ກອງບັນຊາການ ປກສ ແຂວງ ອັດຕະປື ຈັດພິທີມອບ-ຮັບໜ້າທີ່ຫົວໜ້າກອງບັນ ຊາການ ປກສ ແຂວງ ລະຫວ່າງ ພົຈວ ສີເວີນ ແກ້ວສີວົງສາ ຫົວໜ້າກອງບັນຊາ ການ ປກສ ແຂວງອັດຕະປື ຜູ້ເກົ່າ ແລະ ພັອ ສັກສິດ ສີພັນດວງ ຫົວໜ້າກອງບັນ ຊາການ ປກສ ແຂວງອັດຕະປື ຜູ້ໃໝ່ ໃນວັນທີ 20 ທັນວາ 2024, ໂດຍການເຂົ້າ ຮ່ວມຂອງ ທ່ານ ຄຳຫວັນ ຈັນທະໂຄດ ປະທານກວດກາ ພັກ-ລັດ ແຂວງ, ມີພະນັກ ງານຂັ້ນແຂວງ, ຄະນະພັກ-ຄະນະກອງບັນຊາການ ປກສ ແຂວງ ຕະຫຼອດຮອດນາຍຕຳຫຼວດເຂົ້າຮ່ວມ.
ພົຈວ ສີເວີນ ແກ້ວສີວົງສາ ໄດ້ລາຍງານການເຄື່ອນໄຫວຈັດຕັ້ງນຳພາວຽກງານໃນໄລຍະທີ່ຜ່ານມາໂດຍຍົກໃຫ້ເຫັນດ້ານຜົນງານທີ່ພົ້ນເດັ່ນເປັນຕົ້ນ: ໄດ້ເອົາໃຈໃສ່ສຶກ ສາອົບຮົມວຽກງານການເມືອງ-ແນວຄິດ ໃຫ້ນາຍ ແລະ ພົນຕຳຫຼວດເປັນປົກກະຕິ, ນໍາພາກໍ່ສ້າງປັບປຸງກົງຈັກການຈັດຕັ້ງກຳລັງປ້ອງກັນຄວາມສະຫງົບ ແຂວງອັດຕະປື ໃຫ້ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ, ມີແບບແຜນວິທີເຮັດວຽກທີ່ສອດຄ່ອງ, ພັດທະນາກຳລັງ ຕາມທິດຫັນເປັນທັນສະໄໝເທຶ່ອລະກ້າວ, ຫັນເອົາພະນັກງານວິຊາສະເພາະລົງກໍ່ສ້າງຮາກຖານການເມືອງຕາມທິດ 3 ສ້າງຂອງພັກ-ລັດ ນຳພາປັບປຸງກໍ່ສ້າງພື້ນຖານໂຄງລ່າງມີຄວາມເປັນລະບຽບ ແລະ ຈົບງາມ, ປັບປຸງວຽກງານພະລາທິການເພື່ອແກ້ໄຂຊີວິດການເປັນຢູ່ຂອງກົມກອງ ແລະ ບຸກຄົນຕາມທິດ ເພິງຕົນເອງ ສ້າງຄວາມເຂັ້ມແຂງດ້ວຍຕົນເອງ, ນຳພາຈັດຕັ້ງຜັນຂະຫຍາຍວຽກງານພົວພັນການຕ່າງປະເທດ ເຂົ້າໃນຂົງເຂດວຽກງານປ້ອງກັນຄວາມສະຫງົບກັບປະເທດເພື່ອນບ້ານໃກ້ຄຽງໄດ້ເປັນຢ່າງດີ.
ຈາກນັ້ນ, ໃນພິທີກໍໄດ້ລົງນາມເຊັນບົດບັນທຶກ ມອບ-ຮັບ ໜ້າທີ່ຢ່າງເປັນທາງການລະຫວ່າງ ພົຈວ ສີເວີນ ແກ້ວສີວົງສາ ຫົວໜ້າກອງບັນຊາການ ປກສ ແຂວງອັດຕະປື ຜູ້ເກົ່າ ແລະ ພັອ ສັກສິດ ສີພັນດວງ ຫົວໜ້າກອງບັນຊາການ ປກສ ແຂວງອັດ ຕະປື ຜູ້ໃໝ່, ໂດຍມີ ທ່ານ ຄຳຫວັນ ຈັນທະໂຄດ ຄະນະປະຈຳພັກແຂວງ ປະທານກວດກາ ພັກ-ລັດ ແຂວງມີຄະນະພັກ, ຄະນະກອງບັນຊາການ, ຫົວໜ້າຫ້ອງ ຮອງຫ້ອງ, ຄະນະພະແນກຕະຫຼອດຮອດພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ.
