ກອງປະຊຸມພົບປະສອງຝ່າຍ ປະຈໍາປີ 2025 ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ໄດ້ຈັດຂຶ້ນໃນວັນທີ 12 ມັງກອນ 2025 ທີ່ນະຄອນຫຼວງຮ່າໂນ້ຍ ສສ ຫວຽດນາມ, ຝ່າຍລາວນໍາໂດຍ ສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບລາວ ແລະ ຝ່າຍຫວຽດນາມນໍາໂດຍ ສະຫາຍ ພົນເອກ ເລື່ອງ ຕາມ ກວາງ ກໍາມະການກົມການເມືອງ ສູນກາງພັກກອມ ມູນິດຫວຽດນາມ, ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ, ມີການນໍາຂັ້ນສູງ, ພະນັກງານກ່ຽວຂ້ອງ ທັງສອງກະຊວງປ້ອງກັນຄວາມສະຫງົບລາວ ແລະ ຫວຽດນາມ ເຂົ້າຮ່ວມ.
ໃນກອງປະຊຸມ, ທັງສອງຝ່າຍໄດ້ຕີລາຄາສູງຕໍ່ການຈັດຕັ້ງປະຕິບັດແຜນການຮ່ວມມືໃນປີ 2024 ຜ່ານມາແມ່ນມີຜົນສໍາເລັດຫຼາຍດ້ານ ພາຍໃຕ້ການນໍາພາຂອງສອງພັກ ສອງລັດ ເຮັດໃຫ້ການຮ່ວມມືຮອບດ້ານຂອງສອງກະຊວງ ມີຜົນສໍາເລັດຕາມຄາດໝາຍ. ສໍາລັບແຜນການ ຮ່ວມມືປະຈໍາປີ 2025 ລະຫວ່າງ ກະຊວງປ້ອງກັນຄວາມສະຫງົບລາວ ແລະ ຫວຽດນາມ ແມ່ນຈະສືບຕໍ່ຮ່ວມມືກັນໃນຂົງເຂດວຽກງານທີ່ໄດ້ພົວພັນຮ່ວມມືກັນຜ່ານມາ ໂດຍສະ ເພາະການປະສານສົມທົບ, ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ເຊັ່ນ: ເພີ່ມທະວີການຮ່ວມມືປະສານສົມ ທົບກັນໃຫ້ແໜ້ນແຟ້ນໃນການຕ້ານບັນດາອາຊະຍາກໍາ; ສືບຕໍ່ປະສານສົມທົບຕອບຕ້ານການເຄື່ອນໄຫວຂອງກຸ່ມຄົນບໍ່ດີ, ອິດທິກໍາລັງປໍລະປັກທີ່ໃສ່ຮ້າຍປ້າຍສີ, ແບ່ງແຍກຄວາມສາມັກຄີລະຫວ່າງສອງຊາດ, ສືບຕໍ່ໂຄງການກໍ່ສ້າງສູນຂໍ້ມູນພົນລະເມືອງ ແລະ ສືບຕໍ່ຮັດແໜ້ນຄວາມສະມາຄີຮອບດ້ານໃຫ້ເຕີບໃຫຍ່ຂຶ້ນໄປເລື່ອຍໆ.
ໃນໂອກາດນີ້, ການນໍາຂັ້ນສູງຂອງກະຊວງປ້ອງກັນຄວາມສະຫງົບລາວ ແລະ ຫວຽດນາມ ຍັງໄດ້ຕີລາຄາສູງ ແລະ ສະແດງຄວາມເຊື່ອໝັ້ນວ່າ: ກອງປະຊຸມພົບປະສອງຝ່າຍຄັ້ງນີ້ ຈະເປັນຂີດໝາຍໃໝ່ໃນການສືບຕໍ່ຈັດຕັ້ງຜັນຂະຫຍາຍເນື້ອໃນຂໍ້ຕົກລົງຕ່າງໆລະຫວ່າງສອງພັກ, ສອງລັດຖະບານ ໂດຍສະເພາະລະຫວ່າງສອງກະຊວງປ້ອງກັນຄວາມສະຫງົບລາວ ແລະ ຫວຽດນາມ ໃນການຮ່ວມກັນຜັນຂະຫຍາຍສັນຍາຮ່ວມມືປະຈໍາປີ, ຮ່ວມກັນເສີມສ້າງມູນເຊື້ອສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານໃຫ້ນັບມື້ແໜ້ນແຟ້ນ ແລະ ກ້າວສູ່ລວງເລິກຍິ່ງຂຶ້ນ.
ພາຍຫຼັງສໍາເລັດກອງປະຊຸມ, ສະຫາຍ ພົນເອກ ວິໄລຫຼ້າຄໍາຟອງ ພ້ອມດ້ວຍຄະນະ ໄດ້ເຂົ້າຢ້ຽມຂໍານັບ ສະຫາຍ ໂຕ ເລີ່ມ ເລຂາທິການໃຫຍ່ ພັກກອມມູນິດຫວຽດນາມ ພ້ອມທັງໄດ້ລາຍງານຜົນສໍາເລັດໃນການຮ່ວມມືສອງຝ່າຍໃນປີ 2024 ແລະ ແຜນການຮ່ວມມືປະຈໍາປີ 2025.
ໂອກາດນີ້, ສະຫາຍ ໂຕ ເລີ່ມ ກໍໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະນິດສະໜົມ ພ້ອມທັງຕີລາຄາສູງຕໍ່ຜົນການຮ່ວມມືຮອບດ້ານ ລະຫວ່າງສອງພັກ, ສອງລັດຖະ ບານ ໂດຍສະເພາະລະຫວ່າງສອງ ກະຊວງປ້ອງກັນຄວາມສະຫງົບລາວ ແລະ ຫວຽດນາມ; ພ້ອມທັງ ໄດ້ສະແດງຄວາມເຊື່ອໝັ້ນວ່າ ກະຊວງປ້ອງກັນຄວາມສະຫງົບລາວ ແລະ ຫວຽດ ນາມ ຈະພ້ອມກັນສືບຕໍ່ຮ່ວມກັນຜັນຂະຫຍາຍສັນຍາຮ່ວມມືປະຈໍາປີ, ຮ່ວມກັນເສີມຂະ ຫຍາຍມູນເຊື້ອສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານໃຫ້ນັບມື້ແໜ້ນແຟ້ນ ແລະ ມີຜົນສໍາເລັດຕາມຄາດໝາຍ.
