ໃນວັນທີ 27 ມີນາ 2024 ກອງເລຂາສາມກະຊວງ ໄດ້ຈັດກອງປະຊຸມຮ່ວມກັນ ເພື່ອກະກຽມຄວາມພ້ອມໃຫ້ແກ່ ກອງປະຊຸມປະຈຳປີ ລັດຖະມົນຕີປ້ອງກັນຄວາມສະຫງົບ, ພາຍໃນ ກຳປູເຈຍ-ລາວ-ຫວຽດນາມ ທີ່ຈະຈັດຂຶ້ນໃນວັນທີ 29 ມີນາ 2024 ທີ່ ນະຄອນດານັງ, ສສ ຫວຽດນາມ.
ທ່ານ ພັອ ຫງວຽນ ມິນ ຫຽວ (NGUYEN MINH HIEU) ຮອງຫົວໜ້າກົມພົວພັນຕ່າງປະເທດ, ຫົວໜ້າກອງເລຂາ, ກະ ຊວງປ້ອງກັນຄວາມສະຫງົບ ສສ ຫວຽດນາມ ໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ຄະນະກອງເລຂາກະຊວງພາຍໃນກຳປູເຈຍ ແລະ ກະຊວງປ້ອງກັນຄວາມສະຫງົບລາວ ທີ່ໄດ້ເດີນທາງມາຮ່ວມກະກຽມໃຫ້ແກ່ກອງປະຊຸມທີ່ມີຄວາມໝາຍສຳຄັນໃນຄັ້ງນີ້; ເຊິ່ງເປັນກອງປະຊຸມສາມກະຊວງຈະໄດ້ມີການຮ່ວມມືກັນໃນຫຼາຍດ້ານ ເປັນຕົ້ນແມ່ນວຽກງານສະກັດກັ້ນ-ຕ້ານອາຊະຍາກຳ, ຕ້ານການຄ້າມະນຸດ, ຕ້ານຢາເສບຕິດ, ວຽກງານປ້ອງກັນຄວາມສະຫງົບແຫ່ງຊາດ, ຄວາມເປັນລະບຽບຮຽບຮ້ອຍຢູ່ແຕ່ລະປະເທດ ໂດຍສະເພາະແມ່ນເຂດຊາຍແດນ ແລະ ເຂດສາມຫຼ່ຽມພັດທະນາ CLV.
ໃນກອງປະຊຸມ; ຄະນະປະທານ ແລະ ຜູ້ທີ່ເຂົ້າຮ່ວມ ກໍໄດ້ພ້ອມປຶກສາຫາລືບັນຫາຕ່າງໆ ເປັນຕົ້ນແມ່ນ ສະຖານທີ່ຈັດກອງປະຊຸມ, ວາລະການດຳເນີນກອງປະຊຸມ, ເນື້ອໃນ ແລະ ອື່ນໆ… ເພື່ອເປັນເອກະພາບກັນນຳສະເໜີລັດຖະມົນຕີປ້ອງກັນຄວາມສະຫງົບສາມປະເທດ ພິຈາລະນາ ແລະ ອອກຖະແຫຼງການຮ່ວມກັນ ໃນວັນທີ 29 ມີນາ 2024 ນີ້.
