ກອງປະຊຸມໃຫຍ່ຜູ້ແທນຊາວໜຸ່ມ ກອງບັນຊາການປ້ອງກັນທີ່ຕັ້ງ ຄັ້ງທີ VII ໄດ້ຈັດຂຶ້ນໃນວັນວັນທີ 18 ທັນວາ 2024, ໂດຍການເປັນປະທານຂອງສະຫາຍ ພັອ ກິຕັນ ໄພໂລດ ຮອງຫົວໜ້າກອງບັນຊາການປ້ອງກັນທີ່ຕັ້ງ, ຄະນະບໍລິຫານງານຊາວໜຸ່ມກະຊວງ, ເລຂາຄະນະບໍລິຫານງານຊາວໜຸ່ມກອງບັນຊາການປ້ອງກັນທີ່ຕັ້ງ, ມີສະຫາຍ ພັອ ຈັນທອນ ແກ້ວມະນີວົງ ຫົວໜ້າກອງບັນຊາການປ້ອງກັນທີ່ຕັ້ງ, ສະຫາຍ ພັອ ສີສົມບັດ ໄຊປັນຍາ ກຳມະການສູນກາງຊາວໜຸ່ມປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມ ກະຊວງປ້ອງ ກັນຄວາມສະຫງົບ, ມີບັນດາຄະນະບໍລິຫານງານຊາວໜຸ່ມ, ຕາງໜ້າສະມາຊິກຊາວໜຸ່ມ ທົ່ວກອງບັນຊາການປ້ອງກັນທີ່ຕັ້ງ ເຂົ້າຮ່ວມ.
ສະຫາຍ ພັອ ກິຕັນ ໄພໂລດ ໄດ້ຜ່ານບົດລາຍງານການເມືອງ ໃນໄລຍະ 5 ປີຜ່ານມາ ຄະນະບໍລິຫານງານຊາວໜຸຸ່ມກອງບັນຊາການປ້ອງກັນທີ່ຕັ້ງໄດ້ຕັ້ງໜ້າປະກອບສ່ວນປະຕິບັດວຽກ ງານວິຊາສະເພາະ ຢ່າງປະດິດສ້າງ, ມີຜົນສໍາເລັດຫຼາຍດ້ານ, ສ້າງຄວາມເຊື່ອໝັ້ນໄວ້ວາງໃຈຈາກຄະນະພັກ, ຄະນະບັນຊາແຕ່ລະໄລຍະເປັນກ້າວໆ ສະແດງອອກຄື:
ປະກອບສ່ວນປ້ອງກັນກອງປະຊຸມລະດັບຊາດ, ລະດັບສາກົນ, ງານບຸນປະເພນີຂອງຊາດ, ງານລ້ຽງ, ງານສະແດງ, ງານຊຸມນຸມມິດຕັ້ງ, ງານແຂ່ງຂັນກິລາ ແລະ ພິທີສໍາຄັນຕ່າງໆຂອງພັກ-ລັດຈັດຂຶ້ນໄດ້ 1.108 ຄັ້ງ, ຈັດຕັ້ງ-ນໍາພາ ສະມາຊິກເຂົ້າຝຶກອົບຮົມວຽກງງານກວດກາ-ປ້ອງກັນກຳລັງ 5 ວັນ, ເຂົ້າຝຶກອົບຮົມວຽກງານນໍາພາ-ບັນຊາຊາວໜຸ່ມໃນກຳລັງ ປກສ ຄັ້ງທີ2, ຝຶກອົບຮົມຍຸດທະວິທີການນໍາໃຊ້ອາວຸດຢູ່ສະໜາມຍິງປືນ 5 ເມສາ 5 ຄັ້ງ, ຝຶກອົບຮົມວຽກງານປ້ອງກັນຢູ່ຈີນ 14 ວັນ, ປ້ອງກັນເຄື່ອນຍ້າຍວັດຖຸມີຄ່າພາຍໃນ ແລະ ຕ່າງແຂວງໄດ້ 6,845 ຄັ້ງ, ປ້ອງກັນແຂກພາຍໃນ ແລະ ຕ່າງປະເທດ 198 ຄັ້ງ, ປະຈຳການຕະຫຼອດ 24 ຊົ່ວໂມງ, ກວດກາສາລະເວ ແລະ ປະສານສົມທົບກັບກົມກອງວິຊາສະເພາະອື່ນ, ອໍານາດການປົກຄອງທ້ອງຖິ່ນອ້ອມຂ້າງຕາມຈຸດທີ່ຕັ້ງຕ່າງໆໃນຂອບເຂດຮັບຜິດຊອບ 245 ຄັ້ງ, ສາມາດແກ້ໄຂປະກົດການຫຍໍ້ທໍ້ທີ່ເກີດຂຶ້ນໄດ້ 25 ເລື່ອງ ແລະ ສາມາດຄັດເລືອກໄດ້ສະມາຊິກຊາວໜຸ່ມຕົວແບບໃນການປະຕິບັດໜ້າທີ່ວິຊາສະເພາະທີ່ຫ້າວຫັນໄດ້ 5 ສະ ຫາຍ.
ໃນພິທີ, ຍັງໄດ້ປ່ອນບັດເລືອກຕັ້ງເອົາ ຄະນະຊາວໜຸ່ມຊຸດໃໝ່ ເຊິ່ງມີຜູ້ສະໝັກ 15 ສະ ຫາຍ. ໃນນັ້ນ, ເລືອກເອົາ 13 ສະຫາຍ, ຜ່ານການປ່ອນບັດ ເລືອກໄດ້ ສະຫາຍ ພັທ ສິງທະລາວັນ ແກ້ວພັນທອງ ເປັນເລຂາຄະນະຊາວໜຸ່ມ, ສະຫາຍ ພັທ ໂອທອງ ສຸທຳມະວົງ ເປັນຮອງເລຂາ, ທັງເປັນປະທານກວດກາ, ສະຫາຍ ພັທ ນາງ ນວນຈັນ ມະນີລາ ເປັນຮອງເລຂາ ແລະ ອີກ 10 ສະຫາຍ ເປັນຄະນະ.
