, ໂຮງໝໍ, ການສື່ສານ ແລະອື່ນໆ.
ຜົນກະທົບດັ່ງກ່າວ ສ້າງຄວາມຫຍຸ້ງຍາກຂາດເຂີນໃຫ້ແກ່ປະຊາຊົນ ເປັນຕົ້ນແມ່ນ: ເຂົ້າກິນ, ນໍ້າກິນ-ນໍ້າໃຊ້, ຢາປົວພະຍາດ, ທີ່ພັກອາໄສຊົ່ວຄາວ, ເຄື່ອງນຸ່ງຫົ່ມ ແລະອື່ນໆ.
ເຫດການດັ່ງກ່າວ ເປັນການທ່ວງດຶງໃນການພັດທະນາເສດຖະກິດ-ສັງຄົມຂອງຄອບຄົວ, ຂອງເມືອງ ແລະ ຂອງແຂວງອີກດ້ວຍ. ພາຍຫຼັງເກີດເຫດຂະແໜງແຮງງານ ແລະ ສະຫວັດດີການສັງຄົມແຂວງ ໄດ້ສົມທົບກັບພາກສ່ວນກ່ຽວຂ້ອງ ລົງເກັບກໍາຂໍ້ມູນຜົນກະທົບ ແລະ ຜົນເສຍຫາຍໃນ 4 ເມືອງ. ໃນນັ້ນ, ມີບ້ານທີ່ໄດ້ຮັບຜົນກະທົບ ແລະ ເສຍຫາຍທັງໝົດ 25 ບ້ານ, ມີ 469 ຫຼັງຄາເຮືອນ, ມີພົນລະເມືອງ 2.324 ຄົນ ຍິງ 900 ຄົນ, ມີຜູ້ເສຍຊີວິດ 2 ຄົນ, ບາດເຈັບ 3 ຄົນ, ມີເຮືອນຖືກຜົນກະທົບ ຈໍານວນ 66 ຫຼັງ.
ໃນນັ້ນ, ເຮືອນຖືກນໍ້າພັດຊຸໄຫຼ ຈໍານວນ 58 ຫຼັງ, ດິນເສາະເຈື່ອນ 2 ຫຼັງ ແລະ ເລົ້າເຂົ້າໄຫຼນໍ້າ 23 ຫຼັງ, ມີເສົາໄຟຟ້າເສຍຫາຍ ຈໍານວນ 301 ຕົ້ນ, ເສົາໄຟຟ້າ 8 ແມັດເສຍຫາຍ 6 ຕົ້ນ, ຄອນສາຍເສຍຫາຍ 231 ຄອນ, ດອກກັນໄຟເສຍຫາຍ 327 ດອກ ແລະ ສາຍໄຟຟ້າເສຍຫາຍ 24.900 ແມັດ, ນໍ້າຖ້ວມອັ່ງຖະໜົນຫົນທາງມີຫຼາຍຈຸດ, ເສັ້ນທາງ ເລກທີ 2E ເມືອງໄຊ ຫາ ເມືອງຫຼາ ລະຫວ່າງກິໂລແມັດ 15-24 ຖືກຕັດຂາດ 4 ຈຸດ, ຂົວຖືກຕັດຂາດ 4 ແຫ່ງ, ເປເພ່ 3 ແຫ່ງ , ດິນເຈື່ອນຖົມທາງ 15 ຈຸດ ແລະ ເສັ້ນທາງຊົນນະບົດໄດ້ເປ່ເພ ແລະ ຂົວຖືກຕັດຂາດ 11 ແຫ່ງ.
ເຄື່ອງວັດແທກ ລະດັບນໍ້າແບບໂອໂຕມາຕິກຈຸດວັດແທກຂົວນໍ້າກໍ ບ້ານກໍນ້ອຍ ເມືອງໄຊ ໄດ້ຮັບຜົນກະທົບ ແລະ ເສຍຫາຍທັງໝົດມູນຄ່າ 65 ລ້ານກີບ, ຫຼາວັດແທກລະດັບນໍ້າກໍຈຸດວັດແທກບ້ານໂຮມໄຊ, ຈຸດວັດແທກຂົວນໍ້າກໍ 2 ບ້ານເຈງ, ຈຸດວັດແທກບ້ານຫ້ວຍຂຸມ ໄດ້ຮັບຜົນກະທົບ ແລະ ເສຍຫາຍລວມມູນຄ່າທັງໝົດ 79 ລ້ານກີບ, ໂຮງຮຽນປະຖົມຖືກຜົນກະທົບ (ນໍ້າຖ້ວມ) ມີ 5 ແຫ່ງ, ລະບົບນໍ້າລິນເປ່ເພທັງໝົດ 7 ຈຸດ, ເນື້ອທີ່ທໍາການຜະລິດ ເສຍຫາຍທັງໝົດ 35 ເຮັກຕາ ໃນນັ້ນເນື້ອທີ່ນາເສຍຫາຍ 20 ເຮັກຕາ, ເຂົ້າເນີນສູງ 8 ເຮັກຕາ ແລະ ເນື້ອທີ່ສວນ 7 ເຮັກຕາ.
