ໃນວັນທີ 13 ມັງກອນ 2025 ນີ້, ກົມສື່ມວນຊົນ ກົມໃຫຍ່ການເມືອງ ກະຊວງ ປກສ ໄດ້ລົງເຄື່ອນໄຫວເຮັດວຽກງານວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ຢູ່ແຂວງວຽງຈັນ, ເຊິ່ງນໍາພາທີມງານໂດຍ ພັອ ພອນພິລຸນ ປັນຍາສິລິ ຮອງຫົວໜ້າກົມສື່ມວນຊົນ ປກສ ພ້ອມດ້ວຍຄະນະ, ໃຫ້ກຽດຕ້ອນຮັບໂດຍ ພົຈວ ສົມຄິດ ດວງພະຈັນ ຫົວໜ້າກອງບັນຊາການ ປກສ ແຂວງວຽງຈັນ.
ໃນໂອກາດນີ້, ພັອ ພອນພິລຸນ ປັນຍາສິລິ ໄດ້ລາຍງານຈຸດປະ ສົງຂອງ ການລົງມາເຄື່ອນໄຫວເຮັດວຽກຢູ່ ແຂວງວຽງ ຈັນ ໃນຄັ້ງນີ້ຕໍ່ ທ່ານ ຫົວໜ້າກອງບັນຊາການ ປກສ ແຂວງວຽງຈັນ, ທັງນີ້ ກໍເພື່ອລົງເກັບກໍາຂໍ້ມູນຜົນງານການຈັດຕັ້ງຜັນຂະຫຍາຍວາລະແຫ່ງ ຊາດ ວ່າດ້ວຍການແກ້ໄຂບັນຫາຢາເສບຕິດຢູ່ແຂວງຈັນ ໃນໄລຍະຜ່ານມາ ແລະ ທິດທາງວຽກງານຈຸດສຸມໃນຕໍ່ໜ້າ, ເພື່ອນໍາເອົາຜົນງານດັ່ງກ່າວມາເຜີຍແຜ່ໂຄສະນາຜ່ານສື່ມວນຊົນ ປກສ ໂດຍສະເພາະໂທ ລະພາບ, ວິທະຍຸ, ໜັງສືພິມ, ວາລະສານ ແລະ ສື່ອອນລາຍ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ ເພື່ອເຮັດໃຫ້ວຽກງານດັ່ງກ່າວບັນລຸຕາມຈຸດປະ ສົງ, ຄາດໝາຍ ແລະ ສອດຄ່ອງກັບສະພາບຄວາມເປັນຈິງ.
ພ້ອມນີ້, ພົຈວ ສົມຄິດ ດວງພະຈັນ ກໍໄດ້ກ່າວສະແດງຄວາມຕ້ອນຮັບ ແລະ ລາຍງານສະ ພາບການທົ່ວໄປພາຍ ໃນແຂວງວຽງຈັນ ລວມທັງວຽກງານທີ່ສໍາຄັນໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຂອງກອງບັນຊາການ ປກສ ແຂວງວຽງຈັນ ແຕ່ປີ 2021-2023 ແລະ ສືບຕໍ່ 2024-2025 ພ້ອມທັງອວຍພອນໃຫ້ທີມງານກົມສື່ມວນຊົນ ກົມໃຫຍ່ການເມືອງ ປກສ ຈົ່ງປະສົບຜົນສໍາເລັດໃນການມາເຄື່ອນໄຫວວຽກ ງານໃນຄັ້ງນີ້.
ໃນໂອກາດນີ້, ທ່ານຫົວໜ້າກອງບັນຊາການ ປກສ ແຂວງວຽງຈັນ ຍັງໄດ້ແລກປ່ຽນບົດຮຽນກ່ຽວກັບວຽກງານ ສື່ມວນຊົນ ປກສ ໂດຍສະເພາະບາງບັນຫາທີ່ຍັງຄົງຄ້າງໃນການປະສານງານລະຫວ່າງຕາງໜ່າງຂ່າວ ປກສ ແຂວງວຽງຈັນ ແລະ ສື່ມວນຊົນ ປກສ, ທັງນີ້ກໍເພື່ອໃຫ້ການປະສານງານລະຫວ່າງສອງພາກສ່ວນມີຄວາມສະດວກວ່ອງໄວ, ສະໜອງຂໍ້ມູນຂ່າວ ສານໃນການອອກຂ່າວໃຫ້ທັນກັບເວລາ.
ພາບ-ຂ່າວ: ສື່ມວນຊົນ ປກສ
