ວັນທີ 28 ມີນາ 2024 ນີ້, ພົອ ວິໄລ ຫຼ້າຄໍາຟອງ ກໍາມະການ ກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະ ມົນຕີກະຊວງ ປກສ ແຫ່ງ ສປປ ລາວ, ພ້ອມ ຄະນະຜູ້ແທນຂັ້ນສູງ ກະຊວງ ປກສ ເດີນທາງອອກທາງຈາກສະໜາມບິນວັດໄຕ ນະຄອນຫຼວງວຽງຈັນ ເພື່ອເຂົ້າຮ່ວມກອງປະຊຸມປະຈຳປີ ລັດຖະມົນຕີກະຊວງ ປກສ 3 ປະເທດ ຄື: ກະຊວງ ປກສ ລາວ, ກະຊວງ ປກສ ຫວຽດນາມ ແລະ ກະຊວງພາຍໃນກຳປູເຈຍ ທີ່ຈະຈັດຂຶ້ນຢູ່ນະຄອນດານັງ ສສ ຫວຽດນາມ ໃນລະຫວ່າງວັນທີ 28-30 ມີນາ 2024.
ການອອກເດີນທາງຂອງ ທ່ານ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີລັດຖະ ມົນຕີກະຊວງ ປກສ ແຫ່ງ ສປປ ລາວ ໃນຄັ້ງນີ້ ຮ່ວມສົ່ງຂະບວນໂດຍ ທ່ານ ຫງວຽນ ບາຮຸງ ເອກອັກຄະລັກຖະທູດຜູ້ທີ່ມີອຳ ນາດເຕັມ ແຫ່ງ ສສ ຫວຽດນາມ ປະຈຳລາວ, ພ້ອມຄະນະນໍາກະຊວງ ປກສ.
ກອງປະຊຸມທີ່ ພົອ ວິໄລ ຫຼ້າຄໍາຟອງ ຈະເຂົ້າຮ່ວມໃນຄັ້ງນີ້ ເປັນກອງປະຊຸມທີ່ 3 ກະຊວງຮ່ວມ ກັນຈັດຂຶ້ນ, ເຊິ່ງທັງ 3 ກະ ຊວງຈະໄດ້ມີການຮ່ວມມືກັນໃນຫຼາຍດ້ານ ເປັນຕົ້ນແມ່ນວຽກງານສະກັດກັ້ນ-ຕ້ານອາຊະຍາກຳ, ຕ້ານການຄ້າມະນຸດ, ຕ້ານຢາເສບຕິດ, ວຽກງານປ້ອງກັນຄວາມສະຫງົບແຫ່ງຊາດ, ຄວາມເປັນລະບຽບຮຽບຮ້ອຍຢູ່ແຕ່ລະປະເທດ ໂດຍສະເພາະແມ່ນເຂດຊາຍແດນ ແລະ ເຂດສາມຫຼ່ຽມພັດທະນາ CLV.