ສໍາລັບມູນຄ່າເສຍຫາຍຢູ່ເມືອງນາໝໍ້ໃນເບື້ອງຕົ້ນ ມີຈໍານວນ 6.251.450.000 ກີບ, ສ່ວນເມືອງອື່ນໆແມ່ນຍັງບໍ່ທັນໄດ້ປະເມີນມູນຄ່າເສຍຫາຍ. ປັດຈຸບັນ, ຄະນະກໍາມະການຄຸ້ມຄອງໄພພິບັດແຕ່ລະຂັ້ນ ຍັງສືບຕໍ່ເກັບກໍາຂໍ້ມູນຜົນເສຍຫາຍຕື່ມອີກ.
ຕໍ່ກັບເຫດການດັ່ງກ່າວ, ຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ຊຸກຍູ້ບັນດາຄະນະກໍາມະການຄຸ້ມຄອງໄພພິບັດ ແລະ ພາກສ່ວນຕ່າງໆໃນການຕອບໂຕ້ເຫດການສຸກເສີນໄພພິບັດຢູ່ໃນ 4 ເມືອງ ໂດຍການລະດົມກໍາລັງພົນຈາກກອງບັນຊາການ ປກຊ-ປກສ ແລະ ຊາວໜຸ່ມຕະລຸມບອນ ໃນ ການຊ່ວຍເຫຼືອຂົນຍ້າຍປະຊາຊົນ, ເຄື່ອງຂອງຄົວເຮືອນ ແລະ ອະນາໄມເຮືອນຊານບ້ານຊ່ອງຂອງປະຊາຊົນໃນ 3 ເມືອງຄື: ເມືອງໄຊ, ເມືອງຫຼາ ແລະ ເມືອງນາໝໍ້.
ຄົ້ນຫາຜູ້ສູນຫາຍ, ສັນນະສູດສາກສົບຜູ້ເສຍຊີວິດຢູ່ເມືອງຫຼາ, ສໍາລັບເມືອງງາ ແມ່ນເສຍຫາຍແຕ່ເນື້ອທີ່ທໍາການຜະລິດ, ໄດ້ນໍາເອົາເຄື່ອງອຸປະໂພກ-ບໍລິໂພກໄປຊ່ວຍເຫຼືອສຸກເສີນ ເປັນຕົ້ນແມ່ນ: ເຂົ້າສານໜຽວ ຈໍານວນ 105 ກິໂລ, ໝີ່ຍໍາໆ, ນໍ້າດື່ມ, ເຄື່ອງບໍລິໂພກຈໍານວນໜຶ່ງ ຊ່ວຍເຫຼືອໃຫ້ແກ່ 7 ຫຼັງຄາເຮືອນ ແລະ ບັນດາຂະແໜງການຕ່າງໆ ໄດ້ສຸມໃສ່ແກ້ໄຂສຸກເສີນເປັນຕົ້ນແມ່ນ: ຖະໜົນຫົນທາງ, ສ້ອມແປງລະບົບໄຟຟ້າ, ນໍ້າປະປາ, ນໍ້າລິນ, ສ້ອມແປງລະບົບການສື່ສານ ແລະອື່ນໆ.
ໃນໂອກາດັ່ງກ່າວ, ທ່ານຮອງນາຍົກ ຍັງໄດ້ສະແດງຄວາມເປັນຫ່ວງເປັນໃຍຕໍ່ປະຊາຊົນຊາວ ແຂວງອຸດົມໄຊ ໂດຍສະເພາະແມ່ນຜູ້ທີ່ໄດ້ຮັບຜົນກະທົບຈາກເຫດການນ້ຳຖ້ວມໃນຄັ້ງນີ້ ພ້ອມທັງກ່າວສະແດງຄວາມຊົມເຊີຍຕໍ່ອົງການປົກຄອງທຸກຂັ້ນທີ່ໄດ້ສຸມທຸກກຳລັງໃຫ້ການຊ່ວຍເຫຼືອບັນດາຄອບຄົວທີ່ໄດ້ຮັບຜົນເສຍຫາຍ.
ໂອກາດມາເຄື່ອນໄຫວຕິດຕາມສະພາບນ້ຳຖ້ວມ ຢູ່ແຂວງອຸດົມໄຊ ຄັ້ງນີ້ ທ່ານຮອງນາຍົກ ຕາງໜ້າຄະນະກຳມະການຄຸ້ມຄອງໄພພິບັດຂັ້ນສູນກາງ ຍັງໄດ້ນຳເອົາເຂົ້າສານໜຽວ ຈຳນວນ 20 ໂຕນ, ສັງກະສີ ຈຳນວນ 2.000 ແຜ່ນ, ເຫຼັກຕະປູ ຈຳນວນ 500 ກັບ ແລະ ເງິນກອງທຶນນ້ຳມັນ ຈຳນວນ 200 ລ້ານກີບ ລວມມູນຄ່າ 462,6 ລ້ານກີບ ແລະ ຕາງໜ້າໃຫ້ແກ່ ກະຊວງປ້ອງກັນປະເທດ ມອບເງິນສົດຈຳນວນ 200 ລ້ານກີບ ເພື່ອຊ່ວຍເຫຼືອປະຊາຊົນທີ່ປະສົບໄພພິບັດ ຢູ່ແຂວງອຸດົມໄຊ ໃນຄັ້ງນີ້.
ນອກຈາກນີ້, ທ່ານຮອງນາຍົກ ຍັງໄດ້ລົງກວດກາເບິ່ງສະພາບພື້ນທີ່ເກີດໄພພິບັດ ຢູ່ບ້ານສາມັກຄີໄຊ, ບ້ານໂພນໄຊ ແລະ ບ້ານຫ້ວຍຫຼາ ເມືອງຫຼາ ຕື່ມອີກ.
