ພົຈວ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງ ສະຫວັນນະເຂດ ລາຍ ງານຕໍ່ກອງປະຊຸມ ສະໄໝສາມັນເທື່ອທີ 8 ຂອງສະພາປະຊາຊົນແຂວງສະຫວັນນະເຂດ ຊຸດທີ II ໃນວັນທີ 24 ທັນວາ 2024 ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດວ່າ: ຕະຫຼອດໄລຍະ 11 ເດືອນທີ່ຜ່ານມາ, ເຖິງວ່າຈະປະສົບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ, ແຕ່ດ້ວຍຄວາມຮັບຜິດຊອບການເມືອງທີ່ໄດ້ຮັບມອບໝາຍ. ອົງການປົກຄອງແຂວງ ກໍຄືຄະນະກຳມະການແກ້ໄຂບັນຫາຢາເສບຕິດ ແຕ່ລະຂັ້ນ ໄດ້ພ້ອມກັນສຸມໃສ່ການຈັດຕັ້ງປະຕິບັດວຽກງານສະກັດກັ້ນແກ້ໄຂບັນຫາຢາເສບຕິດຢ່າງຕໍ່ເນື່ອງ ແລະ ມີຜົນສໍາເລັດ ໃນຫຼາຍດ້ານດັ່ງນີ້: ໄດ້ໂຄສະນາຜົນຮ້າຍ-ໄພອັນຕະລາຍຂອງຢາເສບຕິດ ຜ່ານທາງໂທລະພາບ, ສື່ສັງຄົມ ອອນລາຍ ແລະ ວິທະຍຸກະຈາຍສຽງ, ໂຄສະນາອອກໂທລະໂຄ່ງຂອງບ້ານ, ລົງໂຄສະນາຕາມສຳນັກງານອົງການຕ່າງໆ,ຈັດພິທີໂຮມຊຸມນຸມ ສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 23 ປີ ແລະ ເຜົາທໍາລາຍຢາເສບຕິດ 5 ລາຍການ, ລວມນໍ້າໜັກ 679 ກິໂລກຼາມ.
ນອກນັ້ນ, ຍັງໄດ້ສຸມໃສ່ເກັບກໍາເປົ້າໝາຍຄ້າຂາຍຢາເສບຕິດໃນທົ່ວແຂວງທັງໝົດມີ 3.323 ຄົນ ຍິງ 54 ຄົນ. ໃນນີ້, ມີລາຍໃຫຍ່ 329 ຄົນ ຍິງ 05 ຄົນ, ແກ້ໄຂໄດ້ 241 ຄົນ ເທົ່າກັບ 73,25%; ລາຍກາງ 287 ຄົນ ຍິງ 2 ຄົນ, ແກ້ໄຂໄດ້ 157 ຄົນ; ລາຍຍ່ອຍ 2.707 ຄົນ ຍິງ 42 ຄົນ ແກ້ໄຂໄດ້ 1.321 ຄົນ.ສຳລັບ ເປົ້າໝາຍເສບ ມີທັງໝົດ 17.953 ຄົນ ຍິງ 175 ຄົນ, ໄດ້ສຶກສາອົບຮົມຢູ່ຂັ້ນບ້ານ 16.227 ຄົນ ຍິງ 135 ຄົນ, ສົ່ງເຂົ້າສູນປິ່ນປົວຟື້ນຟູຜູ້ຕິດຢາເສບຕິດ 1.206 ຄົນ ຍິງ 40 ຄົນ ປິ່ນປົວ ດີແລ້ວກັບຄືນສູ່ຄອບຄົວ ມີ 1.169 ຄົນ ຍິງ 40 ຄົນ ແລະ ສົ່ງເຂົ້າສູນດັດສ້າງ 1.472 ຄົນ. ກຳນົດພື້ນທີ່ສັບສົນ 119 ຈຸດ ແກ້ໄຂແລ້ວ 51 ຈຸດ, ຈຸດມົ້ວສຸມ 18 ຈຸດ ແກ້ໄຂແລ້ວ 06 ຈຸດ, ຈຸດຂ້າມລອຍ 66 ຈຸດ, ສະຖານທີ່ສັບສົນ 220 ຈຸດແກ້ໄຂ ແລ້ວ 98 ຈຸດ.
