ໃນວັນທີ 17 ທັນວາ 2024, ພົຈວ ກົງຈັນ ໄຊປັນຍາ ກຳມະການພັກແຂວງບໍລິຄຳໄຊ, ຫົວໜ້າກອງບັນຊາການ ປກສ ແຂວງ ໄດ້ລາຍງານການປະຕິບັດວຽກງານດ້ານປະກົດການຫຍໍ້ທໍ້ຕໍ່ກອງປະຊຸມອົງການປົກຄອງແຂວງເປີດກວ້າງ 6 ເດືອນທ້າຍປີ 2024 ໂດຍການເປັນປະທານຂອງທ່ານ ສອນທະນູ ທຳມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ.
ໃນໄລຍະ 6 ເດືອນທ້າຍປີ 2024, ເຈົ້າໜ້າທີ່ໄດ້ດຳເນີນ ແລະ ແກ້ໄຂຄະດີທັງໝົດໃນທົ່ວແຂວງ 309 ເລື່ອງ, ກັກຜູ້ຖືກຫາ 593 ຄົນ ຍິງ 57 ຄົນ. ໃນນີ້, ພົ້ນເດັ່ນແມ່ນຄະດີຢາເສບຕິດ ມີ 176 ເລື່ອງ, ກັກຜູ້ຖືກຫາ ໄດ້ 458 ຄົນ, ຍິງ 50 ຄົນ, ຢຶດຂອງກາງ ປະເພດຢາບ້າ 19.835 ເມັດ, ຢາອີ 61 ກິໂລກຼາມ, ຢາໄອສ໌ 1.559 ກິໂລກຼາມ, ເຮໂຣອິນ 37,5 ກິໂລກຼາມ, ກັນຊາແຫ້ງ 320 ກິໂລກຼາມ, ໃບກະທ່ອມ 15 ກິໂລກຼາມ, ຢາສູບໄຟຟ້າ 531 ອັນ ແລະ ຢາດີໄອ 765 ແກ້ວ.
ສຳລັບປະກົດການຫຍໍ້ທໍ້ທີ່ເກີດຂຶ້ນດັ່ງກ່າວ, ທາງຄະນະຮັບຜິດຊອບໄດ້ມີມາດຕະການແກ້ໄຂບັນຫາດັ່ງກ່າວຢ່າງເຂັ້ມງວດ ເນື່ອງຈາກວ່າໃນປັດຈຸບັນບັນຫາປະກົດການຫຍໍ້ທໍ້ໃນສັງຄົມຍັງເກີດຂຶ້ນຢ່າງຕໍ່ເນື່ອງ ເປັນຕົ້ນການລັກຊັບ, ປຸ້ນຈີ້-ຊິງຊັບ, ຄາຕະກຳ, ບັນຫາອາວຸດເຖື່ອນ, ຄ້າຂາຍເຖື່ອນ, ອາລະວາດຕີກັນ, ສໍ້ໂກງ, ໜີ້ສິນ, ອາຊະຍາກຳທາງເອເລັກໂຕຼນິກ ຄອມພີວເຕີ, ຫຼິ້ນກິນຟຸມເຟືອຍ, ບັນຫາອຸບັດຕິເຫດຕາມທ້ອງຖະໜົນ ແລະ ອື່ນໆ.
ສຳລັບປາກົດການຫຍໍ້ທໍ້ທີ່ພົ້ນເດັ່ນແມ່ນບັນຫາຢາເສບຕິດ ຍັງມີລັກສະນະເພີ່ມຂຶ້ນ ແລະ ແຜ່ລະບາດຢູ່ຫຼາຍຂົງເຂດ ໂດຍສະເພາະແມ່ນຢາເສບຕິດຊະນິດໃໝ່ ເຊັ່ນ: ກາເຟປະສົມສານເສບຕິດ, ຄໍລາເຈນ, ນໍ້າກະທ້ອມ, ຢາສູບໄຟຟ້າ, ສານໄນຕັດອ໋ອກຊາຍ ທີ່ກໍາລັງແຜ່ລະບາດຢ່າງຮ້າຍແຮງ ໂດຍສະເພາະຢູ່ໃນກຸ່ມນັກຮຽນ, ນັກສຶກສາ ພວກເຂົານໍາໃຊ້ສະຖານ ທີ່ງານດອງ, ບຸນປະເພນີ, ຮ້ານກິນດື່ມ, ເທັກ, ບາ, ຮ້ານຄາຣາໂອເກະ ແລະ ສະຖານທີ່ອື່ນໆເປັນບ່ອນມົ້ວສຸມ, ບັນຫາດັ່ງກ່າວເປັນສາເຫດໜຶ່ງທີ່ເຮັດໃຫ້ເກີດມີປະກົດການຫຍໍ້ທໍ້ຕ່າງໆໃນສັງຄົມ ແລະ ຄວາມບໍ່ເປັນລະບຽບຮຽບຮ້ອຍທາງສັງຄົມ ໃນທົ່ວປະເທດກໍຄືບັນດາແຂວງທ້ອງຖິ່ນໃນປັດຈຸບັນ.
