ໃນອາທິດຜ່ານມາ, ແຂວງຫົວພັນ ໄດ້ປະກາດອະໄພຍະໂທດແກ່ນັກໂທດທີ່ມີຄວາມກ້າວໜ້າ ເນື່ອງໃນໂອກາດວັນຊາດທີ 2 ທັນວາ ຄົບຮອບ 49 ປີ, ໄດ້ຈັດຂຶ້ນໃນວັນທີ 18 ທັນວາ 2024 ນີ້, ຢູ່ທີ່ສູນວັງລົມ, ເມືອງຊໍາເໜືອ ແຂວງຫົວພັນ, ໂດຍການເຂົ້າຮ່ວມພິທີຂອງ ທ່ານ ດາວເພັດ ພົມສຸວັນ ຫົວໜ້າອົງການໄອຍະການປະຊາຊົນ ແຂວງຫົວພັນ, ມີຄະນະຮັບຜິດຊອບຂັ້ນແຂວງ, ພະນັກງານໄອຍະການປະຊາຊົນແຂວງເຂົ້າຮ່ວມ.
ໂດຍປະຕິບັດຕາມລັດຖະດໍາລັດຂອງປະທານປະເທດ ສະບັບເລກທີ 248 ລົງວັນທີ 26 ພະຈິກ 2024 ວ່າດ້ວຍການອະໄພຍະໂທດແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ, ເນື່ອງໃນໂອກາດວັນຊາດທີ 2 ທັນວາ ຄົບຮອບ 49 ປີ, ໃນນີ້ແຂວງຫົວພັນ ມີນັກໂທດທີ່ຄົບຕາມເງື່ອນໄຂສະເໜີຂໍອະໄພຍະໂທດດ້ວຍການຫຼຸດຜ່ອນໂທດ ແລະ ປ່ອຍຕົວ ປະຈໍາປີ 2024 ມີ 23 ຄົນ ຍິງ 1 ຄົນ, ໃນນີ້, ປ່ອຍຕົວ 1 ຄົນ, ອະໄພຍະໂທດດ້ວຍການຫຼຸດຜ່ອນໂທດ 22 ຄົນ.