ນັບແຕ່ເດືອນມັງກອນ ຫາ ເດືອນພະຈິກ ປີ 2024 ໃນທົ່ວແຂວງ ສາມາດແກ້ໄຂຄະດີຢາເສບຕິດ ໄດ້ທັງໝົດ 603 ເລື່ອງ ຜູ້ຖືກຫາ 938 ຄົນ ຍິງ 90 ຄົນ, ຢຶດຂອງກາງໄດ້ ຢາບ້າ 2.999.818 ເມັດ, ຢາອີ 94 ເມັດ ກັບ 19 ກຼາມ, ຢາເຄ 1 ກິໂລ ກັບ 44 ກຼາມ, ຢາໄອສ໌ 35 ກິໂລ ກັບ 733 ກຼາມ, ຄັນຊາແຫ້ງ 42 ກິໂລ ກັບ 182 ກຼາມ, ໃບກະທ້ອມ 330 ກິໂລ, ຢາດີໄອ 157 ແກ້ວ. ຢາສູບ ໄຟຟ້າ 13.338 ຫຼອດ. ບັ້ງອົກຊີບັນຈຸສານ ໄນຕັດອ໋ອກຊາຍ 3 ບັ້ງ, ເງີນກີບ 1.051.194.000 ກີບ, ເງິນບາດ 2.443.859 ບາດ, ເງິນໂດລາ 212 ໂດລາ, ປື້ມບັນຊີເງີນຝາກທະນາຄານ 7 ຫົວ, ບັດ ATM 9 ບັດ, ໃບຕາດິນ 2 ໃບ, ລົດຈັກ 150 ຄັນ, ລົດໃຫຍ່ 17 ຄັນ, ເຮືອ 2 ລໍາ ພ້ອມຈັກ 2 ເຄື່ອງ, ໂທລະສັບ 545 ໜ່ວຍ, ອາວຸດເສິກ 6 ກະບອກ ພ້ອມລູກປືນ 397ລູກ, ອາວຸດລ່າເນື້ອ 45ກະບອກ, ປືນປະດິດ 2 ບອກ ແລະ ລະເບີດ 1 ໜ່ວຍ.
ນອກນັ້ນ, ຍັງສາມາດມ້າງກຸ່ມໄວລຸ້ນມົ້ວສຸມ 6 ຈຸດ ມີ 22 ເລື່ອງ, ກັກຕົວຜູ້ມົ້ວສຸມ 177 ຄົນ ຍິງ 47 ຄົນ, ຢຶດຂອງກາງ: ຢາບ້າ 960 ເມັດ, ຢາໄອສ໌ 5 ຖົງນ້ອຍ, ຢາເຄ 2 ຖົງ ນ້ອຍ, ຄໍລາເຈນ 15 ຊອງ, ນໍ້າກະທ້ອມ 163 ຕຸກ, ໃບກະທ້ອມສົດ 102 ກິໂລ 13 ກຼາມ ກັບ 74 ໃບ, ໃບກະທ້ອມແຫ້ງ 11,5 ກິໂລກຼາມ ກັບ 13 ໃບ, ຢາດີໄອ 563 ແກ້ວ ແລະ ນໍ້າຕານແກ້ວ 61 ແກ້ວ ໃນນີ້ ຈໍານວນໜຶ່ງ ໄດ້ດໍາເນີນຄະດີຕາມລະບຽບກົດໝາຍ, ຈຳນວນໜຶ່ງຖືກດັດສ້າງໄລຍະສັ້ນ ແລະ ຈຳນວນໜຶ່ງ ສຶກສາອົບຮົມ ມອບຄືນໃຫ້ຜູ້ປົກຄອງ.
